Нашиот модел гради, обединува и носи резултати – на 2 ноември заокружете број 9, вели ВМРО-ДПМНЕ

ВМРО-ДПМНЕ ги повика граѓаните на претстојниот втор круг од локалните избори, закажан за 2 ноември, да гласаат за број 9, со порака дека нивниот модел на управување „гради, обединува и носи резултати“.Во соопштението од партијата се наведува дека во изминатите четири години, градоначалниците од редовите на ВМРО-ДПМНЕ докажале дека може да се управува транспарентно, отчетно и во интерес на граѓаните.„Нашите градоначалници работеа со интегритет и визија. Во многу општини го надминаа ветеното и испорачаа повеќе од она што беше зацртано во нивните програми. Резултатите се видливи, а граѓаните тоа го потврдија уште во првиот изборен круг“, се наведува во соопштението.Од ВМРО-ДПМНЕ тврдат дека владата предводена од нивната партија извршила суштинска промена во односите меѓу централната власт и локалната самоуправа, овозможувајќи реализација на бројни капитални проекти и инвестиции.„Преку поддршката што Владата им ја овозможува на општините се гради инфраструктура, се обновуваат училишта, се модернизира јавниот транспорт, се решаваат проблеми со водоснабдување и отпад. Тоа се реални промени што го подобруваат секојдневието на граѓаните“, наведуваат од партијата.Тие додаваат дека ваквиот модел на работа не подразбира само финансиска помош, туку и постојан дијалог, соработка и координација со градоначалниците во решавањето на локалните предизвици.Во завршницата од обраќањето, партијата ги повика жителите на повеќе општини — меѓу кои Аеродром, Карпош, Кочани, Виница, Кичево, Пробиштип, Неготино, Валандово, Крушево, Македонски Брод, Чучер Сандево, Шуто Оризари и Градот Скопје — да излезат на гласање и да го „потврдат правецот на развој“.„На 2 ноември граѓаните имаат можност да изберат напредок и сигурна иднина. Да го поддржат моделот кој гради и носи резултати. Да заокружат број 9 — за својот човек, своето место и својата иднина“, порачуваат од ВМРО-ДПМНЕ.

Македонија | пред 5 месеци

Незаконски дневници и потпишани решенија: Кривична пријава за поранешниот директор на Агенцијата за храна и ветеринарство

Секторот за внатрешни работи – Скопје поднесе кривична пријава до Основното јавно обвинителство – Скопје против поранешниот директор на Агенцијата за храна и ветеринарство (АХВ), неговиот заменик и неколку вработени, поради сомневање за злоупотреба на службената положба и проневера на буџетски средства.Според информациите од Министерството за внатрешни работи, против лицето З.А., поранешен директор на АХВ, е поднесена пријава за „проневера во службата“ по член 354 став 1 од Кривичниот законик.За истото кривично дело, во форма на помагање, се пријавени и Ф.М., поранешен заменик директор, како и Л.У., А.Р., Е.Т., А.Б. и А.Б., вработени во институцијата.Истражните органи утврдиле дека во периодот од 2017 до 2020 година, поранешниот директор З.А. во повеќе наврати противправно прибавувал парични средства доделени за службени патувања во странство.Наместо дозволените 20% дневници, согласно важечката уредба за службени трошоци, тој примал по 50% дневници, иако трошоците за сместување и исхрана не паѓале на товар на институцијата.Според пријавата, заменик-директорот Ф.М. со потпишување на решенијата за службени патувања му овозможил на директорот незаконски да ги наплати повисоките износи, додека Л.А., А.Р. и Е.Т. подготвувале службени решенија спротивно на уредбата.Потоа, А.Б. и А.Б. ги одобрувале исплатите иако, според МВР, знаеле дека документите не се законски изготвени.На овој начин, З.А. се стекнал со противправна имотна корист во вкупен износ од 62.530 денари, на штета на буџетот на Агенцијата за храна и ветеринарство.Од Министерството за внатрешни работи соопштија дека предметот е доставен до надлежното обвинителство за понатамошна постапка, а истрагата ќе продолжи за да се утврди целосната одговорност на сите инволвирани лица.

