(Видео) Судири, солзавец и искршени излози на протестите на учениците и студентите во Франција

Голем број средношколци, студенти, наставници и синдикалци излегоа на улиците низ Франција во вторникот, на петтиот национален бран протести поради состојбите во образованието. Организаторите проценуваат дека учествувале 480.000 луѓе, додека Министерството за внатрешни работи соопшти дека изброило 161.500 демонстранти, од кои 41.500 во Париз.

Протестите беа проследени со судири со полицијата, употреба на солзавец и водени топови, кршење излози и оштетување јавен имот. Најсериозни инциденти биле забележани во Париз и Лион, каде што бил нападнат и професионален фотограф.

Во Париз демонстрантите се собрале на Плоштадот Италија, а поворката ја сочинувале ученици, студенти, наставници, синдикалци и здравствени работници. Мирниот почеток бил нарушен кон крајот на маршот, во близина на Плоштадот Вобан. Според француските медиуми, неколку стотици лица облечени во црно фрлале камења и други предмети кон полицијата, а бил искршен и излогот на продавница за вино, од каде што биле изнесени шишиња.

— реклама —

Полицијата употребила солзавец и водени топови за да ја растера толпата. Дел од демонстрантите биле блокирани на Плоштадот Вобан, а полициските кордони им го отежнувале повлекувањето од просторот. Од толпата се слушале скандирања против полицијата и крајната десница, но и француската химна. На плакатите имало пораки за подобро образование и поправеден систем за прием на факултетите.

Во Лион, каде што, според префектурата, протестирале околу 11.000 луѓе, група од 100 до 200 лица оштетувала улична опрема, камери за видеонадзор и излози на банки и осигурителни компании. Учесник во протестот се обидел од непосредна близина да фрли камен кон главата на фотограф, кој успеал да се тргне и не бил повреден.

Според синдикални претставници, при полициските интервенции биле удирани и членови на обезбедувањето на наставничките синдикати, како и родители што учествувале во протестот. Еден наставник бил однесен на итна медицинска помош откако бил удрен со пендрек под окото. Поворката била прекинувана неколкупати, а властите наредиле нејзино растурање пред планираниот крај. Приведени биле девет лица, а четворица полицајци и жандарми биле повредени.

— реклама —

Поддршка за учениците изрази и шведската климатска активистка Грета Тунберг, која во вторникот наутро ги посетила демонстрантите пред средното училиште „Пол Елуар“ во Сен Дени, во предградието на Париз. Таа порача дека светот ги следи нивните активности и ја истакна својата гордост поради младите што излегле да ги бараат своите права.

Протестното движење започна во средината на септември поради незадоволството од условите во училиштата, недостигот од наставници и проблемите со системот „Паркуруп“ за прием на факултетите. Средношколската синдикална организација бара укинување на платформата и издвојување 10 милијарди евра за средните училишта.

— реклама —

Учениците се жалат на лошата состојба на училишните згради и недостигот од наставници по важни предмети, додека се подготвуваат за завршните испити.

Францускиот министер за образование Едуар Жефре соопшти дека во вторникот биле отворени 94,2 отсто од средните училишта, но дека 214 установи биле затворени или блокирани. На протестите од 6 октомври биле регистрирани околу 800 такви училишта. Министерството проценило дека во протестите учествувале 4,98 отсто од наставниците во средното образование, а владата смета дека мобилизацијата слабее пред почетокот на училишниот распуст.

Министерот за внатрешни работи Лоран Нунез изјави дека од почетокот на протестното движење биле повредени повеќе од 200 средношколци, околу 900 полицајци и жандарми и 147 вработени во образованието. Инспекцијата за националната полиција отворила 36 истраги, од кои четири се однесуваат на повреди со трајни последици, а шест на сериозни повреди.

Претседателот на Унијата на средношколски синдикати, Ријад Рани, порача дека младите нема да се откажат и ги повика граѓаните да им се приклучат на протестите против поскапувањето на животот, најавени за сабота, 17 октомври. Тој повика на масовно приклучување кон движењето на „Жолтите елеци“.

Синдикалните и студентските организации треба повторно да разговараат со претставници на министерствата за образование и високо образование. Владата, пак, најави дека дел од предлозите на учениците ќе бидат вклучени во буџетот за 2027 година и дека започнало распоредувањето на 3.000 наставници за замена во училиштата со најголем недостиг од кадар.