(Видео) Протести пред Министерството за транспорт во Мадрид по железничка несреќа во која загинаа најмалку 68 лица

Шпанија прогласи тридневна национална жалост по тешката железничка несреќа во која загинаа најмалку 68 лица, а десетици беа повредени. Спасувачките екипи цела ноќ ги пребарувале оштетените вагони, сечејќи ги металните конструкции во потрага по настраданите. Дел од жртвите сè уште не се идентификувани.

Несреќата се случила во средата наутро, кога брз воз што сообраќал од Мадрид кон Севилја удрил во композиција која стоела на шините. Според шпанскиот министер за транспорт, Оскар Пуенте, возот на приватниот оператор „Ирио“, со 147 патници, бил запрен поради дефект на компјутерскиот систем.

— реклама —

Пуенте изјавил дека контролниот центар во Мадрид, кој работи деноноќно, донел одлука што ја оценил како „несфатлива“, испраќајќи упатство возовите повторно да тргнат без ограничување на брзината. Аудиоснимките од разговорите меѓу диспечерите и машиновозачите, според објавените информации, покажуваат дека брзиот воз добил дозвола да продолжи и покрај тоа што композицијата пред него била во дефект и неподвижна.

Од компанијата „Ирио“ соопштиле дека во нивниот воз удрил одзади воз на државниот оператор „Ренфе“, во кој имало 397 патници. Од силината на ударот, неколку вагони излетале по насипот. Патници сведочеле за повредени луѓе заробени во седиштата, чад во вагоните и пожар во еден од нив.

— реклама —

„Цела Шпанија тагува“, изјавил премиерот Педро Санчес, истакнувајќи дека семејствата се разорени од загубата и дека болката е неизмерна. Тој оценил дека е неприфатливо земјата во текот на една година да се соочи со две тешки железнички несреќи, потсетувајќи на судирот кај Кордоба во јануари, кога загинаа 46 лица.

Трагедијата предизвика и политички реакции. Повеќето партии ги прекинале предизборните кампањи, додека десничарската партија Вокс одлучила да продолжи со активностите. Нејзиниот лидер, Сантијаго Абаскал, изјавил дека жалоста не треба да се користи за замолчување на критиките за состојбата на железничката инфраструктура.

— реклама —

Во Мадрид, околу 1.500 луѓе се собрале пред Министерството за транспорт, барајќи оставки од премиерот Санчес и министерот Пуенте. Полицијата употребила солзавец откако дел од демонстрантите почнале да фрлаат шишиња и сигнални факели. Според објавените информации, нема пријавени повредени или уапсени.

Во меѓувреме, се очекува машиновозачите да го одржат најавениот штрајк во знак на протест и барање за поголема безбедност во железничкиот сообраќај. Синдикатот на машиновозачите порача дека Шпанија има право да знае што се случува со железничката инфраструктура.

Шпанската Цивилна гарда отвори посебни канцеларии во Мадрид, Толедо, Севилја и Кордоба за пријавување исчезнати лица и собирање ДНК-примероци за нивна идентификација. Во близина на местото на несреќата, жителите одржаа бдение и со минута молчење им оддадоа почит на загинатите.

Знамињата на Европската Унија пред институциите во Брисел беа спуштени на половина копје во знак на солидарност со Шпанија. Ова е најтешката железничка несреќа во земјата од 2013 година, кога кај Сантијаго де Компостела загинаа 80 лица.