Левица преку соопштение обвини дека новиот бран поскапувања на основните прехранбени производи е уште еден доказ за, како што велат, хроничната некадарност на Владата предводена од ВМРО-ДПМНЕ во справувањето со растечките трошоци за живот.
Од партијата посочуваат дека додека граѓаните секојдневно плаќаат поскап леб, брашно, тестенини и други основни производи, власта се повикува на статистички податоци и уверувања дека инфлацијата е под контрола.
„Реалноста во маркетите е сосема поинаква. Секое одење во продавница значи помалку производи за истите пари“, наведуваат од Левица, додавајќи дека токму лебот и печивата забележале најголем раст на цените во мај, што најсилно ги погодува најранливите категории граѓани.
Според партијата, причините не лежат само во глобалните економски движења, туку и во отсуството на сериозна политика за заштита на домашното производство, недоволната контрола на пазарот и недостигот од долгорочна стратегија за намалување на зависноста од увоз.
Левица предлага засилени инспекциски контроли за утврдување на евентуални неоправдани зголемувања на цените, директна поддршка за домашните земјоделци и прехранбената индустрија, формирање државен фонд за интервентни резерви на основни прехранбени производи, како и усогласување на минималната плата со реалниот раст на животните трошоци.
„Граѓаните не живеат од статистики, туку со реални пари купуваат храна и секојдневно сведочат како им се намалува куповната моќ. Време е Владата да понуди конкретни економски мерки наместо оправдувања и ветувања“, порачуваат од Левица.
