Трамп ја стопирал американската мисија за заплена на иранскиот ураниум

САД биле многу блиску до одобрување копнена воена операција во Иран со цел присилно преземање на високо збогатениот ураниум, клучен материјал за производство на нуклеарно оружје, објави CNN, повикувајќи се на два извора запознаени со разговорите.

Според информациите, кон крајот на минатиот месец началникот на Здружениот генералштаб на американската армија, генералот Ден Кејн, итно го напуштил состанокот на НАТО во Брисел и отпатувал во седиштето на Централната команда на САД во Тампа, Флорида, за да се информира за воените планови.

— реклама —

Потоа, Кејн го информирал претседателот Доналд Трамп за можните сценарија, но американскиот лидер се откажал од операцијата откако бил предупреден дека таа може да предизвика жесток ирански одговор, да доведе до продолжување на војната и дополнително да ја дестабилизира светската економија.

Изворите наведуваат дека Трамп бил загрижен и поради можноста за голем број американски жртви.

— реклама —

Во центарот на планот биле околу 440 килограми високо збогатен ураниум, складирани во неколку ирански нуклеарни постројки, меѓу кои Исфахан, Натанц и Фордо, кои се наоѓаат длабоко под земја во тунелски комплекси.

— реклама —

Според CNN, американските воени команданти процениле дека таквата мисија би носела „висок до екстремен ризик“ и би барала стотици специјалци и масовно присуство на американски сили на терен.

„Би било неверојатно тешко да се пребаруваат тие тунели и сите контејнери. Ќе требаше да воспоставиме масовно присуство. Во суштина, ќе требаше да извршиме инвазија“, изјавил еден од изворите.

— реклама —

Паралелно со овие планови, Вашингтон и Техеран продолжиле со преговорите за иранската нуклеарна програма. Според американски претставници, Иран наводно бил подготвен да разговара за уништување или отстранување на збогатениот материјал и ограничување на својата нуклеарна програма, додека иранските државни медиуми тврдат дека Техеран не прифатил такви услови.

И покрај тоа што Трамп неодамна изјави дека САД и Иран се блиску до договор, CNN наведува дека можноста за воена операција за преземање на иранскиот ураниум сè уште не е целосно отфрлена.