Турски воен авион F-16 се урна рано утрово за време на лет во западната провинција Баликесир, а во несреќата загина пилотот, соопшти Министерството за национална одбрана на Турција.
Според соопштението, инцидентот се случил на автопатот Измир-Истанбул, а авионот се урнал кратко по полетувањето.
„Во 00:56 часот по локално време, беше изгубен радио-контакт и локација на нашиот ловец F-16, кој полетал од 9-та воздухопловна база во Баликесир. Како резултат на веднаш започнатите операции за пребарување и спасување, утврдено е дека нашиот авион се урнал, а неговите остатоци се пронајдени. Нашиот пилот загина“, се наведува во соопштението на турското министерство, пренесува Анадолија.
Истрагата за причините за несреќата е во тек.
