Илјадници туристи останаа заглавени на Сицилија поради активноста на вулканот Етна, кој и натаму исфрла облаци пепел по ерупцијата од минатата недела. Поради вулканската активност, воздушниот сообраќај на аеродромот во Катанија е сериозно нарушен.
Аеродромот во Катанија е целосно затворен до утре во 11 часот, а повеќе од 200 летови биле откажани или пренасочени. Сообраќајот е нарушен веќе петти ден, во екот на туристичката сезона.
Патниците се обидуваат да стигнат до аеродромот во Палермо, од каде што можат полесно да продолжат кон меѓународните дестинации. Се проценува дека се погодени околу 30.000 луѓе. Многу туристи морале да го продолжат престојот на Сицилија, додека сместувачките капацитети се целосно исполнети. Дел од патниците ноќта ја поминале и на аеродромот.
Во меѓувреме, вулканот Етна продолжува со интензивна активност. Од петок тој исфрла големи количества пепел и врели карпи, додека од неговите отвори истекуваат и текови на лава.
Според италијанскиот Национален институт за геофизика и вулканологија (INGV), густи текови на лава избиваат од два отвора на надморска височина од 2.360 и 2.750 метри. Во текот на ноќта се отворил и нов отвор на височина од околу 1.900 метри.
Етна е висок повеќе од 3.300 метри и е еден од најактивните вулкани во Европа, поради што неговата активност внимателно се следи.
