(Видео) Во Франција денеска затворени над 400 училишта поради ученичките протести

Повеќе од 400 училишта и други образовни установи во Франција денеска се очекува да останат затворени поради протестите на учениците, кои започнаа поради проблеми во образовниот систем, но на одделни места прераснаа во насилни инциденти.

— реклама —

Францускиот министер за образование Едуар Гефреј синоќа изјави дека според информациите со кои располага, затворени ќе бидат нешто повеќе од 400 училишта и други образовни установи.

Според извор близок до премиерот Себастиен Лекорни, француските разузнавачки служби на кризен состанок во четвртокот известиле дека протестното движење го започнала крајната левица, меѓу кои и членови на партијата „Непокорна Франција“ (LFI). Пратеникот на LFI, Луј Боајар, ја отфрли оваа оценка во изјави за француските медиуми.

— реклама —

Протестите поради недостигот од наставници и дотраените училишни објекти започнаа минатиот месец во областа на Париз, но со нивното ширење низ земјата стануваа сè понасилни. Десетици лица се повредени, а полицијата уапси стотици демонстранти.

— реклама —

Во четвртокот ученици предизвикале пожари во најмалку две средни училишта. Во трето училиште, во јужниот град Марсеј, наставници случајно биле испрскани со бензин, соопштија надлежните.

Во Стразбур, на истокот на Франција, бил запален најмалку еден автомобил, додека во Тулуз, на југозападот на земјата, интервентната полиција се судрила со млади демонстранти.