Трамп: Нема да ја претворам прес-салата во базен, никогаш не би ми паднала на памет таква глупост

Американскиот претседател Доналд Трамп најави дека би можел да ги премести новинарите што известуваат од Белата куќа на друга локација, дополнително заострувајќи го спорот со медиумите околу нивното известување и пристапот до претседателската администрација.

— реклама —

„Можеби ќе ги преместам лажните медиуми на место каде што ќе бидат помалку иритантни“, напиша Трамп во објава.

— реклама —

„Њујорк тајмс“ објави дека Трамп уште во август побарал тогашната портпаролка Каролин Ливит да ги одржува прес-конференциите надвор од салата за брифинзи во Белата куќа. Идејата, сепак, не била спроведена.

— реклама —

Според извештајот, Трамп наводно сакал на местото на просторијата за новинари повторно да има затворен терапевтски базен, каков што постоел за време на претседателот Френклин Делано Рузвелт. Сепак, Трамп ги отфрли тврдењата дека планира таква реконструкција, нарекувајќи ја идејата „глупост“.

Трамп редовно ги обвинува американските медиуми за пристрасно известување. Минатиот месец, новинари од Си-Ен-Ен, Ем-Ес-Ен-Би-Си и „Политико“ привремено добија забрана за пристап до Белата куќа. Пристапот им беше вратен по одлука на федерален судија, кој оцени дека забраната веројатно е неуставна. Администрацијата на Трамп продолжува да ја оспорува одлуката.