Бесплатни униформи за сите ученици од прво до деветто одделение во Центар, првачињата добиваат и ранци

Општина Центар и во учебната 2026/2027 година ќе обезбеди бесплатни училишни униформи за сите ученици од прво до деветто одделение во осумте општински основни училишта.

Мерката, која беше воведена минатата година, има цел да ги намали социјалните разлики меѓу учениците и да придонесе за создавање еднаква и прифатлива училишна средина за сите деца.

— реклама —

Градоначалникот на Општина Центар, Горан Герасимовски, вели дека униформите се дел од заложбите за обезбедување еднакви услови за сите ученици.

— реклама —

„Училиштето треба да биде место каде што децата ќе се разликуваат по знаењето, трудот и успехот, а не по тоа кој што носи и колку неговите родители можат да си дозволат“, порача Герасимовски.

Секој ученик ќе добие комплет од пет памучни парчиња облека – две маици со јака, две маици со долги ракави и јака и еден дуксер со патент.

— реклама —

Од Општина Центар најавуваат дека мерката ќе продолжи и во наредните учебни години, а бесплатни униформи ќе добиваат и новите генерации ученици.

Дополнително, и оваа година сите првачиња запишани во осумте општински основни училишта ќе добијат бесплатни ранци.

Од Општината велат дека со овие мерки продолжуваат да вложуваат во образовна средина во која сите деца ќе имаат еднакви услови за учење и развој.