Осум сомнителни кардиохируршки интервенции под лупа – Министерството најави вонреден надзор

Министерството за здравство денеска информира дека до Интерната комисија се доставени медицински досиеја за осум случаи поврзани со можни неправилности кај кардиохируршки и кардиолошки интервенции. Истовремено, до Лекарската комора е побаран вонреден стручен надзор.Министерот Азир Алиу нагласи дека предметите не се резултат на поединечни претставки од пациенти, туку биле доставени од една јавна здравствена установа. „Комисијата ќе почне со работа веќе утре,“ рече Алиу.Проблемот доби на тежина по јавните сомнежи што ги изнесе кардиологот Сашко Кедев – дека во одредени приватни болници се правеле непотребни интервенции, мотивирани од профит, меѓу кои и стентирања и отворања на граден кош. Тие тврдења ја натераа државата на 21 август да формира специјална комисија со експерти од Словенија, Италија и Австрија, задолжена да изврши ревизија и во јавниот и во приватниот сектор.Првично, директорот на Фондот за здравствено осигурување, Сашо Клековски, минатата недела изјави дека до тогаш не се поднесени пријави од пациенти и ги охрабри граѓаните да реагираат доколку имаат сомнеж. Со денешната информација, за првпат институционално се доставуваат случаи за контрола.Според Министерството, Интерната комисија ќе работи по методологија заснована на меѓународни стандарди и медицински докази, а Лекарската комора паралелно ќе спроведе стручен надзор. Планот на државата е примерочно да се провери најмалку 10 отсто од кардиолошките интервенции извршени во последните години.Податоците од Министерството покажуваат дека во 2023 и 2024 годишно се изведувале по 5–6 илјади кардиолошки интервенции, а само во првите месеци од 2025 се регистрирани повеќе од 5.700, што ја прави ревизијата особено значајна и за јавните пари и за довербата на пациентите.На новинарско прашање околу застојот на дел од операциите, министерот Алиу одговори дека проблемот е предизвикан од недостиг на медицински кадар во клиниките во Скопје. Тој најави билатерален договор со Словенија, со кој тимови од таму ќе доаѓаат на ротации од 3 до 6 месеци, со цел паралелно да се изведуваат интервенции и да се разменуваат знаења. „Во моментов, операциите на Кардиохирургија се многу ограничени,“ додаде Алиу.

Македонија | пред 8 месеци

Петровска: АНБ веднаш може да ја декласифицира документацијата, законот е јасен

Пратеничката на СДСМ, Славјанка Петровска, денеска порача дека е неопходна итна декласификација на целата документација поврзана со случајот во Агенцијата за национална безбедност (АНБ), кој, како што рече, власта се обидува да го претстави како скандал.„Декласификацијата е чекор кон вистината, а не кон манипулацијата. Таа ќе ги даде одговорите на прашањата кои изминативе денови се отворија, а власта одбегнува да ги даде криејќи се зад класифицирани документи,“ истакна Петровска.Таа потсети дека за декласификација не е потребна судска постапка, спротивно на тврдењата од АНБ. „Законот за класифицирани информации јасно вели – оној што класифицира, тој и декласифицира. Според член 14, промена на степенот на класификацијата врши создавачот. Дополнително, член 20 предвидува дека информација со класификација не се смета за класифицирана ако со неа се прикрива кривично дело, злоупотреба на функцијата или друг незаконски акт. Ако власта тврди дека имало незаконско работење, тогаш овој член овозможува веднаш, без одлагање, да се направи декласификација,“ објасни Петровска.Како втор чекор таа го посочи итното свикување на Комисијата за надзор над работата на АНБ. „Пратениците кои сме дел од Комисијата мораме да извршиме увид во документацијата што ќе биде декласифицирана и потоа да ја информираме јавноста. Со тоа ќе се надмине и пречката околу безбедносниот сертификат на претседателот на Комисијата. Со ваков пристап брзо ќе се расчисти маглата која ДПМНЕ ја пушта за да ги покрие досегашните скандали и да создаде алиби за идејата за спојување на АНБ и АР,“ рече таа.Во однос на случајот, и ВМРО-ДПМНЕ вчера побара итно да се закаже седница на собраниската Комисија за надзор на работата на АНБ и АР, по информациите за незаконско прислушување во периодот од 2019 до 2024 година.Пратеникот Љупчо Пренџов, член на Комисијата, побара од претседателот Скендер Реџепи да закаже седница на која ќе се утврди термин за официјална посета на АНБ и детално разгледување на состојбата. Но, Реџепи одби да свика седница со образложение дека е дискриминиран и дека не може да учествува, бидејќи сè уште нема добиено безбедносен сертификат, за кој поднел барање кон крајот на минатата година.

