Еден од основачите на Убисофт, Клод Гијмо, загина во авионска несреќа во западниот дел на Франција, потврдија локалните власти.
Според информациите, несреќата се случила во петокот навечер, кога двомоторен авион „Цесна 421“ се урна во близина на аеродромот Ла Бол, на Атлантскиот брег на Франција.
Покрај Гијмо, во авионот се наоѓал и инструктор по летање, кој исто така загинал во несреќата.
Градоначалникот на Ла Бол, Франк Луврије, соопшти дека двајцата биле лиценцирани и искусни пилоти. Според претставник на аеродромот, леталото се урнало на поле непосредно пред слетувањето.
Надлежните органи започнаа истрага за утврдување на причините за несреќата.
Од „Убисофт“ ја потврдија веста за смртта на Гијмо, но засега не изнесоа дополнителни информации.
Клод Гијмо ја основал компанијата во 1986 година заедно со своите четворица браќа. Со текот на годините, „Убисофт“ прерасна во еден од најголемите светски производители на видеоигри, познат по серијалите „Assassin's Creed“, „Just Dance“, „Rayman“ и игрите од франшизата „Tom Clancy“.
