„За договорот со „Бехтел и Енка“ ќе се плаќаат милионски кредити - наместо репрограмирање ДПМНЕ го задолжи народот“, велат од Левица

Од Левица преку соопштение обвинија дека Владата продолжува да го финансира проектот со Бехтел и Енка преку нови задолжувања, иако претходно, додека била во опозиција, ВМРО-ДПМНЕ го критикувала договорот како нетранспарентен и штетен за државата.

— реклама —

Според партијата, граѓаните во минатото слушале ветувања дека договорот ќе биде репреговаран, дека ќе се утврди одговорност и ќе се преиспитаат спорните аспекти на проектот, но наместо тоа сега се обезбедуваат нови средства за негова реализација.

Од Левица прашуваат како проект што претходно бил оценуван како штетен и сомнителен, денес повторно добива финансиска поддршка од истите политички структури кои го критикувале.

— реклама —

Во реакцијата се наведува дека проблемот не се сведува само на еден проект, туку на долгогодишната пракса капиталните инвестиции да се реализираат со дополнителни трошоци, анекси и нови задолжувања кои, според нив, на крајот ги плаќаат граѓаните.

— реклама —

„Наместо функционална инфраструктура, добиваме нови долгови. Наместо резултати, добиваме оправдувања“, наведуваат од партијата.

Од Левица оценуваат дека државата заостанува зад соседните земји во привлекувањето инвестиции и развојот на инфраструктурата, предупредувајќи дека континуираното задолжување и политичките пресметки можат дополнително да ја намалат конкурентноста на земјата во регионот.

— реклама —

Партијата смета дека товарот од ваквите политики нема да го сносат политичарите, туку граѓаните, стопанството и идните генерации кои ќе ги враќаат денешните долгови.