Македонија | пред 8 месеци

Шукова: Го повикувам Ѓоргиевски на дуел, Вардариште е резултат на неспособноста на ВМРО-ДПМНЕ

Кандидатката на СДСМ за градоначалничка на Скопје, Каја Шукова, обвини дека ВМРО-ДПМНЕ со години ја игнорирале својата надлежност и обврска за решавање на проблемот со Вардариште, нарекувајќи го случајот „екоцид“.„Доста беше бегање од одговорност. Законот е јасен – отпадот е локална надлежност. ВМРО-ДПМНЕ четири години ја игнорираа својата обврска да го решат овој проблем,“ изјави Шукова.Таа посочи дека градоначалниците се директно одговорни за управување со отпадот, јавната чистота, селекција и транспорт на отпадот, како и реализација на проекти и задолжителна соработка со други општини и Градот Скопје.„Орце Ѓоргиевски и ВМРО-ДПМНЕ или го немаат прочитано законот за управување со отпад, или свесно го игнорираат за да ја префрлат вината кога јас бев министер за животна средина. Тоа само зборува колку Ѓоргиевски е неук, а сака да раководи со Скопје,“ рече Шукова.Таа додаде дека Вардариште денес изгледа како „црна еколошка дупка“ поради неработењето на градската администрација и, како што рече, неспособноста на ВМРО-ДПМНЕ и градоначалничката Данела Арсовска.„Јас и СДСМ знаеме како да го решиме Вардариште – со итно оградување, 24-часовен надзор, расчистување и забрана за пристап, а потоа изградба на затворена, еколошка претоварна станица со систем за селекција, контрола и транспарентност,“ истакна таа.Шукова го повика својот противкандидат, Орце Ѓоргиевски, на јавен дуел за Вардариште. „Нека ги донесе сите негови ‘аргументи’ дека од Вардариште ќе направи парк. Јас ќе ги донесам фактите, законите и резултатите. Граѓаните ќе судат кој има решение, а кој има само празни ветувања и пропаганда,“ порача кандидатката на СДСМ.

Скопје | пред 8 месеци

Приведени двајца дилери со 100 грама кокаин кај Валандово – одреден притвор од 30 дена

Полицијата уапси двајца мажи од Прилеп и Кавадарци откако при контрола на возило кај Валандово кај едниот бил пронајден кокаин од околу 100 грама. СВР Струмица поднесе кривична пријава за „неовластено производство и пуштање во промет на наркотични дроги“, а судот во Гевгелија им одреди мерка притвор од по 30 дена.-СВР Струмица, до Основното јавно обвинителство Гевгелија, поднесе кривична пријава против А.К.(27) од Кавадарци, со престој во Прилеп и против С.Р.(30) од Прилеп поради постоење основи на сомнение дека сториле кривично дело „неовластено производство и пуштање во промет на наркотични дроги, психотропни супстанци и прекурсори“ по член 215 од Кривичниот закон.На 02.09.2025 на крстосница Валандово-село Чалакли, полициски службеници од СВР Струмица и ОВР Валандово извршиле претрес на патничко возило „ауди“ со прилепски регистарски ознаки и на лицата кои го управувал С.Р., а сопатник бил А.К., при што кај А.К. била пронајдена бела грутчеста материја.Лицата биле лишени од слобода и задржани во Полициската станица Струмица, каде во службен разговор А.К. признал дека белата грутчеста материја пронајдена кај него е кокаин со тежина од околу 100 грама.Во врска со настанот, во текот на вчерашниот ден биле извршени претреси и на неколку локации на подрачјето на Прилеп, при што биле пронајдени предмети за кои постои сомнение дека се поврзани со кривичното дело.А.К. и С.Р. биле изведени пред судија од Основен суд Гевгелија, кој им определил мерка притвор во траење од по 30 дена, информира МВР.

Македонија | пред 8 месеци

Визер ја враќа линијата до Будимпешта - ќе има шест авиони во Скопје и 13 нови линии

Авиокомпанијата Wizz Air, најголемиот превозник во Македонија, ќе го засили своето присуство со додавање на уште еден авион во базата во Скопје и отворање на 13 нови линии од земјата.Од компанијата соопштија дека со шестиот авион, кој ќе биде стациониран во Скопје, до крајот на годината ќе се изврши и модернизација на флотата со најновата генерација Airbus A321neo.Експанзијата следи по успешното учество на Wizz Air на јавниот тендер, што и овозможи дополнителни инвестиции во македонскиот авијациски сектор. Во рамки на новата програма се додаваат пет нови линии – од Скопје до Будимпешта и Неапол, како и од Охрид до Милано, Катовице и Вроцлав, заедно со веќе најавените дестинации за оваа година.Со новите рути од аеродромите во Скопје и Охрид, управувани од ТАВ Македонија, авиокомпанијата ќе ја поврзува државата со вкупно 41 дестинација во 17 европски земји.Билетите за директните линии веќе се достапни преку официјалната веб-страница на Wizz Air и мобилната апликација. Со воведувањето на модерните Airbus A321neo, компанијата најавува и зголемување на капацитетот на седишта за 55 отсто.

