„Владата на Мицкоски го подготвува теренот за враќање на „Иловица - Штука““, велат од Левица

Левица преку соопштение реагира дека Владата предводена од Христијан Мицкоски, повикувајќи се на почитување на судските одлуки и правната сигурност, повторно го отвора патот за реализација на проектот „Иловица - Штука“, кој со години предизвикува остри реакции во јавноста.

— реклама —

Од партијата оценуваат дека државата нема обврска да ги застапува интересите на мултинационалните рударски компании и предупредуваат дека приватниот економски интерес не смее да се претставува како јавен интерес.

Според Левица, жителите на Струмичко, еколошките организации, научната јавност и земјоделците со години предупредуваат на потенцијалните последици од отворањето на површински рудник за бакар и злато, особено во однос на водните ресурси, земјоделското производство и животната средина.

— реклама —

Од партијата во соопштението посочуваат дека и во техничката документација за проектот се разгледуваат ризиците од појава на киселински рударски дренажи, можни испуштања на метали и потребата од долгорочно управување со ваквите ризици и по затворањето на рудникот.

— реклама —

„Особено загрижува што Владата однапред најавува отпор од локалното население и граѓанските организации, наместо да застане во заштита на јавниот интерес. Државата не смее да биде гарант на корпоративните интереси, туку заштитник на природните богатства и интересите на граѓаните“, велат од Левица.

Од партијата додаваат дека евентуалниот профит од експлоатацијата на златото и бакарот ќе заврши кај инвеститорите и акционерите, додека можните еколошки и социјални последици ќе ги сносат граѓаните.

— реклама —

„Македонија не смее повторно да стане евтина рударска колонија. Водата, плодната земја и здравјето на граѓаните не смеат да бидат жртвувани за профитот на мултинационалните компании“, порачуваат од Левица.