„Време е Тошковски да одговара за хаосот во МВР“, велат од Левица

На денешната собраниска седница на дневен ред е интерпелацијата за министерот за внатрешни работи Панче Тошковски, поднесена од пратеничката група на Левица, која смета дека актуелниот министер треба да понесе политичка одговорност за, како што наведуваат, сериозните пропусти во работењето на Министерството за внатрешни работи.

Левица преку соопштение информира дека интерпелацијата е образложена преку 17 точки, систематизирани во шест тематски области, кои се однесуваат на работата на МВР и одговорноста на министерот.

— реклама —

Меѓу клучните забелешки се посочуваат наводи за саботирање на истраги и несоработка со Јавното обвинителство за гонење организиран криминал и корупција, непостапување во случаи од висок јавен интерес, како и пропусти во откривањето и процесуирањето на сериозни облици на криминал и корупција.

— реклама —

Во интерпелацијата се наведува и селективно постапување на полицијата и примена на двојни стандарди, при што, според Левица, институциите различно реагирале во зависност од политичката или етничката припадност на сторителите.

Пратеничката група го обвинува министерот и за партизација на Министерството за внатрешни работи, тврдејќи дека полицијата се претвора во инструмент за заштита на партиски интереси, наместо да функционира како професионална и непристрасна институција во служба на граѓаните.

— реклама —

Дополнително, во интерпелацијата се наведуваат и сериозни пропусти во постапувањето на полицијата поврзани со трагедијата во Кочани, како и случаи на непостапување во предмети за семејно насилство, фемицид, врсничко насилство и говор на омраза.

— реклама —

Посебен дел од документот се однесува на сомнежи за судир на интереси, адвокатско-тужбени шеми од периодот пред Тошковски да стане министер, како и наводи за сомнителни тендерски постапки и поврзаност со фирми за кои постојат индиции за незаконско работење.

Според Левица, наталожените скандали, институционалните пропусти и, како што велат, континуираното нарушување на законитоста во работењето на МВР претставуваат доволна основа за утврдување политичка одговорност на министерот Панче Тошковски.