Македонија | пред 8 месеци

Османи: Одлучуваме дали државата ќе остане на европскиот пат или ќе биде под влијание на српско-руската орбита

Кандидатот за градоначалник на Чаир, Бујар Османи, предупреди дека земјата е исправена пред сериозна закана да се врати под влијание на српско-руската орбита, надвор од европските вредности.„Тоа е една мрачна зона каде што нема демократија, туку авторитарност и понижување. Ако дозволиме тоа да се случи, ниту историјата ниту нашите деца нема да ни го простат молкот,“ порача Османи.Тој нагласи дека Албанците, но и државата во целина, се соочуваат со драматична историска ретроградност, како резултат на актуелната власт која, според него, го негира државотворниот концепт на Албанците.„Ни се ускратува и правото на јазикот – албанскиот јазик исчезна од институциите и официјалните документи. Затоа 19 октомври не се само избори за Чаир, туку одлука дали ќе прифатиме држава изолирана од Европската унија,“ изјави Османи.Тој додаде дека иако анкетите покажуваат пораз на коалицијата „Вреди“ со резултат три спрема еден, тоа не е суштината на овие избори. „19 октомври е единствената шанса – не за да ја победиме ‘Вреди’, тоа веќе го покажуваат истражувањата, туку за да спречиме создавање нова ‘Вреди’, за да не се уништи идејата дека Албанците се државотворен народ. Ако не ја сопреме таа идеја во корен, ништо не сме направиле,“ порача Османи.

Скопје | пред 8 месеци

(Фото) Прилепчанец фатен со над 32 килограми марихуана на патот Битола–Прилеп

Основното јавно обвинителство Битола отвори истрага против 36-годишен жител на Прилеп осомничен за кривично дело – неовластено производство и пуштање во промет наркотични дроги, психотропни супстанции и прекурсори, казниво по член 215 став 1 од Кривичниот законик.Според Обвинителството, на магистралниот пат А3 Битола–Прилеп, во близина на кружниот тек за селото Тополчани, полицијата запрела автомобил „Фолксваген голф“ со прилепски регистарски таблички. При извршен преглед во багажниот простор биле пронајдени две патни торби во кои имало 35 најлонски пакувања со марихуана, со вкупна тежина од 32,575 килограми.Во рамки на истрагата, обвинителството ќе преземе дополнителни дејствија за откривање на лицето или лицата од кои осомничениот ја набавил дрогата, како и за идентификување на потенцијални сведоци поврзани со случајот.Со оглед на тоа дека постои опасност осомничениот да се обиде да прикрие или уништи докази, да влијае врз сведоци или да го повтори делото, јавниот обвинител поднесе предлог до судија на претходна постапка при Основниот суд во Битола за определување мерка притвор.

Македонија | пред 8 месеци

(Видео) Семејство од Драчево остана без дом во пожар – апел за помош

Во населбата Драчево, на улица „Славка Димкова“, на 24. август, целосно изгорела семејна куќа откако пожар избувнал поради стара електрична инсталација. Во огнената стихија семејството останало без покрив над глава, а целокупниот имот им е уништен.Семејството упати јавно обраќање до сите хумани граѓани, институции и организации кои можат и сакаат да помогнат за изградба на нов топол дом. На социјалните мрежи објавија и видео од настанот, со надеж дека ќе стигне до што повеќе луѓе кои ќе им подадат рака во најтешките моменти.Жиро сметка: 200001963010623Nikola Nastovski

Скопје | пред 8 месеци

Алијанса за Албанците: Дали Мицкоски ќе продолжи да го штити Меџити од обвинувањата за 450 илјади евра провизија?

Алијанса за Албанците (АА) прашува дали премиерот Христијан Мицкоски ќе продолжи да го штити својот коалиционен партнер, Изет Меџити од ВЛЕН, од обвинувањата за провизија од 450 илјади евра за плоштадот „Скендербег“, кои порано ги изнесе пратеникот на ВМРО-ДПМНЕ, Антонијо Милошоски.АА потсетува дека ВМРО-ДПМНЕ додека беше во опозиција објавуваше бројки, скандали и афери за расипништвото во локалната власт во Чаир, обвинувајќи дека Меџити како градоначалник земал провизија. Денеска, како што се наведува, тие се верни владини партнери.„Доколку Мицкоски заборавил, јавноста памети како пратеникот на ВМРО-ДПМНЕ, Антонијо Милошоски јавно изнесуваше обвинувања против Меџити за корупција, злоупотреби, криминали и провизии тешки 450 илјади евра,“ се вели во соопштението.Алијанса за Албанците прашува дали Мицкоски сега се откажува од својот пратеник и неговите тврдења за да го спаси Меџити и дали ВМРО-ДПМНЕ сè уште верува во сопствените обвинувања или тие биле само „евтин популизам“.„Дали оваа партија е подготвена да ги затвори очите пред сите тие наводи за криминал само за да остане на власт? И најважно: дали интересот на народот е жртвуван за сметка на нивните фотељи и функции?“ прашуваат од АА.Партијата потенцира дека борбата против корупцијата не е предмет на пазарење. „Нема компромис со наводни криминали, ниту алиби за политичка дволичност. Време е ВМРО-ДПМНЕ јасно да избере дали сака владеење на правото или заштита на коалицискиот комодитет,“ се додава во соопштението.АА порача дека граѓаните нема да прифатат двојни стандарди – едно да зборуваат кога се во опозиција, а друго да прават кога ќе дојдат на власт. „Ако ВМРО-ДПМНЕ навистина сака да се претстави како носител на промени, мора јавно и без калкулации да покаже дали ќе застане на страната на правдата или ќе остане соучесник во коруптивните практики кои самите ги разоткриваа,“ завршува соопштението.

