Жена брутално претепана во Автокоманда: маж врз глава и фрлил гајба со стаклени шишиња, таа почнала обилно да крвари

Основното јавно обвинителство Скопје поведе постапка против едно лице за кое постои основано сомнение дека сторило кривично дело „Тешка телесна повреда“ по член 131 од Кривичниот законик.Според обвинителството, настанот се случил на 23 август попладне пред угостителски објект во скопската населба Автокоманда. Жената која имала претходни лични недоразбирања со осомничениот дошла да се сретне со него, по што тој почнал грубо да ја навредува. Во еден момент, осомничениот зел пластична гајба полна со стаклени шишиња и ја удрил по главата, предизвикувајќи ѝ тешки телесни повреди.Жртвата почнала обилно да крвари, но успеала да повика полиција и била пренесена со брза помош во болница, каде лекарите констатирале сериозни повреди.Обвинителството соопшти дека поради начинот на сторување на делото и можноста жртвата повторно да биде изложена на ризик, од судијата на претходна постапка било побарано осомничениот да добие повеќе мерки на претпазливост. Меѓу нив се забрана за приближување или воспоставување контакт со оштетената, привремено одземање на патна исправа и редовно јавување пред службено лице.Случајот дополнително ќе се документира, по што ќе следуваат соодветни правни постапки.

Скопје | пред 5 месеци

Локалните избори ќе бидат поскапи

Тековниот изборен циклус веројатно ќе чини повеќе од претходните, но институциите имаат должност да овозможат учество на сите кандидати и политички субјекти, изјави вчера претседателот на Државната изборна комисија (ДИК), Борис Кондарко, во интервју за Радио Слободна Европа.Тој појасни дека конечната слика ќе биде позната по 13 септември, кога завршува рокот за поднесување кандидатски листи, но ДИК веќе се подготвува за прилагодување на формата и содржината на гласачкото ливче.„Можно е процесот да стане поскап, но ние сме должни да го спроведеме и да обезбедиме еднакви услови за сите,“ нагласи Кондарко.Претседателот на Комисијата посочи дека ДИК има овластувања да носи одлуки и упатства со цел непречено спроведување на изборните дејствија, особено во случај на голем број пријавени листи. Постапката за поднесување кандидатури на независни кандидати и групи избирачи, според него, е усогласена со законските одредби и правилно уредена преку правилник и упатство.Кондарко потсети дека дилемите околу потписите за независни листи се јавиле уште во мај, по одлуката на Уставниот суд, и нагласи дека ДИК не смее да го оневозможи учеството на избирачките групи. „Прашањето е веќе затворено, но учесниците ќе треба да исполнат и други законски услови,“ рече тој.Паралелно, Кондарко оцени дека е неопходен целосно нов Изборен законик, со појасни процедури и јасни правила, вклучувајќи финансирање на партиите, регулација на кампањите и улога на медиумите.До истекот на рокот за поднесување листи, ДИК ќе продолжи со усогласување на техничките аспекти – изглед на гласачкото ливче, распоред на кандидатите и логистика на гласањето – со цел да се обезбеди фер и непречено спроведување на изборите, дури и по цена на повисоки трошоци.

Македонија | пред 5 месеци

Претреси во три општини, таргет се фирми осомничени за криење даноци и злосторничко здружување - се правеле злоупотреби со даноци за нафтени деривати?

Управата за финансиска полиција утрово спроведе координирана акција на повеќе локации во општините Липково, Куманово и Желино. Според официјалните информации, претресите се дел од обемна истрага насочена кон организирана криминална група осомничена за злосторничко здружување, даночно затајување, измама и перење пари.Акцијата е резултат на подолготрајна истражна постапка во која биле прибрани докази за незаконски активности преку повеќе правни лица. Првичните сознанија укажуваат дека станува збор за компании кои работат во сферата на трговија со нафтени деривати.Истрагата се води за сериозен криминален механизам, а според неофицијални информации, штетата од незаконските активности изнесува повеќе од 7 милиони евра.Не е познато колку лица се опфатени со истрагата, ниту на колку точно места се прават претрси од страна на МВР. Детали се очекуваат во текот на денот.

