Водата станува глобален проблем: ЕУ предупредува на суши, миграции и конфликти

Околу четири милијарди луѓе во светот секоја година се соочуваат со сериозен недостиг на вода во период од најмалку еден месец, предупредува Европскиот економски и социјален комитет (ЕЕСК), кој побара итни мерки од Европската Унија за заштита и обновување на водните ресурси.

Според ова советодавно тело на ЕУ, климатските промени, неодржливото користење на водата и промените во намената на земјиштето сè повеќе го нарушуваат природниот воден циклус, со последици врз снабдувањето со храна и вода за пиење, економската стабилност и меѓународната безбедност.

— реклама —

„Сушите, поплавите и нарушените екосистеми го загрозуваат снабдувањето со храна, пристапот до безбедна вода за пиење, работните места и домовите“, соопшти Комитетот.

Од институцијата предупредуваат дека недостигот на вода станува сè позначаен фактор за миграции и конфликти, особено во регионите што со години се соочуваат со долготрајни суши. Најизразени последици се забележуваат во Африка, јужна Азија и Латинска Америка, каде што загубата на изворите на егзистенција дополнително ја зголемува ранливоста на населението.

„Водата ги преминува државните граници преку реките, почвата и атмосферата, што значи дека ниту една земја не може сама да ја обезбеди својата водна иднина“, посочуваат од Комитетот, повикувајќи на поголема прекугранична соработка и заедничко управување со водните ресурси.

— реклама —

Посебно внимание се посветува на таканаречената „зелена вода“, односно дождовницата што се задржува во почвата и преку испарување и растенијата се враќа во атмосферата. Според податоците наведени во документот, таа сочинува околу 60 проценти од слатката вода на копното, а приближно 80 проценти од светското земјоделско земјиште зависи од неа.

Нарушувањето на овој природен процес веќе придонесува за намалување на земјоделските приноси, со што дополнително се загрозува производството на храна.

— реклама —

Европскиот економски и социјален комитет бара Европската комисија и земјите членки да ја постават заштитата на водата меѓу приоритетите на климатската, земјоделската, енергетската и надворешната политика.

Во пресрет на Конференцијата на Обединетите нации за водите, закажана од 8 до 10 декември во Обединетите Арапски Емирати, Комитетот предлага започнување глобална иницијатива за обновување на водниот циклус.

„ЕУ мора да ја искористи својата дипломатска моќ“, порача известувачката на Комитетот за ова прашање, Милена Ангелова.

Меѓу предложените мерки се обновување на мочуриштата, шумите и другите екосистеми што ја задржуваат водата, подобро следење на водните ресурси и развој на системи за рано предупредување од суши и поплави.

Комитетот предлага овие активности да се финансираат и од идниот буџет на ЕУ за периодот од 2028 до 2034 година, со поголема примена на дигитализацијата и вештачката интелигенција. Истовремено, предупредува дека мора да се земе предвид и растечката потрошувачка на вода од центрите за обработка и складирање податоци.