Македонија | пред 8 месеци

ВМРО-ДПМНЕ: Филипче да не ги лаже младите, тие беа заборавени цели седум години

ВМРО-ДПМНЕ реагира на изјавите на Венко Филипче по неговите средби со младите, обвинувајќи го за, како што велат, лицемерие и заборавеност на младите генерации додека неговата партија била на власт.„Филипче им говорел на младите за тешкиот живот, ниските плати и иселувањето, но тоа беа реалностите токму во неговото време. Инфлацијата беше над 20%, платите мизерни, пензиите се зголемуваа за само 185 денари, јавниот долг над 60%, а студентските домови и факултети беа оставени на милост и немилост. Учениците со години учеа без учебници. СДС и ДУИ владееја со државата седум години и токму тие се одговорни за катастрофалната состојба“, велат од партијата.Оттаму додаваат дека во изминатите 15 месеци, откако ВМРО-ДПМНЕ ја презела власта, биле постигнати конкретни резултати. „Платите се покачени во администрацијата, здравството, образованието и полицијата. Инфлацијата се контролира и не е веќе 20%, јавниот долг се намали. Странските директни инвестиции достигнаа милијарда и 250 милиони евра. Учениците годинава добија учебници на први септември, а студентските домови и факултетите се реконструираат. Младите добиваат финансиска поддршка за стартапи, земјоделство и субвенции за електронски уреди,“ порачуваат од ВМРО-ДПМНЕ.„Филипче треба да им се извини на младите што седум години беа целосно заборавени, наместо да ги лаже и манипулира. За сè што направија, СДС и ДУИ веќе беа казнети на избори, а сличен пораз ќе ги снајде и во октомври,“ стои во реакцијата на ВМРО-ДПМНЕ.

Македонија | пред 8 месеци

Нема фотографија

Падна Google - корисниците пријавуваат проблеми со голем дел од сервисите

Корисници во повеќе европски земји пријавуваат значителен и тековен прекин кој ги погодува услугите на Google, предизвикувајќи сериозни нарушувања и во работата и во секојдневниот живот.Извештаи почнаа масовно да пристигнуваат на downdetector.com и на социјалните мрежи од корисници во Бугарија, Турција, Грција и други европски земји. Проблемите изгледаат како широко распространети и ги зафаќаат клучните производи на Google.Прекинот не ги погодува сите Google услуги, но засегнатите апликации се од критично значење за многумина:YouTube: Корисниците не можат да вчитуваат видеа, при што се појавуваат пораки за грешка или бесконечно вчитување. Погодени се и веб-страницата и мобилната апликација.Google Maps: Сервисот не успева да вчита мапи, да пребарува локации или да пресмета рути, оставајќи ги патниците и корисниците без навигациска помош.Google Search: Во особено сериозен дефект, основниот пребарувач на Google враќа пораки за грешка или не ги завршува пребарувањата за голем број корисници.Gmail: Некои корисници пријавуваат проблеми со испраќање и примање пораки, иако ова изгледа помалку конзистентно од другите прекини.

Магазин | пред 8 месеци

(Видео) Лејди Гага со „The Dead Dance“ ја најави новата сезона на „Wednesday“

Лејди Гага објави нова песна насловена „The Dead Dance“ како дел од официјалната звучна подлога за втората сезона на хит-серијата на Нетфликс, „Wednesday“. Премиерата се совпадна со стартот на новата сезона на 3 септември.Во продолжението на серијата, Гага ја толкува улогата на Розалин Ротвуд, додека нејзиниот нов сингл носи електро-поп звук со ретро вибрации од осумдесеттите. Спотот, режиран од Тим Бартон, е во препознатлив мрачен и готски стил, што дополнително ја засилува мистичната атмосфера на продукцијата.Песната е создадена во соработка со Ендру Вот и Хенри Волтер, а текстот се поигрува со темите на животот и смртта. Во рефренот Гага поракува: „Ќе играм додека не умрам“, додека во стиховите пее: „Кога ме уби одвнатре, тогаш оживеав… Музиката ќе ме врати од мртвите.“

Магазин | пред 8 месеци

СДСМ: Христовски го демантираше Мицкоски дека бил прислушуван

СДСМ реагира на тврдењата за наводно прислушкување на премиерот Христијан Мицкоски и побара Агенцијата за национална безбедност (АНБ) веднаш да ја декласифицира целата документација поврзана со случајот.„Власта да не бега од вистината, АНБ веднаш да направи декласификација на целата документација поврзана со случајот кој се обиде да го претстави како наводна афера за прислушкување,“ се наведува во соопштението.Од СДСМ истакнуваат дека не е точно дека е потребна судска постапка за декласификација на документите, туку тоа е само алиби и параван зад кој, како што велат, се крие вистинската намера на власта.„Законот е јасен – ‘тој што класифицира, тој и декласифицира’. Во овој случај тоа е АНБ и тоа треба да се направи веднаш,“ додаваат од партијата.СДСМ обвинува дека се фрлаат обвинувања во јавноста без ниту еден доказ и факти, со што се поткопува довербата во тоа што го кажува власта, а се создаваат сериозни сомнежи за „намерна манипулација и опасна игра на ВМРО-ДПМНЕ“.„Како тоа премиерот Мицкоски тврди дека наводно бил прислушуван, а директорот на АНБ Христовски кажува друго – дека станува збор за прибирање информации за таргетирани лица. Некој тука лаже свесно,“ се наведува во реакцијата.Од СДСМ додаваат дека само преку декласификација јавноста ќе ја види реалноста – дали и кој правел злоупотреби. „Ако не се направи декласификација, власта ќе потврди дека целиот случај е креиран заради политички мотиви и злоупотреба на агенцијата во партиски цели на ВМРО-ДПМНЕ,“ стои во соопштението.