Македонија | пред 5 месеци

Ќе носат пиштоли М17 или пушки М4: Националната гарда во Вашингтон доби дозвола да носи оружје

Гардистите на американската Национална гарда, кои веќе две недели патролираат низ улиците на Вашингтон по налог на претседателот Доналд Трамп, од неделата навечер почнаа да носат оружје, потврдија двајца американски функционери за „Ројтерс“.Според информациите, дел од војниците ќе бидат вооружени со пиштоли М17 или пушки М4, но не е наведено колкумина ќе имаат оружје. Одлуката следува откако минатата недела министерот за одбрана Пит Хегсет даде зелено светло за вооружување на гардистите. Во заедничко соопштение на Командата на Националната гарда за Вашингтон беше нагласено дека употребата на сила е дозволена „само како последна опција и единствено во случај на непосредна закана по живот или тешки повреди“.Трамп најави дека може да ја прошири својата кампања против криминалот и во други градови под раководство на демократите, конкретно споменувајќи ги Чикаго и Балтимор, со можност таму да биде испратена војска.Лидерот на демократите во Претставничкиот дом, Хаким Џефрис, оцени дека претседателот нема уставна основа да ја распореди војската во Чикаго, додека Пентагон веќе започна со изработка на сценарија за евентуална интервенција. Претставници од Министерството за одбрана, кои зборуваа анонимно, нагласија дека станува збор за рутинско планирање без конкретна одлука. Џефрис ги нарече чекорите на Белата куќа „вештачко создавање криза“, потсетувајќи дека бројот на убиства во Чикаго минатата година бил во опаѓање.Слична позиција имаше и гувернерот на Илиноис, демократот Џ.Б. Прикер, кој изјави дека нема потреба од распоредување на Националната гарда.Трамп, сепак, продолжи со критики кон демократските гувернери, меѓу кои и Вес Мур од Мериленд, нагласувајќи дека е подготвен да испрати војска и во Балтимор. Официјалните податоци од таму, пак, покажуваат двоцифрен пад на вооруженото насилство и најмал број убиства во последните пет децении.Иако Трамп тврди дека благодарение на војската и федералните агенти криминалот во Вашингтон е „исчистен“, статистиките укажуваат дека трендот на намалување почнал уште пред неговите мерки. За разлика од американската престолнина, каде што претседателот има директни овластувања, неговата моќ во градови како Чикаго и Балтимор е ограничена.Претседателот се повика на член 12406 од федералниот Закон за вооружени служби, кој дозволува испраќање на Националната гарда во случај на инвазија, немири или потреба од примена на закон. Но, експертите предупредуваат дека секој обид за активирање на оваа одредба во градови управувани од демократите речиси сигурно би отворил правни спорови.

Свет | пред 5 месеци

Украинската армија ја презеде контролата врз Новомихајливка

Украинските вооружени сили соопштија дека успешно ја спровеле операцијата за протерување на руските трупи и воспоставување целосна контрола врз селото Новомихајливка. Акцијата ја реализирале Одделението за активни операции на Одделот за украинска одбрана, специјалната единица „Артан“ и 2. јуришен баталјон од 3. јуришна бригада.Според извештајот, операцијата била изненадувачка за руската армија, а пресретнатите комуникации покажуваат дека непријателот изгубил една чета војници и бил принуден да префрли резерви од други делови на фронтот.Украинските сили велат дека со координираната работа на разузнавачките служби, јуришните единици, тешката техника и беспилотните летала го подобриле својот тактички положај и ја зајакнале одбранбената линија во регионот.„Нашите знамиња се враќаат на своето вистинско место“, порачаа од украинската армија.Со оваа победа, Новомихајливка за првпат по подолго време е под целосна контрола на украинските сили.

Свет | пред 5 месеци

Илон Маск се обидел да го придобие Марк Закерберг за преземање на OpenAI

Илон Маск наводно се обидел да обезбеди поддршка од Марк Закерберг, извршниот директор на Meta, за својата понуда вредна речиси 100 милијарди долари за преземање на OpenAI, покажуваат судските документи.За време на судско испитување, Маск признал дека разговарал со Закерберг за можноста Meta да вложи средства во неговиот план, но првиот човек на Meta не прифатил да учествува.OpenAI од судот побарал да и наложи на Meta да предаде комуникации и документи кои би можеле да ги разјаснат деталите од овие контакти. Од Meta, пак, возвратиле дека барањето е непотребно и дека OpenAI треба да ги добие тие документи директно од Маск и неговата компанија xAI, а не од трета страна.Овој процес е дел од поширокиот правен спор меѓу Маск и OpenAI. Минатата година Маск ја тужеше организацијата тврдејќи дека таа ја напуштила првичната мисија – развој на вештачка интелигенција за општа корист, во корист на профитот. OpenAI возврати со контратужба, а судскиот процес пред порота е закажан за пролетта 2026 година.Случајот дополнително ја засилува вниманието кон судирот меѓу највлијателните личности и компании во областа на вештачката интелигенција, кој би можел да има далекусежни последици врз развојот и контролата на оваа технологија.

