Злоупотреби на боледувања кај полицијата и јавниот сектор, oд 80 контролирани лица, кај дури 29 лица се утврдени неправилности

Фондот за здравствено осигурување на Македонија, по барање на Министерството за внатрешни работи, спроведе контрола на боледувањата кај вработените во МВР, откривајќи сериозни неправилности.

— реклама —

Контролата се однесуваше на 80 лица со вкупно 514 боледувања. Од нив, 258 боледувања траеле до 7 дена, 171 до 15 дена, а 83 боледувања биле 30 или повеќе дена. Најчестите дијагнози биле респираторни заболувања, проблеми со мускулниот систем и дигестивни нарушувања.

Резултатите покажуваат дека кај 29 лица, односно 37%, се утврдени неправилности. Од вкупните 514 боледувања, 100 биле неуредно издадени, што е речиси секое петто боледување.

— реклама —

Контролата опфати 105 приватни здравствени установи, три јавни здравствени установи и три лекарски комисии. Неправилности биле констатирани кај 27 ординации по општа медицина, две по гинекологија, три специјалисти во државното здравство и две лекарски комисии (ПЛК/ВЛК).

— реклама —

Главните прекршоци вклучуваат непочитување на задолжителните дијагностички постапки и надминување на дозволените временски рамки за издавање на боледувања.

За утврдените неправилности веќе се покренати постапки за казни во вкупен износ од околу 1,2 милиони денари. Ова е дел од пошироката акција за засилена контрола во јавниот сектор, со цел да се спречи злоупотреба на системот за боледување, каде надоместоците достигнуваат до 80-100%.