Герасимовски до „Комунална хигиена“ и „Паркови и зеленило“: Граѓаните не треба да бидат заложници на надлежностите

Општина Центар и овој викенд продолжува со расчистување на диви депонии и со интервенции на локациите погодени од невремето.

Според Општината, вчера и денеска на терен се ангажирани два багери и два камиони, со кои се расчистуваат диви депонии во Крњево, Маџир Маало и Ново Маало.

— реклама —

Паралелно продолжува и чистењето на локациите каде по невремето останале паднати гранки, зеленило и друг отпад.

Од Општината велат дека секојдневно добиваат голем број поплаки од граѓани за натрупан отпад, неисчистени јавни површини и последици од невремето.

— реклама —

Иако дел од овие обврски формално не се во надлежност на Општина Центар, општинските екипи, како што наведуваат, излегуваат на терен и интервенираат таму каде што проблемите не можат да останат нерешени.

Градоначалникот Горан Герасимовски упати апел до ЈП „Комунална хигиена“ и ЈП „Паркови и зеленило“ редовно и навремено да ги извршуваат своите обврски.

— реклама —

„Граѓаните не треба да бидат заложници на тоа кој за што е надлежен. Тие со право очекуваат чисти улици, собран отпад и уредени јавни површини“, порача Герасимовски.

Тој додаде дека најголем дел од поплаките завршуваат кај Општината, поради што таа реагира секогаш кога има можност, но нагласи дека не може трајно да ги презема обврските на други институции.

„На граѓаните им треба решение, а не префрлање на одговорноста“, рече Герасимовски.

Општина Центар најавува дека ќе продолжи со расчистување на критичните точки и со интервенции по невремето, а до граѓаните упатува и апел да не оставаат отпад на јавни површини и повторно да не создаваат диви депонии на веќе исчистените локации.