Македонија | пред 5 месеци

Путин на четиридневна посета во Кина за средба со Си Џинпинг

Рускиот претседател Владимир Путин оваа недела ќе отпатува на четиридневна посета во Кина каде ќе се сретне со кинескиот претседател Си Џинпинг, објавија руските медиуми.Посетата, која ќе биде најдолгото патување на Путин во странство од 2014 година, ќе вклучува и учество на самитот на Шангајската организација за соработка (SCO). Самитот е предвиден за 31 август, а според медиумите се очекуваат „големи разговори“ со пошироката делегација.На 3 септември во Пекинг ќе се одржат комеморации по повод 80-годишнината од капитулацијата на Јапонија во Втората светска војна. Путин го прифатил личниот повик од Си да присуствува на настанот, кој следува по неговото учество на Денот на победата во Москва во мај.Посетата предизвика шпекулации дека можно е да се случи нова средба помеѓу Путин и американскиот претседател Доналд Трамп, овојпат во Кина. Иако и Москва и Вашингтон не ја потврдија можноста, портпаролот на Кремљ, Дмитриј Песков, во јули изјави дека доколку Трамп се најде таму, „не може да се исклучи иницијатива за состанок“. Се појавија и шпекулации за троен состанок Путин–Трамп–Си, но Кремљ порача дека нема информации за такво сценарио.Овој развој доаѓа во период на засилени меѓународни тензии и обиди на Москва да ја зајакне соработката со Кина, додека паралелно се одржуваат и обиди за посредување меѓу Русија, Украина и Западот.

Свет | пред 5 месеци

Газа во хаос пред новата израелска офанзива - сведоштвата застрашувачки: Кучиња јадат човечки тела

Само пред две години, најголемиот град во Појасот Газа живееше со преполни училници, живи пазари и кафулиња покрај морето. Денес, истиот град лежи во урнатини, разорен од месеци на жестоки израелски напади поради крвавиот упад на Хамас на израелска територија.Според извештај на CNN, нормалниот живот целосно исчезнал по израелската одмазда, а стотици илјади луѓе се препуштени сами на себе во разурнати згради. Храната и водата се ретки, отпадот и отпадните води ги преплавуваат улиците, а воздухот е исполнет со чад од горење пластика и дрво што жителите ги користат за гориво.Малкумина имаат пристап до струја преку импровизирани генератори, а болниците и аптеките практично повеќе не функционираат. Пазарите нудат мал избор на скапи производи, често од опљачкани камиони со хуманитарна помош. Ноќта ја обележуваат вооружени банди и семејства кои самите се вооружуваат за заштита.Сведоштвата се застрашувачки. Мајди Абу Хамди, татко на четири деца, опишува дека прашината од експлозии ги задушува улиците и дека дури и кучињата-скитници подивеале од јадење човечки тела.„Луѓе имаат триесет години, а изгледаат како да имаат седумдесет“, вели тој, посочувајќи дека гладот и сиромаштијата ги исцрпуваат.Хамас, некогаш постојано присутен на улиците, сега е речиси невидлив. Дел од милитантите се повлекле во илегала, но сепак повремено се појавуваат. Во јануари се собраа масовно на јавен плоштад за време на преговорите за прекин на огнот, а неодамна на социјалните мрежи беше објавено видео на групата „Ал Радеа“, која тврди дека погубила лица што соработувале со Израел.Израелската армија планира голема офанзива за преземање на градот, едно од последните упоришта на Хамас. Според израелски извори, за операцијата ќе бидат мобилизирани дополнителни 60.000 резервисти, а цивилите ќе имаат рок од околу два месеци да ја напуштат областа пред нападот. Клучниот симболичен датум што се споменува е 7 октомври, втората годишнина од почетокот на војната.Во меѓународната заедница растат стравувањата за огромен број цивилни жртви. Воените аналитичари предупредуваат дека израелските сили ќе се соочат со тешка задача во урбаната средина на Газа, каде што Хамас веќе воспоставил сложена мрежа на тунели, позната како „метро на Хамас“.Според воениот експерт Алекс Плицас, операцијата е можно да се спроведе, но ќе бара многу војници и долг процес за целосно заземање на територијата. Международните хуманитарни организации повикуваат на итна заштита на цивилното население, но офанзивата изгледа неизбежна.

