Здружение на граѓани „16 март 2025“ реагираше со објава на социјалните мрежи во која остро ги критикува судските одлуки поврзани со кривични дела од областа на злоупотреба на службена должност.
Од здружението посочуваат дека, иако за ваквите дела законската рамка предвидува затворски казни до 10 години, во пракса, како што наведуваат, се изрекуваат условни казни и покрај утврдена одговорност.
Во објавата се наведува дека, според нив, системски пропусти и непостапување со години создале услови за трагични последици со голем број жртви и повредени, при што се изразува незадоволство од начинот на кој се утврдува судска одговорност.
Здружението оценува дека ваквите пресуди ја намалуваат довербата во правосудниот систем и отвораат прашања за неговата ефикасност и доследност во спроведувањето на законите.
Дополнително, во реакцијата се изразува критика и кон процесните случувања во постапките, како што се промени на обвинители и распределба на предмети, кои, според нив, придонесуваат за разводнување на одговорноста.
Од здружението најавуваат дека ќе продолжат да бараат целосна и, како што наведуваат, вистинска правда преку сите расположливи институционални и јавни механизми.
