Тринаесет полицајци ја негираат вината за трагедијата во „Пулс“

Со негирање на вината, денеска започна судскиот процес против 13 полициски службеници обвинети за пропусти при контролата на кабарето „Пулс“ во Кочани, каде минатата година загинаа 63 лица.

Судењето го води судијката Фанка Јанчулева-Михаиловска, која побара конструктивност од одбраната и ги одби барањата за изземање и за одложување на постапката, по што одлучи процесот да продолжи со главна расправа.

— реклама —

„Очекував ова рочиште да биде поконструктивно. Може да продолжиме со рочиште за главна расправа. Сте ги примиле доказите и сте имале можност да се запознаете со нивната содржина“, изјави судијката.

Предметот го води Основно јавно обвинителство за гонење организиран криминал и корупција, кое тврди дека обвинетите полициски службеници не презеле мерки за спречување на употребата на пиротехника во објектот, ниту обезбедиле безбедна евакуација на присутните.

— реклама —

Обвинителката Спасенка Андонова посочи дека полицајците имале можност да забележат дека на бината има пиротехнички средства.

— реклама —

„Имале можност да го забележат постоењето на ваквата пиротехника на бината“, нагласи обвинителката.

Одбраната, пак, тврди дека полициските службеници постапувале согласно планот за акциска контрола и дека не можеле да предвидат дека ќе се користи пиротехника.

— реклама —

„Полициските службеници на критичниот ден биле неколку минути присутни во кабарето и почнале да работат по обврските наведени во планот за акциска контрола и не знаеле и не можеле да знаат дека воопшто ќе се користат пиротехнички средства“, наведоа адвокатите на обвинетите.

Според обвинението, на 16 март полицајците не ја прекинале забавата и не спречиле активирање на опасните материи, иако биле дежурни и службено ангажирани во дискотеката.