Свет | пред 5 месеци

Кина истовремено ги проширува термоелектраните и зелените капацитети

Кина во првата половина на 2025 година значително го зголеми капацитетот на термоелектраните на јаглен, и тоа повеќе отколку во кое било споредливо полугодие во последните девет години, иако паралелно бележи и рекордно ширење на обновливи извори на енергија.Според анализата на финскиот Центар за истражување на енергија и чист воздух (CREA), само од јануари до јуни биле приклучени нови електрани на јаглен со вкупен капацитет од 21 гигават. Тоа е највисока бројка за првите шест месеци од една година уште од 2016 година. Очекувањата се дека до крајот на годината вкупниот капацитет ќе надмине 80 гигавати. „И покрај брзата трансформација на енергетскиот систем, изградбата на термоелектрани на јаглен во Кина не покажува знаци на забавување“, наведува CREA.Истовремено, државата интензивно вложува и во зелена енергија. Според проекциите, до крајот на 2025 година капацитетот на фотоволтаични и ветерни електрани ќе се зголеми за повеќе од 500 гигавати.За споредба, Германија во 2024 година додала помалку од 20 гигавати од обновливи извори, со што нејзиниот вкупен капацитет достигнал околу 190 гигавати, според податоците на германската Сојузна агенција за регулатива.Зголемувањето на зелените капацитети веќе има влијание врз намалување на емисиите. Според порталот Carbon Brief, во првата половина на 2025 година вкупните емисии на јаглерод диоксид во Кина биле пониски за еден процент во споредба со истиот период претходната година, додека емисиите само од енергетскиот сектор, кој е најголем извор на стакленички гасови, се намалиле за три проценти.Ситуацијата ја покажува сложената транзиција на Кина – земја која истовремено гради рекордни капацитети за обновлива енергија, но и задржува силна зависност од јагленот како клучен извор за стабилност на електроенергетскиот систем.

Свет | пред 5 месеци

Двајца браќа тинејџери починале во хотел во Истанбул, властите се сомневаат на труење со храна

Двајца малолетни браќа од Холандија беа пронајдени мртви во хотелска соба во Истанбул, а првичните сомнежи се дека станува збор за труење.Холандскиот државјанин Рашид Мохамед Аџуб (57) престојувал во градот заедно со своите синови – 17-годишниот Мохамед Џамил Јусуф и 15-годишниот Мохамед Јаздани. Според турските медиуми, семејството во петокот вечерта вечерало во ресторан во населбата Таксим, но храната јаделе само момчињата, додека таткото не јадел.Следното утро, вработени во хотелот слушнале врева од собата и при влегувањето ги затекнале тинејџерите во безживотна состојба, додека нивниот татко бил во шок и се онесвестил. Итната помош пристигнала на лице место и ја констатирала смртта на децата, а Аџуб бил пренесен во болница.Еден од хотелските работници изјавил дека едното момче лежело на креветот, а другото на подот и дека медицинските екипи можеле само да ги прогласат за починати.Полицијата отвори истрага за причините за трагедијата, со цел да се утврди дали станува збор за труење со храна. Според државната агенција „Анадолу“, таткото во болница сведочел дека неговите синови јаделе во ресторан во Таксим, по што по враќањето во хотелот нагло им се слошило.Браќата со таткото биле на одмор во Турција. Турските медиуми потсетуваат дека во земјата чести се вакви опасни и понекогаш фатални случаи, особено кога е поврзан алкохол. По Нова година, во Истанбул имаше масовно труење во кое починаа 34 лица, а во мај властите објавија дека повеќе од 100 луѓе во Анкара починале во период од неколку месеци по консумирање домашно произведен алкохол.

пред 5 месеци

Украински дронови предизвикаа принудно слетување на авион со руски туристи во Естонија

Патнички авион со руски туристи кој летал од египетското летувалиште Шарм ел Шеик кон Санкт Петербург бил принуден да слета во Талин, Естонија, поради украински напади со дронови врз руска инфраструктура.Според информациите од аеродромот во Талин, летот бил пренасочен бидејќи аеродромот Пулково во Санкт Петербург бил привремено затворен. „Заради затворањето, авионот беше пренасочен во Талин“, изјави Маргот Холц, раководителка за комуникации и маркетинг.Авионот, со кој управувала египетската авиокомпанија AlMasria Universal Airlines, слетал во Талин во 5:33 часот наутро по локално време. Патувањето кон Санкт Петербург било продолжено речиси шест часа подоцна. За време на престојот, патниците и екипажот не смееле да го напуштат авионот.Нападите се случиле во ноќта меѓу сабота и недела, кога украински дронови погодиле терминал за течен природен гас во Ленинградската област и нафтена рафинерија во Самарската област. Извор од украинската служба за безбедност (СБУ) потврдил дека зад нападот на гасниот терминал стојат украинските разузнавачки структури.Овие удари се дел од пошироката стратегија на Украина за нарушување на руската логистика далеку зад линијата на фронтот. Според украинските и западни извори, само во првите месеци од 2025 година ваквите напади довеле до тоа Русија да прекине со работа на своите аеродроми повеќе од 200 пати.Настанот дополнително ја покажува ранливоста на руската инфраструктура на долг дострел и влијанието на конфликтот врз цивилниот воздушен сообраќај во регионот.