Македонија | пред 8 месеци

Некој тука лаже, АНБ веднаш да ја декласифицира документацијата за случајот со прислушувањето, бара СДСМ

СДСМ побара Агенцијата за национална безбедност (АНБ) без одлагање да ја изврши декласификацијата на целата документација поврзана со случајот што, како што велат, власта се обидува да го претстави како афера за прислушкување.„Власта да не бега од вистината, АНБ веднаш да направи декласификација. Не е точно дека преку судска постапка треба да се декласифицираат документите, тоа е само алиби и параван зад кој се крие вистинската намера на власта. Законот е јасен – ‘тој што класифицира, тој и декласифицира’. Во овој случај тоа е АНБ и тоа треба да се направи веднаш“, соопштија од СДСМ.Според партијата, недозволиво е во јавноста да се фрлаат обвинувања без факти и докази, бидејќи таквото однесување ја поткопува довербата во институциите и остава сомнеж за манипулација со политички мотиви.„Како е можно премиерот Мицкоски да тврди дека бил прислушуван, а директорот на АНБ Христовски да кажува друго – дека станува збор за прибирање информации за таргетирани лица? Некој тука свесно лаже. Само преку декласификација јавноста ќе ја увиди реалноста и ќе се види дали и кој правел злоупотреби“, истакнаа од СДСМ.Тие предупредија дека доколку не се направи декласификација, ќе се потврди дека целиот случај е креиран за партиски цели и политичка злоупотреба на ВМРО-ДПМНЕ.

Македонија | пред 8 месеци

Шест години земал плата без да оди на работа – оштетен државниот буџет за 1,6 милиони денари преку АХВ

СВР Куманово поднесе кривична пријава против петмина вработени во Агенцијата за храна и ветеринарство поради основано сомнение за сторено кривично дело „злоупотреба на службена положба и овластување“.Според информациите, при контрола во Подрачната единица Куманово на 30 мај 2024 година било утврдено дека еден од пријавените, Р.Е. (51) од с. Слупчане, на работно место помлад референт-архивар, во период од речиси шест години, од декември 2018 до април 2024, воопшто не доаѓал на работа, а редовно примал плата и придонеси од буџетски средства.Второпријавениот З.А. (59) од Скопје, кој бил вршител на должноста директор на Агенцијата до декември 2020, и неговиот наследник Н.Б. (61) од Битола, директор до јули 2024, свесно дозволиле исплатата да продолжи, иако Р.Е. не ги извршувал работните обврски.Меѓу пријавените се и А.Б. (59) од Скопје, раководител на Одделение за финансиски прашања, кој без проверка потпишувал финансиски извештаи и одобрил исплата на плати и придонеси, како и С.К. (58) од Штип, раководител на друго одделение во Агенцијата, кој не презел мерки да ја спречи незаконитата состојба.Со ваквите дејствија, на првопријавениот му биле исплатени 1.159.081 денар, а државниот буџет е оштетен за вкупно 1.682.759 денари, соопштија од МВР.

Македонија | пред 8 месеци

ВМРО-ДПМНЕ: Пет години безбедносните служби го прислушкувале Мицкоски по налог на Заев и Филипче

СДС не бирале средства и методи за да останат на власт што е можно подолго, злоупотребувајќи институции, државни ресурси и целиот безбедносно-разузнавачки апарат, обвини и денеска ВМРО-ДПМНЕ.Од партијата велат дека заради одржување на власта, безбедносните служби биле ставени во партиска функција со цел следење и прислушкување на политички противници, бизнисмени, новинари и јавни личности.Според соопштението, во периодот кога СДС била најголема опозициска партија, со помош на нивни кадри поставени во агенциите за разузнавање и безбедност, пет години бил следен и прислушкуван претседателот на ВМРО-ДПМНЕ, Христијан Мицкоски.„Тоа го правеле со единствена цел политичка елиминација на Мицкоски, како единствен којшто може да им се спротивстави и да ги победи на избори, нешто што и се случи и покрај недемократските, да не речеме тоталитарни, мерки,“ се наведува во реакцијата.Од партијата додаваат дека со следењата и прислушкувањата СДС сакале да го запрат нивниот пад од власт, да го придушат секој слободен и критички глас од новинари и јавни личности, како и да вршат уцени врз стопанственици.„Во периодот од 2019 до 2024 година, СДС владееле со злоупотреба на службите како да се партиска алатка за останување на власт. Трагично е да се гледаат СДС, кои од уста не ја вадеа демократијата, како ги злоупотребувале службите и со најнедемократските методи ги ограничувале правата на слободно движење и изразување на граѓаните загарантирани со Устав и закон,“ стои во соопштението.ВМРО-ДПМНЕ наведува дека цели пет години службите биле користени за да се одржат на власт Зоран Заев и Венко Филипче и кликата околу нив, наместо за безбедноста на државата и граѓаните.Дополнително, како што посочуваат, асистенција во тоа давал и сегашниот главен обвинител Љупчо Коцевски, кој бил одговорен за издавање на ПИ мерките и претставувал „главна алка“ во синџирот на СДС за следење и прислушкување на претседателот Мицкоски, новинари и бизнисмени.„Тоа е истиот тој Коцевски кого СДС толку силно го бранеа во Собрание за време на гласањето на интерпелацијата против него, а веќе се гледа зошто го бранеа и не гласаа за негово разрешување,“ додаваат од партијата.Во заклучок, ВМРО-ДПМНЕ бара и очекува Јавното обвинителство да отвори сеопфатна истрага за овој скандал „од невидени размери“, со која ќе бидат опфатени сите што ги злоупотребиле институциите и ќе бидат изведени пред лицето на правдата.

