Српскиот претседател Александар Вучиќ на социјалните мрежи соопшти дека остварил телефонски разговор со претседателката Гордана Силјановска-Давкова, при што двајцата соговорници ја потврдиле подготвеноста за натамошно унапредување на билатералната соработка и добрососедските односи меѓу Северна Македонија и Србија.
Вучиќ преку објава на Инстаграм информираше дека во разговорот биле разменети мислења за актуелните регионални прашања, како и за можностите за продлабочување на соработката и за посилно поврзување во областите од заеднички интерес.
„Содржинскиот разговор со Гордана Силјановска-Давкова потврди дека меѓу нашите земји постои подготвеност да продолжиме да ги развиваме блиските и пријателски односи. Разменивме мислења за важни регионални прашања, понатамошно унапредување на соработката и можностите за уште посилно поврзување во областите од заеднички интерес“, напиша Вучиќ.
Тој додаде дека Србија останува посветена на зачувувањето на мирот и стабилноста во регионот, како и на јакнењето на соработката со Северна Македонија, оценувајќи дека тоа е во интерес на граѓаните на двете држави и на целиот регион.
Според српскиот претседател, разговорот претставува потврда на заедничката определба на Белград и Скопје за натамошно унапредување на економската соработка, инфраструктурното поврзување и заедничките напори за зачувување на мирот и стабилноста на Балканот.
