Инфлацијата во моментов е под контрола и нема потреба од воведување нови мерки за интервенција на пазарот, изјави министерот за економија Бесар Дурмиши, нагласувајќи дека состојбата постојано се следи во координација со Државниот пазарен инспекторат.
Тој порача дека институциите ќе реагираат доколку се утврдат девијантни однесувања или неоправдано зголемување на цените.
„Контролите на Државниот пазарен инспекторат за периодот од март до јуни покажаа дека цените на производите во малопродажба се зголемени за само 0,16 проценти. Тоа е резултат на средбите што ги одржавме со синџирите на маркети и предупредувањата дека внимателно ги следиме профитните маржи“, рече Дурмиши.
Министерот најави дека во понеделник ќе се одржи средба со производителите и дистрибутерите на прехранбени и непрехранбени производи.
Според анализите на Министерството, контролите на целиот синџир – од производителите и дистрибутерите до трговците на мало – покажале дека во периодот од мај 2025 до мај 2026 година набавните цени се зголемиле за 2,66 проценти, додека продажните цени пораснале за 4,56 проценти.
„Заклучокот е дека дел од трговците, иако имале пониски набавни цени, не ги намалиле продажните цени, што резултирало со раст од 4,56 проценти“, изјави Дурмиши.
Тој овие информации ги соопшти по седницата на Економско-социјалниот совет во Владата, на која, како што рече, се разговарало за политиките за вработување, платите, состојбите на пазарот на труд и усогласувањето на образовниот систем со потребите на економијата.
