Црвен аларм во девет области во Грција поради силни бури и обилни врнежи

Девет области во Грција се под црвен метеоролошки аларм до 29 октомври поради најавени обилни врнежи и силни бури. Надлежните служби се ставени во состојба на зголемена подготвеност, а цивилната заштита ги повика граѓаните да ги почитуваат безбедносните препораки, објави грчката јавна радиотелевизија ЕРТ.

Предупредувањето ги опфаќа областите Евбеја, Фтиотида и Беотија во Централна Грција, Спорадските Острови, Магнезија и Лариса во Тесалија, регионот Атика, Додеканските Острови во Јужниот Егеј и Северниот Егеј. За Атика и Северниот Егеј црвениот аларм е прогласен од претпазливост, земајќи ги предвид претходните врнежи.

— реклама —

Денеска се очекуваат дождови и локални бури во источните и јужните делови на Грција, особено на Евбеја, во Магнезија и на Северните Спорадски Острови. За утре се најавува ново влошување на времето, со обилни врнежи и бури во источна Тесалија, Северните Спорадски Острови, источна Централна Грција, Фтиотида, Беотија, Евбеја и Скирос.

— реклама —

Поради најавеното невреме, активиран е оперативниот план на противпожарната служба за справување со поплави, а единиците во загрозените подрачја се во зголемена готовност. Во подготвеност се и вооружените сили, полицијата, крајбрежната стража и другите надлежни служби.

Цивилната заштита ги повика граѓаните да ги обезбедат предметите што би можеле да ги однесе ветерот, да ги проверат олуците и одводните цевки и да не поминуваат низ надојдени потоци и порои за време на дождот, но и неколку часа по неговото завршување.

— реклама —

Се препорачува избегнување активности на отворено, особено во крајбрежните подрачја за време на бурите, како и престој под дрвја, висечки сообраќајни знаци и балкони. При грмежи, граѓаните треба да побараат засолниште во зграда или автомобил и да се оддалечат од реки, езера, морето и далноводите.

На возачите им се советува да застанат на безбедно место и да не се обидуваат да минуваат низ поплавени патишта.

Црвениот аларм подразбира целосна мобилизација на Националниот механизам за цивилна заштита, со ангажирање на потребниот персонал и опрема за справување со вонредни ситуации.