Македонија | пред 5 месеци

(Видео) Трагедија на автопатот Нови Сад – Белград: Загина дете, повредени седум малолетници од џудо-клубот „Партизан“

Едно дете загина, а седум други се повредени во тешка сообраќајна несреќа што се случила утрово околу 3:30 часот на автопатот Нови Сад – Белград, во близина на наплатната рампа во правец кон српската престолнина. Во несреќата е тешко повреден и возачот на комбето.Според информациите на Министерството за внатрешни работи на Србија, несреќата се случила кога комбе марка „Опел Виваро“ со белградски регистарски таблички излетало од коловозот, ја пробило заштитната ограда и паднало во канал.Во возилото се наоѓале осум малолетници на возраст од 13 до 16 години, членови на џудо-клубот „Партизан“ од Белград, кои се враќале од меѓународен спортски камп и натпревар во Азербејџан.Едно од децата, родено во 2009 година, починало на самото место, а останатите седум се повредени и се пренесени во Институтот за здравствена заштита на деца и млади во Војводина.„Во сообраќајната несреќа се повредени седум деца на возраст од 13 до 15 години. Две се сместени на одделението за интензивна нега, едно дете има повреда на цервикалниот ‘рбет и е транспортирано во Белград, а друго беше подложено на хируршка интервенција под општа анестезија. Останатите се во стабилна состојба и под лекарски надзор“, изјави за РТС доктор Андреа Ѓуретиќ од новосадската Детска болница.Возачот на комбето, маж на 43 години, идентификуван како С. С. (1982), е пренесен во Ургентниот центар на Клиничкиот центар на Војводина со повеќекратни трауматски повреди.Од таму информираа дека по целосна дијагноза и медицинска интервенција, тој се наоѓа под постојан надзор на лекарите.Со алкотест е утврдено дека возачот не бил под дејство на алкохол во моментот на несреќата.На местото на несреќата во тек е увид кој го води надлежниот јавен обвинител, со цел да се утврдат причините за трагедијата. Првичните податоци укажуваат дека комбето, од засега непознати причини, изгубило контрола веднаш по минувањето на наплатната рампа, по што излетало од патот.Веста за трагедијата предизвика длабока жал во белградската спортска јавност. Од џудо-клубот „Партизан“ засега нема официјално соопштение, но членовите и тренерите изразуваат сочувство до семејствата на децата и надеж за брзо закрепнување на повредените.

Свет | пред 5 месеци

Студија на Европската радиодифузна унија: Вештачката интелигенција го измислува секој трет одговор и го покажува како факт

