Ученичките протести и блокади на училиштата во Франција, кои траат од минатата недела, стануваат сè понасилни. Во Марсеј денес бил нападнат директор на средно училиште, додека биле регистрирани и пожари во најмалку две образовни установи.
Полицијата соопшти дека стотици млади во Марсеј опколиле противпожарно возило кое пристигнало за да го изгасне пожарот во средното училиште „Сен Егзипери“. Напаѓачите ги принудиле пожарникарите да го напуштат возилото, по што го запалиле.
Во истиот град, во средното училиште „Виктор Иго“, бил нападнат и повреден директорот. Обвинителството го потврдило нападот, но не соопштило дополнителни детали.
Пожар бил регистриран и во средното училиште „Нелсон Мандела“ во Нант. Заменик-градоначалникот на Нант, Оливие Шато, изјавил дека пожарот бил ставен под контрола и дека нема повредени. Лицата што се наоѓале во објектот биле евакуирани, додека учениците што пристигнувале на настава биле испратени дома.
Поради протестите и блокадите, во кои досега биле повредени повеќе десетици лица, во кабинетот на премиерот Себастиен Лекорну бил одржан кризен состанок. Властите потврдиле дека биле уапсени стотици лица, главно тинејџери.
Во париското предградие Сен Дени, групи млади се собрале пред полициски кордон. Дел од учениците ја обвинуваат полицијата за прекумерна употреба на сила и солзавец.
Владата го осудила насилството за време на дел од протестите, но истовремено порача дека проблемите во средните училишта мора да бидат признаени и решени.
Министерот за внатрешни работи Лоран Нинез изјавил дека на некои места групи учесници организирано се движат од едно до друго училиште со цел да поттикнуваат насилство.
Министерот за образование Едуар Гефреј ги повикал училиштата да организираат настава на далечина доколку демонстрантите го блокираат пристапот до објектите. Тој порача дека насилството не смее да ги спречи учениците да го остварат своето право на образование.