Свет | пред 5 месеци

(Видео) Рама безмилосен, продолжува да ги урива дивоградбите во Албанија, овој пат на ред беше Драч!

Албанскиот премиер, Еди Рама, објави ново видео на Фејсбук од масовното уривање на дивоградби ширум Албанија, овој пат од Драч.Рама имаше само кратка порака во својата објава „ЕУ“.Акцијата опфаќа отстранување времени објекти и огради поставени на тротоари и на јавни простори, а општините се задолжени да ги урнат сите градби на оние што не ги почитуваат официјалните одлуки.Државата ја претстави и апликацијата „Мој јавен простор“, преку која граѓаните можат директно да пријават узурпација на јавен простор, со што институциите ќе имаат побрз пристап до информации и ќе реагираат поефикасно.

Свет | пред 5 месеци

Дисциплинска постапка против ФК Шкупи поради инцидентот на натпреварот со Брегалница

Фудбалската федерација на Македонија (ФФМ) вчера попладен излезе со остра реакција поради случувањата на натпреварот од младинските категории меѓу Брегалница и Шкупи, кога родители на гостинските играчи влегоа на терен и физички нападнаа дел од домашните фудбалери.„Ова однесување е крајно неприфатливо и претставува сериозно нарушување на спортскиот дух, фер-плејот и безбедноста на младите играчи. Особено е вознемирувачки фактот што едно дете доби тешки повреди, вклучувајќи скршеници, како последица од нападот“, се наведува во соопштението на ФФМ.Од Федерацијата најавија дека надлежните органи ќе поведат дисциплинска постапка и ќе преземат соодветни мерки против одговорните.„Дисциплинска постапка ќе биде поведена против ФК Шкупи и сите инволвирани лица, со цел да не се дозволи вакво недолично и опасно однесување да се повтори. ФФМ уште еднаш потсетува дека насилството на спортските терени е недозволиво и ќе биде строго санкционирано. Компромис за насилство, без разлика од кого и на кое ниво, нема да има“, стои во реакцијата.

Македонија | пред 5 месеци

Филипче: Неспособноста на Мицкоски да испорача резултати го турка повторно во старите измислени сценарија за хаос

Премиерот Христијан Мицковски повторно покажува целосна неспособност и менаџирање на државата. И денеска и една година наназад за политичкиот неуспех на Мицковски криви се СДСМ и ДУИ, рече претседателот на СДСМ Венко Филипче во изјава за Телма телевизија. Филипче обвинувањата на премиерот Мицковски дека СДСМ и ДУИ имаат тајни планови за хаос и политички малверзации за изборите ја оценува како резултат на немањето капацитет да се води државата.„Иако пред повеќе месеци Уставниот суд ја донесе одлуката и го укина телото од изборниот закон од процентот на потребни потписи да се кандидираат независните листи власта чекаше до последниот момент да даде предлог на закон откако изборите беа распишани. За жал не направија ништо ниту да се обидат тој закон за помине во Парламентот, не дојдоа сите пратеници од коалицијата од ВЛЕН од дел од националностите. Не се ни обидоа да го обезбедат бадентеровото мнозинство иако ние како СДСМ дадовме поддршка за тој процес. Излеговме во пресрет и ја подржавме и го поддржавме и предлогот да се намали цензусот на 0,5% во интерес на тоа да граѓаните ја изразат својата волја преку независните листи да може во еден јасно структуриран процес тие да се кандидираат и да ги дадат своите кандидати. За жал власта целосно потфрли“, рече ФилипчеЦелосно одговорен за оваа работа Филипче го смета премиерот Мицковски и владејачката коалиција кои дозволија отворање можности да се злоупотребат изборите во нивна корист, да го скријат очигледното губење огромен број на гласови.

Македонија | пред 5 месеци

(Видео) Двајца малолетници во болница: детали за упадот на натпреварот Брегалница-Штип

На игралиштето „Бело Брдо“ во Штип, за време на младински фудбалски натпревар меѓу екипите на ФК „Брегалница“ од Штип и ФК „Шкупи“ од Скопје, се случил тежок инцидент во кој родител на играч од скопскиот тим физички нападнал двајца малолетни фудбалери од домашната екипа.Како што информира Министерството за внатрешни работи, лицето А.А. (43) од Скопје, родител на фудбалер од ФК „Шкупи“, влегол на теренот и им нанел повреди на двајцата малолетници. Тие биле веднаш пренесени во Клиничката болница во Штип каде им е укажана медицинска помош.Напаѓачот бил лишен од слобода од страна на полициските службеници на СВР Штип, а за настанот бил известен и јавен обвинител. Надлежните органи преземаат мерки за целосно расчистување на случајот, по што ќе следуваат соодветни кривични пријави.Настанот предизвика згрозување кај јавноста, а се очекува дополнителна реакција од спортските институции и клубовите вклучени во натпреварот.