Македонија | пред 8 месеци

Левица: Јаневска ги остави без превоз средношколците од Ресен – државата штеди на младите

Целосната неспособност и игнорантскиот однос на министерката за образование Весна Јаневска ги оставија без превоз средношколците од Ресен на самиот почеток на учебната година, обвини денеска Левица.Од партијата посочуваат дека учениците од Ресен се извисени поради негрижата на Министерството за образование и наука (МОН) и за нив не е обезбеден организиран превоз до Битола и Охрид. Единствената „алтернатива“ што ја нуди државата е сместување во интернат, кој според Левица има нехумани услови, под секое достоинство.Средношколците биле принудени да аплицираат за прием во интернатот, при што морале да ги исполнат строгите критериуми за оценки и месечни приходи. Според правилата на МОН, само доколку бидат одбиени, добиваат право на надоместок за превоз – иако автобуски линии воопшто нема. Дел од учениците одбиле да живеат во интернат поради, како што велат, ужасните услови, меѓу кои и недостиг на вода.„Со оваа политика, власта на ДПМНЕ практично ги казнува учениците што сакаат да се образуваат, ги става родителите под финансиски притисок и испраќа јасна порака дека образованието е привилегија за малкумина, а не право за сите“, стои во соопштението.Од Левица додаваат дека наместо безбедни и достапни услови за образование, младите кои сè уште не се иселиле од земјава се принудени или сами да патуваат со сопствен трошок или да живеат во средина опасна по нивното здравје и достоинство.Покрај тоа, партијата го прозва и градоначалникот на Ресен, Јован Тозиевски, кој, како што велат, наместо да молчи пред „срамот на неговата партија“, е должен во најбрз рок да обезбеди превоз за учениците.„Со оваа политика, каде владејачката елита штеди на образованието на младите, додека расипнички троши за свои привилегии – власта на ДПМНЕ им праќа порака на младите што побрзо да се иселат од држава која не се грижи за нивната иднина,“ наведува Левица.

Македонија | пред 8 месеци

Затвор и високи казни за мигранти со одбиен азил во Грција

Парламентот во Грција изгласа нов закон со кој лицата чијашто апликација за азил е одбиена, а не ја напуштаат земјата во рок од две недели, ќе се соочат со кривични санкции – казна затвор од две до пет години.Министерот за миграции Танос Плеврис изјави дека државата и понатаму ќе обезбедува азил за оние што ги исполнуваат критериумите за меѓународна заштита, но најави и засилени казни за нелегален престој и влез. Според новите одредби, за илегално влегување во Грција се предвидува парична казна до 10.000 евра и затвор до две години.Овој законски пакет предизвика бројни реакции. Судии го оценија како претерано репресивен, додека здруженијата за мигранти го нарекоа расистички и нелогичен, посочувајќи дека земјата се соочува со сериозен недостаток на работници во земјоделството, градежништвото и туризмот.Истовремено, економисти и експерти за демократија предупредуваат дека мерките за одвраќање на нелегалната миграција мора да бидат проследени со отворање легални канали за работна миграција, бидејќи без тоа грчката економија ќе се соочи со уште поголеми предизвици.

Свет | пред 8 месеци

Филипче: 17.000 помалку вработени, студентите бегаат во странство, младите не гледаат перспектива во Македонија

Младите во Македонија денес живеат во држава која не се развива, држава во која немаат просперитет, посочи претседателот на СДСМ, д-р Венко Филипче на средбата со студенти. На средбата Филипче нагласи дека немањето стратегија за унапредување на пазарот на труд, растечката сиромаштија, се само дел од причините поради кои младите својата иднина ја гледаат надвор од Македонија.Статиската бележи поразителни бројки кои укажуваат на тоа дека младите ја напуштаат државата."Бројот на вработени лица во државата е намален за над 17.000 луѓе.Бев во Делчево и го кажувам како пример. Во овој град секоја година во просек матуираат околу 100 ученици. Годинава, 90 од нив се запишале на факултети во Бугарија. Зошто? Затоа што кај нас нема универзитет што е на Шангајската листа. Нема сериозно вложување во наука, нема поддршка за истражување, нема квалитет кој ќе ги задржи младите тука“, рече Филипче.Зборувајќи за причините за иселување на младите, Филипче посочи дека сите параметри одат во прилог на тоа дека власта не води сметка за граѓаните најмалку за младите.„Работните места што се отвораат сите се со ниски плати, не се доходовни, тоа е преживување, тоа не е развој. Колку и да кажуваат дека растат платите тоа се толку минимални проценти што однапред е изедена таа сума на пари од растот на плати со инфлацијата којашто не ја контролираат“, рече Филипче.Дополнително, како што кажа Филипче, причина за разочараноста кај младите е фактот што тие гледаат дека регионот оди напред, додека власта свесно ризикува Македонија да остане периферија на Европа."Комесарката за проширување на ЕУ, Марта Кос кажа дека Црна Гора може 2028 година, Албанија 2029 година, да станат членки на ЕУ. Отиде регионот напред. И да не бара изговори оваа влада, срамота е тоа што го прават. Се се сведува само на нивни лични и теснопартиски интереси за бизниси итн. Нема развој, нема перспектива", рече претседателот на СДСМ, Венко Филипче.

