Цените на плажите во Грција повторно предизвикаа реакции на социјалните мрежи, откако беше објавена фотографија од ценовник на една плажа каде лежалките се наплаќаат по лице, а не по сет.
Според објавениот ценовник, местото во прв и втор ред до морето чини по 20 евра од лице. За третиот и четвртиот ред цената е 15 евра по лице, додека за петтиот ред и понатаму се плаќа по 10 евра. Иста цена од 15 евра е предвидена и за местата под дрвјата.
Дополнително, на таблата е наведено дека цената се однесува исклучиво за користење на лежалките, додека храната и пијалаците се наплаќаат посебно.
Фотографијата беше споделена на група посветена на летување во Грција и брзо предизвика бројни коментари. Дел од туристите сметаат дека станува збор за превисоки цени, особено ако се земе предвид дека во многу туристички места лежалките се добиваат со минимална консумација или без консумација.
Според пресметките, четиричлено семејство кое би избрало место во првиот ред до морето би платило 80 евра само за лежалки, без дополнителните трошоци за пијалаци и храна.
Последните години сѐ повеќе плажи во Грција воведуваат различни модели на наплата, а цените најчесто зависат од локацијата, периодот на сезоната и близината до морето.