Македонија | пред 5 месеци

Пецаков: Меѓународната и меѓугранична соработка директно придонесуваат во туризмот како основна гранка на развој на Охрид

Во однос на меѓународната соработката, а и меѓуграничната соработка, придобивките би ги поделил во два дела. Едната придобивка би ја поврзал директно со туризмот како една основна гранка на развој на самиот град, а втората се сите оние проекти, без разлика дали станува збор за инфраструктура или некакво опремување на медицински центри или опремување на јавните претпријатија со соодветна опрема, рече Кирил Пецаков, градоначалник на општина Охрид на денешниот настан Саем-Отчет, земајќи збор на панел-дискусијата на тема „Меѓународна соработка за развиени општини“.Пецаков истакна дека она што се работи со туризмот и учеството на саемите за туризам, се гледа како директна придобивка, посебно во зимскиот период, кога станува збор за новогодишните празници, но и околу велигденските и првомајските празници, каде огромен број на туристи, пред сè од соседството, го поминуваат времето во Охрид.„За нас, таа меѓународна соработка на тие саеми, претставува директна придобивка за туризмот и локалниот развој. Заедно со тур операторите но и сите други што нудат некакви туристички услуги се вмрежуваат и се создава позитивен придонес, посебно во текот на летниот период каде што се создаваат тие пакети, настрана од тоа што претставува новогодишен период. Ние како град, создавајќи и творејќи, токму во делот на туризмот, како што придобивките се најголеми и ги гледаме на одреден начин, но она што претставува број на ноќевања и собирањето на туристичка такса каде што годинава сериозно предничиме“, рече Пецаков.Пецаков додаде дека соработката со Владата за воведување на нови авиолинии од охридскиот аеродромот значително придонесоа за дополнителен развој на туризмот во Охрид и целиот регион.

Македонија | пред 5 месеци

Мицкоски: ДУИ ако не е на власт зборува за етничка поларизација, тезата им е погрешна, кога беа на власт имаше само многу криминал

На денешниот Саем-Отчет по повод „4 години работа за тебе“ се обрати претседателот на ВМРО-ДПМНЕ Христијан Мицкоски, кој на самиот почеток ги отфрли сите обвинувања за етничка нееднаквост од страна на ДУИ и истакна дека ДУИ означува криминал, неспособност и корупција, како и дека тезите се неконструктивни со што приложи докази за финансиската поддршка од страна на Владата предводена од ВМРО-ДПМНЕ кон општините кои ги предводат градоначалници токму од ДУИ.„Нивната улога во Владата значи многу криминал, многу неработа, многу неспособност, многу корупција, и сега тие ставаат знак на еднаквост помеѓу сите овие епитети коишто го има нивното учество во Владата и етничката поларизација, доколку тие не се тогаш тоа било етничка поларизација, мислам дека таа теза им е погрешна. Еве на пример да речеме ако ги гледаме бројките ќе го споменам Кичево. Кичево градоначалник е Фатмир Дехари од ДУИ, во првиот повик скоро 56 милиони денари, проекти финансирани од оваа Влада, во вториот повик скоро 330 милиони денари, или вкупно 385 милиони денари за 16 проекти, тоа е повеќе од 6 милиони евра. Струга на пример, градоначалник е од ДУИ господинот Рамиз Мерко којшто е на листата на санкции на САД, во првиот повик има еден проект којшто е околу 135 милиони денари, вториот повик има 5 проекти вредни 307 милиони денари или вкупно 443 милиони денари. Сарај, во вториот повик имаме 5 проекти од близу 320 милиони денари, коишто оваа Влада ги обезбедила за општина во којашто градоначалник е од редовите на ДУИ“, објасни претседателот Мицкоски.Мицкоски исто така направи јасна дистинкција за време на владеењето на СДС и ДУИ кои не финансирале ниту еден проект во општините каде што се градоначалници од редовите на ВМРО-ДПМНЕ.„Доколку одиме назад и доколку ги анализираме првите три години на градоначалниците од ВМРО-ДПМНЕ дали некој од нив ќе се сети на проект којшто е финансиран од владата на СДС и ДУИ, одговорот е ни еден. Повеќе од 40 општини не добија буквално ниту еден проект којшто го финансираше таа влада. Јас навистина ги отфрлам како неконструктивни и пораки коишто припаѓаат на минатиот век, навистина жалам што нереформираното, криминално и коруптивно ДУИ сè уште живее во тие години, и уште мисли дека со таков тип на пораки ќе придобие симпатии во јавноста мислејќи дека ако се радикализира, мислам дека грешат и тоа ќе го видат на локалните избори коишто ќе се случат за помалку од два месеци“, дециден е претседателот Мицкоски.

