Американскиот претседател Доналд Трамп повторно упати остри критики кон Иран, тврдејќи дека Техеран истовремено сака да постигне договор со Соединетите Американски Држави, но продолжува со нападите врз бродови во Ормускиот Теснец.
„Сакаат договор, но не знаат како да го постигнат. А потоа навечер излегуваат и пукаат по бродови. Тоа не ми се допаѓа. Преговараат со многу угледни луѓе, но мислам дека се малку полудени“, изјави Трамп.
Осврнувајќи се на американските напади врз Иран, тој оцени дека земјата претрпела тежок воен пораз.
„За само еден ден останаа без речиси целата противвоздушна одбрана. Тоа не значи дека еден ден нема повторно да купат авиони, но сè што имаа исчезна. Нивните лидери исчезнаа. Имаа едни лидери – исчезнаа. Имаа други – и тие исчезнаа. Сега имаат трети. Можеби и тие ќе исчезнат. Кој знае?“, рече американскиот претседател.
Трамп додаде дека верува оти токму тој е главната цел на иранските власти.
„Можеби еден ден и јас ќе исчезнам, бидејќи сум нивната цел број еден. Тие тоа отворено го кажуваат. Но тие се лоши. Така се однесуваат веќе 47 години. Јас го правам она што е исправно за Америка, а всушност и за целиот свет. Нив мора да ги запреме“, порача тој.
Во продолжение, Трамп го обвини Иран дека е одговорен за смртта на голем број луѓе, тврдејќи дека во последните три месеци биле убиени 52.000 демонстранти, без да понуди докази за ова тврдење. Тој ја пофали и американската војска, оценувајќи дека таа „била неверојатна“.
