Од Левица преку соопштение оценуваат дека инфлацијата сериозно го загрозува животниот стандард на граѓаните и обвинуваат дека Владата нема ефикасна стратегија за справување со економската криза.
Во партиското соопштение се наведува дека цените постојано растат, додека платите и пензиите не го следат тој тренд, поради што граѓаните сѐ потешко ги покриваат основните трошоци.
Според партијата, податоците на Државен завод за статистика покажуваат дека инфлацијата во април изнесувала 5,65 проценти во споредба со истиот месец лани, додека храната и безалкохолните пијалоци поскапеле за 8 проценти.
Од Левица тврдат дека во периодот од април 2022 до април 2026 година кумулативната инфлација достигнала 36 проценти, а храната и безалкохолните пијалоци поскапеле за 45,4 проценти.
Партијата оценува дека власта нема суштински план за заштита на стандардот на граѓаните и дека наместо сериозни економски мерки се нудат, како што велат, „импровизации и ПР пораки“.
Од Левица бараат пакет мерки што ќе вклучува замрзнување на цените на основните производи, зголемување на минималната плата согласно реалните трошоци за живот и поголема транспарентност во монетарната и фискалната политика.
