Драги Стојанов, татко на загинатиот Томче Стојанов во пожарот во дискотеката „Пулс“ во Кочани, порача дека семејствата на жртвите нема да се откажат од барањето правда и покрај, како што рече, притисоците и заканите со кои се соочуваат.
Тој истакна дека родителите ќе продолжат со својата борба и нема да дозволат да бидат замолчени.
„Ќе продолжиме, ќе се бориме сè додека тече крв во нашите вени. Не можете да нè сопрете. Само ќе ве замолам, немојте да ни се заканувате, немојте да нè уценувате и навредувате, бидејќи ние не се плашиме“, рече Стојанов.
Во своето обраќање, Драги Стојанов нагласи дека болката по загубата на децата е огромна и дека за родителите животот повеќе никогаш нема да биде ист.
„Ние веќе не се радуваме на животот, туку на смртта, затоа што што ќе ни е живот без нашите деца. Нема да престанеме да бараме правда“, порача Драги Стојанов, татко на загинатиот Томче Стојанов во трагедијата во дискотеката „Пулс“ во Кочани.
