Од Левица на социјалните мрежи обвинија дека ветувањата за изградба на илјадници нови паркинг места во Општина Аеродром не се реализирани, а жителите, особено во Ново Лисиче, и натаму се соочуваат со сериозен недостиг од простор за паркирање.
Советникот на Левица во Советот на Општина Аеродром, Михајло Димовски, посочи дека во општинскиот буџет за изградба на паркинзи биле предвидени 300.000 денари, но, како што тврди, досега не е реализиран ниту еден денар.
Според него, населбата дополнително се соочува со зголемен број возила од соседните зони, како и со присуство на товарни возила, додека локалната власт не нуди конкретно решение за проблемот со паркирањето.
Од Левица посочуваат дека на одредени локации, меѓу кои и просторот кај паркот „Авионче“, сѐ уште не е изграден паркинг, поради што граѓаните се принудени да ги паркираат своите возила на зелени површини.
Од партијата прашуваат кога локалната власт предводена од градоначалникот Дејан Митески ќе започне со реализација на предизборните ветувања поврзани со изградбата на нови паркинг места.
