Учебниците за новата учебна година се дистрибуирани и веќе се наоѓаат во училиштата, уверува министерката за образование и наука Весна Јаневска. Истовремено, таа информираше дека во учебната 2026/2027 година бројот на паралелки е намален за околу 300 – 200 во основното и 100 во средното образование.
За првачиња досега се запишани околу 14.500 деца, но бројката сè уште не е конечна бидејќи уписот на оние кои го пропуштиле рокот трае до крајот на септември. Во 2020 година, според податоците на Државниот завод за статистика, во земјава биле родени 19.031 дете.
Јаневска посочи дека намалувањето на бројот на паралелки е дел од процесот на оптимизација на училишната мрежа, со цел воведување едносменска настава, но и обезбедување подобри услови за социјализација и образование на учениците.
Според неа, годинава се очекува природно да бидат затворени 26 рурални училишта во кои нема запишано првачиња, а во дел од нив учат само пет до осум ученици.
Министерката објасни дека комбинирана настава во подрачните училишта ќе продолжи да се применува таму каде што нема друга можност, односно кога најблиското централно училиште е оддалечено повеќе од 15 до 20 километри.
Во однос на учебниците, Јаневска очекува евентуалните проблеми со оштетени учебници годинава да бидат сведени на минимум. Таа посочи дека училиштата преку онлајн подготовки биле навремено насочени да ги пријават потребните количини за замена.
Јаневска нагласи дека сите што побарале замена на оштетени учебници ќе ја добијат, но одговорноста за оние што не пријавиле потреба, според неа, останува кај самите училишта.
Министерката исто така информираше дека досега нема отпуштања на наставници вработени на неопределено време. Во некои скопски општини, меѓу кои и Аеродром, има недостиг од наставен кадар и се очекуваат нови вработувања.
Надвор од Скопје, според Јаневска, наставниот кадар е доволен, па како едно од решенијата се предвидува продолжен престој на учениците во училиштата и целодневна настава. Таа смета дека со ваквиот модел ќе им се овозможи на учениците да поминуваат повеќе време во образовниот процес, додека родителите би имале поголема слобода во текот на денот.
