Трамп ја засилува имиграциската политика: Планирани најмалку 250 постапки за одземање државјанство

Администрацијата на американскиот претседател Доналд Трамп планира значително да го зголеми бројот на постапки за одземање државјанство на лица кои го стекнале преку натурализација, како дел од пошироката стратегија за заострување на имиграциската политика.

Според информации од Министерството за правда на САД, до октомври се планира покренување најмалку 250 нови постапки за одземање државјанство, што претставува значително зголемување во споредба со претходните години.

— реклама —

Само во првите месеци од годинава биле покренати 29 вакви случаи против лица родени надвор од САД, кои се осомничени дека до американско државјанство дошле преку измама или со прикривање важни информации во текот на постапката за натурализација.

Од Министерството за правда посочуваат дека станува збор за законска алатка која постои со децении и има цел да го заштити интегритетот на американското државјанство.

Постапките најчесто се однесуваат на лица обвинети за сериозни измами, сексуални злоупотреби на малолетници, поддршка на терористички организации или прикривање тешки кривични дела при поднесувањето на барањето за државјанство.

— реклама —

Американските власти имаат право да поведат постапка доколку се утврди дека лицето дало лажни изјави или незаконски стекнало државјанство. Мерката не се однесува на лица родени во САД.

Според податоците, во последната деценија речиси осум милиони лица добиле американско државјанство преку процесот на натурализација.

— реклама —

Поради зголемениот број предмети, Министерството за правда пренасочува правници и ресурси од други оддели, вклучително и експерти за граѓански измами, со цел побрзо процесирање на случаите. Во постапките се вклучени и канцелариите на федералните обвинители низ земјата.

Експертите предупредуваат дека ваквите случаи се сложени и долготрајни, бидејќи за одземање државјанство може да одлучува исклучиво федерален суд.

Доколку судот пресуди во корист на државата, лицето се враќа на имиграцискиот статус што го имало пред стекнувањето на државјанството, а во одредени случаи може да се соочи и со депортација.

— реклама —

Од администрацијата на Трамп нагласуваат дека фокусот е ставен на лица кои извршиле сериозни измами или прикриле криминално минато, а не на помали прекршоци.

„Стекнувањето американско државјанство е привилегија и нема да има толеранција кон злоупотребите на тој процес“, порачаа од Министерството за правда на САД.