Македонија | пред 8 месеци

Меџити: Автомобилот на Али Ахмети стоел 24 часа во полициска станица, се сомневаа дека Груевски избегал со него

Првиот заменик-премиер и кандидат на ВЛЕН за градоначалник на општина Чаир, Изет Меџити, упати ново сериозно обвинување кон лидерот на ДУИ, Али Ахмети.Во интервју за весникот Лајм, Меџити изјави дека во времето кога поранешниот премиер Никола Груевски побегнал од земјата, автомобил на Ахмети бил задржан 24 часа во полициска станица под сомнение дека токму со него Груевски можел да ја напушти државата.„Автомобилот на Али Ахмети стоел цел ден во полициска станица, затоа што се сомневаа дека Груевски избегал со него. Ова е вистина што многу брзо целосно ќе излезе пред јавноста,“ изјави Меџити.Тој нагласи дека станува збор за еден од најскандалозните случаи кој, според него, ги потврдува сомнителните врски на тогашната власт со бегството на Груевски во Будимпешта. Меџити додаде дека граѓаните имаат право да знаат што точно се случувало зад сцената.

Македонија | пред 8 месеци

Почна истрага: Откупувале железо и акумулатори и си направиле пункт на Вардариште кое нонстоп се пали

Со координирани дејствија на Основното јавно обвинителство Скопје и Министерството за внатрешни работи, во изминатите два дена се извршени претреси на локацијата Вардариште. Обезбедени се докази кои создаваат основано сомнение дека три лица сториле кривично дело – загрозување на животната средина и природата со отпад.Обвинителството денеска поведе истрага и предложи на осомничените да им биде определен притвор поради опасност од бегство, влијание врз сведоци и можност за повторување на делото. Според обвинението, тројцата подолг временски период, заклучно со 2 септември годинава, на улицата „Зендел Џемаил“ во Скопје, создале диви депонии спротивно на прописите за заштита на животната средина, со што можеле да предизвикаат значително оштетување на почвата, воздухот и водата, како и опасност за животот и здравјето на луѓето.Осомничените вршеле откуп на старо железо, метални производи, стари акумулатори и обоени метали на импровизирани отпадни пунктови без регистрирано правно лице и без дозвола од Министерството за животна средина. Доказите упатуваат дека тие непрописно складирале и транспортирале отпад, со што директно влијаеле на квалитетот на почвата и воздухот, но и предизвикале закана по здравјето на граѓаните.

Македонија | пред 8 месеци

Путин: Ако Зеленски сака – нека дојде во Москва

Рускиот претседател Владимир Путин го оцени својот престој во Кина како позитивен и корисен, нагласувајќи дека постигнал клучен договор за проектот гасовод „Силата на Сибир 2“ и дека разговорите со кинеското раководство биле многу продуктивни.„Форматот на овие средби овозможи да разговараме за секоја тема, што е од големо значење“, изјави Путин, додавајќи дека гасоводот ќе создаде конкурентска предност за Кина, бидејќи ќе добива гас по пазарни, а не по вештачки надуени цени.Прашан за мировни гаранции за Украина, Путин рече дека секој треба да има безбедносни гаранции, вклучително и Украина, но нагласи дека тоа не значи размена на територии.„Не се бориме за земја, се бориме за правата на луѓето да зборуваат руски јазик и да живеат по своите традиции“, изјави тој, додавајќи дека се гледа светло на крајот од тунелот. Рускиот претседател повторно го повика украинскиот колега Володимир Зеленски да дојде во Москва, доколку е подготвен за директни разговори.Осврнувајќи се на состојбата на боиштата, Путин изјави дека руските сили напредуваат на сите фронтови, а Украина нема капацитет за офанзиви од поголем обем. „Можеби подготвуваат нешто, но според нашите експерти, украинската војска во моментов нема такви способности“, додаде тој. За западните санкции тврдеше дека настаните во Украина се само изговор за претходно подготвени економски мерки против Русија и други земји. „Тоа нас не нè засега,“ рече кратко.Во врска со неодамнешната изјава на американскиот претседател Доналд Трамп за наводна завера меѓу Путин, Ким Џонг Ун и Си Џинпинг, рускиот лидер одговори со насмевка: „Трамп има добар смисол за хумор.“ Тој додаде дека никој во Кина за време на посетата не зборувал против Трамп и дека сите ја поддржале средбата во Анкориџ, изразувајќи надеж дека тоа ќе придонесе за крај на војната.

