Трамп: „Мислам дека имам право повторно да се кандидирам, бидејќи ме измамија“

Американскиот претседател Доналд Трамп повторно ја отвори можноста за трет претседателски мандат, тврдејќи дека има право уште еднаш да се кандидира бидејќи, според него, демократите му ја украле победата на изборите во 2020 година.

На предизборен собир во Сиу Сити, во сојузната држава Ајова, Трамп признал дека американскиот Устав не му дозволува повторна кандидатура, но истовремено повторил дека победил на сите три претседателски избори на кои учествувал.

— реклама —

„Не знам кој ќе биде вашиот следен претседател, а мислам дека законот вели дека не смеам повторно да се кандидирам. Долго ја проучував таа формулација“, изјавил Трамп пред своите поддржувачи.

Тој повторно се навратил на изборите во 2020 година, на кои загуби од демократскиот кандидат Џо Бајден, изнесувајќи ги своите досегашни, недокажани тврдења за изборна измама.

„Една работа е поинаква. Нè измамија на вторите избори. А ние победивме трипати. Мислам дека имам право повторно да се кандидирам бидејќи мамеа“, рекол американскиот претседател.

— реклама —

Трамп додал дека сака да му бидат признаени три изборни победи, но не и последиците од поразот во 2020 година, по кој Бајден помина четири години во Белата куќа.

Американскиот претседател победи на изборите во 2016 и 2024 година. Неговите тврдења дека победил и во 2020 година не се поткрепени со докази, а судските постапки и обидите за оспорување на резултатите не го променија официјалниот исход.

— реклама —

Трамп и претходно во повеќе наврати јавно ја разгледуваше можноста да остане на власт и по завршувањето на вториот мандат. Во октомври 2025 година изјави дека уставната забрана е јасна и дека не може повторно да се кандидира, но продолжи повремено да зборува за трет мандат.

Неговите последни изјави доаѓаат помалку од две недели пред конгресните избори на 3 ноември, на кои републиканците настојуваат да го задржат мнозинството во Конгресот. На собирот во Ајова, Трамп изразил поддршка за републиканските кандидати, меѓу кои и кандидатката за Сенатот, Ешли Хинсон.

Дваесет и вториот амандман на Уставот на САД изречно предвидува дека ниту едно лице не може да биде избрано за претседател повеќе од двапати. Амандманот е ратификуван во 1951 година, по четирите изборни победи на Френклин Д. Рузвелт.

Трамп го заврши првиот претседателски мандат во периодот од 2017 до 2021 година, а вториот го започна во јануари 2025 година. Според важечките уставни одредби, тој нема право повторно да биде избран за претседател во 2028 година.

За промена на ова ограничување би била потребна уставна измена, која бара двотретинско мнозинство во двата дома на Конгресот и ратификација од три четвртини од американските сојузни држави.