Македонија | пред 5 месеци

(Видео) Инцидент на фудбалски натпревар Брегалница-Шкупи: родители влетале на терен да се пресметуваат

Во текот на натпреварот меѓу младинските фудбалски екипи (генерации 2009/2010) на Брегалница и Шкупи, на теренот Бело Брдо во Штип избувнала насилна тепачка кога родители на екипата противник влегле и имале обид за пресметка.Сцената на нападот е снимена и во јавноста кружи видео материјал. Според досегашните извештаи, неофицијално, има повредени.Деталите околу случувањето, како и официјалните наод од истрагата, се очекуваат од МВР. Добивањето на потполно разгледување на видеоматеријалот и изјавите на очевидци ќе бидат клучни за целосно утврдување на случајот.

Спорт | пред 5 месеци

Во возило со француски таблици превезувани мигранти - возачот избегал, а 15 лица се пренесени во транзитен центар

На 24 август 2025 година околу 00:30 часот на регионалниот пат Богданци–Гевгелија, во близина на местото викано „Македонија Пат“, полициски службеници од Полициската станица за граничен надзор и граничен премин Богородица забележале патничко возило „Мерцедес“ со француски национални ознаки кое превезувало мигранти.Според информациите, возилото не застанало на даден знак за запирање од полицијата, но набргу било запрено. Возачот го напуштил местото и се дал во бегство.При преглед на возилото, полициските службеници пронашле 15 мигранти – 12 од Египет и три од Сирија. Лицата биле пренесени во Прифатно-транзитниот центар „Винојуг“ во Гевгелија.Од Министерството за внатрешни работи информираат дека се преземаат мерки за целосно расчистување на случајот и за пронаоѓање на возачот.

Македонија | пред 5 месеци

Таксист натепан пред ресторан во Ѓорче Петров

На 23 август 2025 година во 23:15 часот во СВР Скопје, 41-годишниот Ѓ.П. од Скопје пријавил дека вечерта околу 22:40 часот пред угостителски објект на подрачјето на Ѓорче Петров, вработен во такси-компанија бил физички нападнат.Според пријавата, нападот се случил по претходна расправија со патник во неговото возило, кој заедно со своите пријатели физички го нападнал таксистот.Од Министерството за внатрешни работи информираат дека се преземаат мерки за целосно расчистување и документирање на случајот.

Скопје | пред 5 месеци

Во бесознание бил донесен во Клинички и починал - се испитува причината за смртта на Унгарец

На 23 август 2025 година во СВР Скопје било пријавено дека во Комплекс клиники „Мајка Тереза“ бил донесен во бесознание 61-годишниот Е.М. од Унгарија, кој набрзо починал.Според пријавата, на улицата „11 Март“ во Скопје на починатиот му се слошило, по што бил пренесен во болницата, каде лекарите констатирале смрт.По наредба на јавен обвинител, телото на починатиот е предадено на обдукција, информираат од Министерството за внатрешни работи.

Скопје | пред 5 месеци

(Видео) Експлозија во позната продавница за играчки во Москва – најмалку едно загинато лице

Најмалку едно лице загина во експлозија на плинска боца во една од најпознатите продавници за играчки во Москва, јавуваат руските државни новински агенции.Инцидентот се случил во Сепшалната детска продавница, позната со децении меѓу Русите под името „Детски свет“, која се наоѓа на плоштадот Љубјанка – во непосредна близина на седиштето на Федералната служба за безбедност (ФСБ), наследник на поранешниот КГБ.Целата зграда, каде покрај продавницата за играчки има и бројни ресторани, дуќани и кино, веднаш била евакуирана. Според првичните неофицијални информации, објавени на Телеграм каналот „Mash“, експлодирала боца со хелиум.Истражните органи во Москва работат на утврдување на околностите околу несреќата и причините што довеле до експлозијата.

