(Видео) Хаос во Франција: судири со полицијата во повеќе градови, употребени солзавец и водени топови

Насилни судири меѓу демонстрантите и полицијата избувнаа во повеќе француски градови, при што безбедносните сили употребија солзавец и водени топови за да ги растераат насобраните.

Најнапната била ситуацијата во Бордо, каде што маскирани демонстранти фрлале предмети кон полицајците и поставувале барикади на плоштадот „Бурз“, во историскиот центар на градот. Регионалните власти ги повикале граѓаните да ја избегнуваат областа поради судирите.

— реклама —

Инциденти имало и во Париз, каде што мирниот марш, на кој, според информациите, учествувале околу 110.000 луѓе, завршил со судир меѓу полицијата и неколку илјади демонстранти. Кај Порт де Венсен, крајната точка на маршот, полицијата употребила солзавец и водени топови, додека над областа кружел полициски хеликоптер.

— реклама —

Солзавец бил употребен и во Лион и Марсеј, а според француските медиуми, водени топови биле користени и во други делови од земјата. Инциденти биле пријавени и во Ница и Клермон-Феран.

— реклама —

Во Нант биле уапсени шест лица по пријави за вандализам и грабежи. Претходно, локалните власти ги повикале граѓаните да го избегнуваат центарот на градот поради ненајавени собири. Кога дел од демонстрантите се обиделе да ја преминат реката Лоара, наишле на полициски кордон.

Протести се одржале и во Орлеан, каде што околу 13.000 луѓе излегле на улиците против десничарската партија Национален собир (РН), за време на нејзината дводневна конференција.

Лидерката на француската десница, Марин Ле Пен, преку објава на социјалната мрежа Икс, изразила поддршка за полицијата и жандармеријата, ангажирани за одржување на јавниот ред и безбедноста.