Вакцинацијата против сезонски грип ќе почне на 21 октомври, приоритет ќе имаат ризичните групи

Вакцинацијата против сезонски грип се очекува да започне в среда, на 21 октомври, а приоритет ќе имаат најризичните категории граѓани, соопшти министерот за здравство Сашо Клековски.

— реклама —

Тој информираше дека Комисијата за имунизација денеска одржала состанок на кој биле утврдени приоритетите за спроведување на вакцинацијата. Според проценките, со дневна динамика од околу 1.000 вакцинации ќе се стигне до 15 ноември, кога се очекува да пристигне втората количина вакцини.

— реклама —

„Приоритет прво имаат возрасните над 65 години згрижени во институции, поради институцискиот карактер и поголемиот ризик за епидемија во микроуслови, а другите ризични групи ќе бидат опфатени според проценката на Комисијата“, изјави Клековски.

Тој нагласи дека вакцинацијата ќе се спроведува според досегашната методологија, без промени во начинот на работа и организацијата на процесот.

— реклама —

Министерот посочи и дека самиот припаѓа во ризична група и дека со задоволство ќе се вакцинира против сезонски грип.

Клековски ова го изјави одговарајќи на новинарско прашање по потпишувањето на протоколот за децентрализација на терапијата за мултиплекс склероза.