Свет | пред 5 месеци

Ноќеска уапсени тројца бозачи во Кичево и Охрид

На 23 август 2025 година, околу 12:20 часот, на магистралниот пат А2 во Кичево, полициските службеници од ОВР Кичево го запреле возачот Н.Ц. (30) од Кичево, кој управувал патничко возило „БМВ“ со кичевски регистарски ознаки. При контрола било утврдено дека возел со 125 километри на час во населено место каде што ограничувањето е 50 километри на час. Возачот веднаш бил исклучен од сообраќај и задржан во полициска станица.Истиот ден, на 24 август во 00:30 часот, на булевар „Туристичка“ во Охрид, полициските службеници го лишиле од слобода Ѓ.Ѓ. (30) од Охрид. Тој управувал патничко возило „Опел“ со скопски регистарски таблички и по тестирање било утврдено дека имал 1,62 промили алкохол во крвта.Нешто подоцна, околу 02:51 часот, на улицата „Питу Гули“ во Охрид, полициските службеници запреле возило „Сузуки“ со скопски регистарски ознаки, управувано од Т.С. (45) од Скопје. Кај него било измерено присуство од 1,51 промил алкохол во крвта.Од МВР соопштија дека по целосно документирање на случаите, против сите тројца ќе бидат поднесени соодветни кривични пријави за „безобѕирно управување со моторно возило“ согласно член 297-а од Кривичниот законик.

Македонија | пред 5 месеци

Пресметка меѓу Апасиев и Петрушевски: размена на остри критики пред изборите

Лидерот на Левица, Димитар Апасиев, со објава на социјалните мрежи го нападна претседателот на ВМРО-ДПМНЕ, Христијан Мицкоски, велејќи дека има „мањак од 100-150.000 гласа“ од последните избори и додавајќи дека „ароганцијата е автодеструктивна на долг рок“. Апасиев порача дека Мицкоски ќе зажали за ваквото однесување и најави дека изборите се ближат.На ова реагираше пратеникот на ВМРО-ДПМНЕ, Бране Петрушевски, кој жестоко возврати на Апасиев. Тој му порача дека како универзитетски професор треба да знае дека локални избори не се споредуваат со парламентарни, туку со претходни локални избори.„Наместо да броиш гласови на ВМРО-ДПМНЕ, гледај си ја својата партија, бидејќи ти си најголемиот хендикеп на Левица. Во ваква ситуација, кога СДСМ е целосно растурена партија со криминален багаж, вистинска мајсторија е Левица да се бори за пет проценти поддршка“, изјави Петрушевски.Петрушевски оцени дека борбата на Левица се сведува на тоа да обезбеди минимално присуство во неколку општински совети, а најголемиот проблем на Апасиев, според него, е маргиналноста и искривената лична перцепција.Оваа размена на обвинувања уште еднаш ја потврдува напнатата атмосфера пред претстојните локални избори, каде што меѓусебните пресметки на лидерите на опозицијата и помалите партии стануваат сè поостри.

Коментари | пред 5 месеци

Шукова го нападна Ѓорѓиевски - почнаа предизборните пресметки за гласови

Кандидатката за градоначалничка на Град Скопје, Каја Шукова, денеска на прес-конференција остро ја критикуваше работата на локалната власт предводена од ВМРО-ДПМНЕ, оценувајќи дека последните четири години биле период на хаос, корупција и целосно игнорирање на интересите на граѓаните.„Граѓаните точно знаат кој го доведе Скопје во оваа состојба. Никогаш градот не бил подалеку од своите граѓани. Наместо одговорно управување, Скопје стана заложник на партиските интереси и на пресметките на ВМРО-ДПМНЕ. Денес секоја улица и секое маало сведочат за нивниот неуспех“, рече Шукова.Таа потсети дека Скопје се соочува со целосно уништен јавен превоз, преполни контејнери и нефункционален систем за чистење, како и со урбанистички хаос и криминални дивоградби. „Културниот живот и урбаниот дух на градот се уништени. Наместо вистински решенија, добивме застој и распаѓање“, додаде кандидатката.Шукова го обвини противкандидатот на ВМРО-ДПМНЕ, Орце Ѓорѓиевски, дека отворено го брани урбанистичкото дивеење во Чаир и дека ја продолжува истата политика на бизнис-интереси на штета на граѓаните. „Скопје не може да издржи уште еден градоначалник кој ќе работи за профитот на владејачката елита. Градот е за живеење, а не за партиска каса“, истакна таа.Најавувајќи дека по 19 октомври Скопје мора да добие вистинска промена, Шукова порача дека нејзината визија е град кој обединува, нуди чиста и културна средина и се води од интересите на граѓаните, а не на партиите. „Скопјани заслужуваат чесен градоначалник со визија и план, кој ќе донесе решенија, а не нови разочарувања“, заклучи таа.

Скопје | пред 5 месеци