Трамп: Убивме еден од најбараните криминалци во светот

Американскиот претседател Доналд Трамп соопшти дека американските сили извеле операција во која бил убиен Хектор Рустенфорд Гереро Флорес, познат како Нино Гереро, водач на венецуелската затворска банда „Трен де Арагва“.

Во објава на својата социјална мрежа Truth Social, Трамп наведе дека нападот бил изведен по негова наредба.

— реклама —

„Според моите инструкции, Јужната команда на САД зададе брз и смртоносен удар со кој успешно беше елиминиран Нино Гереро, озлогласениот лидер на Трен де Арагва, една од најкрвавите терористички организации на планетата“, напиша Трамп.

Тој додаде дека акцијата била тесно координирана со венецуелските власти.

— реклама —

„Операцијата беше спроведена во блиска координација со нашите пријатели во Венецуела, со кои одлично соработуваме“, истакна американскиот претседател.

— реклама —

Трамп не откри каде точно била изведена операцијата, а венецуелското Министерство за информации засега не ја коментираше неговата изјава.

Администрацијата на Трамп претходно воведе санкции против Гереро и други лидери на „Трен де Арагва“, обвинувајќи ги за вмешаност во трговија со дрога и луѓе, перење пари и други криминални активности.

Американскиот Стејт департмент ја прогласи оваа група за странска терористичка организација, а Трамп во повеќе наврати тврдеше дека нејзините активности во САД биле координирани со владата на венецуелскиот претседател Николас Мадуро.

Белата куќа, Пентагон и Јужната команда на САД засега не објавија дополнителни детали за операцијата.