Свет | пред 8 месеци

(Видео) Предложени се глупости од докази против таткото на Васил, зар ние одговараме за постапките на нашите полнолетни деца, праша адвокатот

Адвокатот Сашко Дуковски, бранител на Зоран Јованов, обвинет дека му го дал возилото на неговиот син Васил Јованов иако знаел дека нема возачка, а со кое ја усмрти младата Фросина Кулакова, жестоко го нападна Обвинителството. Според Дуковски, обвинението е небулозно, а за обвинувањата нема никаков доказ.„Беа предложени глупости од докази, за тоа кој го регистрирал возилото...“, рече Дуковски.Според него, студентите од Правниот факултет ќе гледаат шарада од судење.„Васил Јованов е полнолетно лице, дали ние одговараме за секое дејствие на нашите деца?“, додаде Дуковски.Обвинителниот предлог против Зоран Јованов беше поднесен откако неговиот син Васил Јованов во јануари годинава, управувајќи автомобил без возачка дозвола и под дејство на алкохол, удри во пешакот Фросина Кулакова која почина на самото место.

Македонија | пред 8 месеци

(Видео) Кокаин по Snapchat, имагинарен учител во судница - дилеми за психата на Штекли, вештакот раскажуваше за траумите

Афектна студеност, психопатско однесување и психотична основа – вака вештакот Ѓорѓе Хаџи Ангелковски ја опиша состојбата на обвинетиот Раде Трајковски – Штекли, за кого смета дека не е способен да го следи судењето.Хаџи Ангелковски пред судот изјави дека пред десетина години Штекли му бил пациент, а неодамна со него водел четиричасовен разговор. Според вештакот, обвинетиот има процесна психоза, која ако не се лекува може од привремена да стане трајна. Во своето вештачење наведе дека Штекли престанал да јаде месо „за да ги заштити своите браќа и сестри од претходниот живот“, дека нема емотивна поврзаност со своите три деца и дека тврди оти „имагинарен учител“ го водел од „Ист Гејт“ кон болница, при што бил нападнат од зад грб. Хаџи Ангелковски истакна дека мајката на Штекли боледувала од шизофренија, што, според него, го зголемува ризикот за 20 пати, обвинетиот да ја има истата болест. Посочи и дека бил жртва на семејно насилство, бидејќи таткото ја тепал неговата мајка. Тој тврди дека и за време на самото рочиште Штекли имал халуцинации и дека не можел со потребно внимание да ја следи постапката.Спротивно на тоа, обвинителството достави психијатриско вештачење според кое Трајковски е апсихотичен и способен активно да учествува во судењето. На следното рочиште, својот наод ќе го презентира и нивниот ангажиран вештак, што ќе биде клучно за одлуката на судот дали Штекли е процесно способен. Обвинението опфаќа 16 лица, од кои седум веќе склучиле спогодби и добиле затворски казни од 3 до 3,5 години. Според обвинителството, групата била добро организирана, со поделени улоги од набавка до продажба на кокаин и марихуана.Дрогата се чувала во изнајмени станови, а се продавала по цени од 4.500 до 6.000 денари за грам кокаин и од 200 до 300 денари за грам марихуана. Комуникацијата меѓу членовите се одвивала преку апликацијата Snapchat.

Македонија | пред 8 месеци

Дали Спасовски мета на АНБ додека ја воделе „неговите“: Вистината мора да биде јавно објавена!

И ексминистерот за внатрешни работи, Оливер Спасовски е ставен на списокот на лица кои биле обработувани од страна на Агенцијата за национална безбедност. Неговото име го објави порталот „Мкд.мк“ и е прв споделен во јавноста од редот на СДСМ, по аферата која беше пласирана. Непознато е како биле обработувани, а медиумот посочува „Вилма Русковска и Оливер Спасовски, тогашниот министер за внатрешни работи, биле предмет на обработка затоа што преземале некакви активности во рамките на нивните надлежности против Фросина Ременска, сопругата на Јовче Ременски од АНБ“.Спасовски пак, без конкретен став дали се сомнева во тоа дека бил таргет на нелегално следење на комуникациите, како и дали има информација дека бил цел на оперативно-технички обработки. Тој очекува одговорот да го добие со декласификација на целата документација.„Очекувам итна декласификација на целата документација за овој случај. Постои постапка согласно која АНБ може да ги обелодени сите информации и сите документи. Вистината мора да биде целосно достапна на јавноста и мора низ една транспарентна, законска постапка да се утврди дали и кој направи злоупотреби, и секако да се бара одговорност. Конечно мора да се застане на патот на оние кои злоупотребуваат, а службите да бидат заштитник на уставниот поредок на државата и на граѓаните“, вели актуелниот пратеник, Оливер Спасовски.Претходно, во јавноста беше пласирано дека нелегално прислушувани и предмет на оперативно-техничка обработка биле премиерот Христијан Мицкоски, обвинителката Вилма Русковска, новинарите Кристијан Ландив и Љупчо Златев. Потврда нема за ниту едно објавено име, освен за премиерот Мицкоски, кој самиот кажа дека документите покажувале негово нелегално следење.

Македонија | пред 8 месеци