(Видео) Најмалку 46 загинати во судир на два брзи воза во Шпанија

Бројот на загинати во тешката железничка несреќа во Шпанија достигна најмалку 46 откако два брзи воза се судрија на пругата меѓу Мадрид и Андалузија. Надлежните предупредуваат дека бројот на жртви може дополнително да се зголеми, додека спасувачките екипи продолжуваат да трагаат по преживеани.

Несреќата се случила нешто по 9 часот наутро, на делницата меѓу Лос Јебенес и Урда, во покраината Толедо. Според првичните информации, брзиот воз АВЕ 2080 удрил во задниот дел на воз на компанијата „Ирио“, кој од засега непознати причини стоел на пругата.

— реклама —

Од силината на ударот вагоните излетале од шините, а два вагона од возот на „Ирио“ се превртеле и се спуштиле по железничкиот насип. Во возот АВЕ имало 397 патници, додека во другиот воз патувале 146 лица, меѓу кои и дете помало од една година.

— реклама —

Патник кој се наоѓал во вториот вагон на возот АВЕ раскажал дека од силниот удар патниците биле исфрлани од седиштата, а околу нив имало повредени и исплашени луѓе. Тој и другите патници им помагале на спасувачите, држејќи ги инфузиите за повредените додека пожарникарите се обидувале да ги извлечат луѓето од потешко оштетениот воз.

— реклама —

Шпанскиот премиер Педро Санчез изјави дека е длабоко потресен од трагедијата и дека е во постојан контакт со министерот за транспорт и регионалните власти. Андалузија испратила возила за итна медицинска помош и специјални логистички возила за интервенција на тешкопристапниот терен.

Поради несреќата, железничкиот сообраќај на брзата линија Мадрид–Андалузија е целосно прекинат до понатамошно известување. Откажани се и планирани политички и предизборни активности, а земјоделските здруженија во Мадрид го откажаа најавениот протест со трактори и одржаа минута молк за загинатите.