(Видео) Во куќа во Шпанија пронајдени 74 мигранти, меѓу нив и 10 малолетници без придружба

Шпанската полиција пронашла 74 мигранти во куќа во населбата Ел Принсипе, во градот Сеута, каде што живееле во небезбедни и пренатрупани услови. Меѓу нив имало и десет малолетници без придружба, а уапсен е маж осомничен дека предводел криминална група за експлоатација и нелегално префрлање луѓе.

— реклама —

Акцијата била спроведена минатиот вторник, а полицијата за случајот известила денеска, објави „Еуроњуз“.

Истрагата опфаќа сомнежи за организирање нелегална миграција, прекршување на работничките права, физички напади и експлоатација на малолетници. Истражителите пронашле докази дека некои од децата биле физички нападнати, а имале и повреди што одговараат на каснувања од кучиња. Се проверуваат и сомнежите дека децата и возрасните биле принудувани да работат, додека криминалната група ја искористувала нивната ранлива положба.

— реклама —

— реклама —

Во куќата биле пронајдени 54 мажи, 10 жени и 10 малолетници без придружба. Полицијата се сомнева дека објектот служел како привремено сместување за мигрантите додека групата го организирала нивниот нелегален транспорт кон шпанското копно.

Сеута е шпански град во северна Африка, на границата со Мароко, кој се соочува со последиците од мигрантската криза. Според објавените информации, на 30 јули повеќе од 72.000 луѓе влегле од Мароко на шпанска територија во еден ден. Иако повеќето подоцна се вратиле во Мароко, илјадници останале во градот.

Засега не е потврдено дека сите мигранти пронајдени во куќата пристигнале за време на масовното преминување на границата. Истрагата продолжува со цел да се утврдат сите околности и евентуалната вмешаност на други лица.