Во Албанија потврден првиот случај на Западнонилска треска

Првиот случај на Западнонилска треска во Албанија во 2026 година е потврден кај 72-годишен маж од Корча, соопшти Институтот за јавно здравје.

Пациентот, жител на градот Корча, моментално се наоѓа во Регионалната болница во Корча, каде што прима соодветен третман. Според информациите објавени од албанските медиуми, мажот бил каснат од комарец додека престојувал во својата градина, каде што поминувал поголем дел од времето.

— реклама —

Откако се појавиле симптоми, тој побарал лекарска помош, а направените тестови потврдиле инфекција со вирусот на Западнонилска треска.

— реклама —

Од почетокот на јануари годинава биле тестирани 30 примероци од сомнителни случаи на инфекција со вирусот на Западен Нил, но сите претходни резултати биле негативни.

Случајот е пријавен и во Европскиот центар за превенција и контрола на болести (ECDC), со што Албанија е додадена на листата на европски земји во кои годинава се регистрирани случаи на Западнонилска треска.

— реклама —

Според податоците на Институтот за јавно здравје, во Италија досега се регистрирани 311 случаи, во Грција 157, а во Македонија 37 случаи на Западнонилска треска.

Во Албанија инфекцијата со вирусот на Западен Нил е регистрирана и во претходните години. Во 2024 година биле потврдени 107 случаи, со дополнителни 50 сомнителни случаи, додека во 2025 година биле регистрирани два потврдени случаи.

Албанскиот Институт за јавно здравје наведува дека биле спроведени активности за дезинсекција во крајбрежните подрачја за време на сезоната на размножување на комарците. Истовремено, општините се задолжени да спроведуваат мерки за дезинсекција и дератизација на своите територии.