Иако стотици милиони луѓе секојдневно користат системи со вештачка интелигенција за информации — од изборни резултати до вести — ново истражување на Европската радиодифузна унија (ЕБУ) открива алармантен проблем: chatbot-овите измислуваат и до 40% од своите одговори, прикажувајќи ги како факти.Истражувањето, спроведено меѓу 68 јавни радиодифузери од 56 земји, ја тестирало точноста на најпопуларните системи – ChatGPT, Claude, Gemini и Microsoft Copilot. Резултатите покажале дека ниту еден од нив не функционира без грешки.Според експертите, chatbot-овите често создаваат таканаречени „халуцинации“ – убедливи, но целосно измислени информации. Така, ChatGPT тврдоглаво инсистирал дека папата Франциск е жив, Copilot не знаел дека Шведска е членка на НАТО, а Google Gemini тврдел дека Доналд Трамп допрва ќе биде повторно избран.„Овие системи звучат убедливо дури и кога кажуваат очигледни невистини“, предупредува професорот Петер Пош од Техничкиот универзитет во Дортмунд. „Токму затоа се опасни, бидејќи просечниот корисник не може веднаш да ги забележи грешките.“Халуцинациите најчесто се јавуваат при теми од регионален карактер, актуелни настани или прашања што бараат поврзување на повеќе различни извори.Истражувањето предупредува дека ширењето на лажни информации преку chatbot-ови може сериозно да ја поткопа јавната доверба и демократските процеси.Корисниците често ги споделуваат невистините без проверка, ученици и студенти ги вклучуваат во академски трудови, а граѓаните ризикуваат да донесуваат важни одлуки – вклучително и изборни – врз основа на неточни податоци.Дополнителен проблем претставува тоа што многумина не се свесни дека chatbot-овите можат да „измислуваат“. Иако условите за користење формално предупредуваат на можни грешки, речиси никој не ги чита.Истовремено, chatbot-овите често погрешно се повикуваат на реномирани медиуми – како германските јавни сервиси ARD или ZDF – со што ја нарушуваат довербата во традиционалното новинарство.Причината лежи во самата структура на технологијата: вештачката интелигенција не разбира што „вели“, туку само предвидува која зборовна комбинација е најверојатна според претходно обработени текстови. Таа нема вистинско знаење, ниту може да провери факти.Технолошките компании вложуваат милијарди за да го решат проблемот, интегрирајќи бази на податоци и системи за проверка на извори, но „халуцинациите“ остануваат нерешен и суштински дефект на моменталната технологија.Европската радиодифузна унија апелира на внимателност при користење на вештачката интелигенција:никогаш да не ѝ се верува слепо,сите важни информации да се проверуваат од независни и проверени медиуми,а посебна претпазливост да се применува при теми поврзани со политика, здравство и финансии.Според ЕБУ, училиштата и универзитетите треба да го зајакнат образованието за медиумска писменост, за младите да препознаваат дезинформации создадени од АИ.До тогаш, важи едноставно правило:Chatbot-овите се добри за креативни задачи – но не и како извори на вистински информации.

Магазин | пред 5 месеци

Полски борбени авиони пресретнаа руски извидувач над Балтикот

Полските вооружени сили денеска соопштија дека борбени авиони MiG-29 пресретнале руски извидувачки авион Il-20, кој летал над меѓународниот воздушен простор на Балтичкото Море без поднесен план за лет и со исклучен транспондер.Военото соопштение наведува дека акцијата била изведена „брзо, ефикасно и безбедно“ благодарение на високата подготвеност на пилотите и функционалноста на системот за противвоздушна одбрана.„Заштитата на полското небо не е само обврска, туку и секојдневна мисија на нашите војници, кои со целосна посветеност ја чуваат безбедноста на земјата. Полските вооружени сили остануваат во постојана готовност да реагираат на секоја закана и да го заштитат суверенитетот на националниот воздушен простор“, се наведува во соопштението.Инцидентот се случил во меѓународниот воздушен простор, а засега Кремљ не се огласил, ниту пак за настанот известиле руските државни медиуми.

Свет | пред 5 месеци

„Ако Русија го нападне Брисел, ќе ја срамниме Москва со земја“ – порака на белгискиот министер за одбрана

Белгискиот министер за одбрана Тео Франкен во интервју за „The Brussels Times“ изјави дека евентуален напад на Русија врз Брисел би значел директен удар врз НАТО, по што Алијансата би реагирала со уништување на Москва.„Не се плашам дека Путин би нападнал конвенционално, бидејќи тоа би било удар во срцето на НАТО. А тогаш, ние би ја срамниле Москва со земја“, рече Франкен, нагласувајќи ја својата верба во членот 5 од Северноатлантскиот договор – клаузулата што гарантира колективна одбрана на сите членки.Франкен изрази силна поддршка за американската улога во рамките на Алијансата и оцени дека американскиот претседател Доналд Трамп би го почитувал членот 5 доколку дојде до напад.„Секако дека би го почитувал. Во Европа има многу предрасуди кон американската влада, но нема причина да се сомневаме во нивната посветеност“, изјави министерот.Белгискиот министер оцени дека вистинската опасност не лежи во конвенционален напад, туку во т.н. „хибридно војување“ – комбинација од пропаганда, дезинформации и локални конфликти.„Повеќе ме загрижува сценарио во кое ‘мали зелени луѓе’ ќе поттикнат рускојазично малцинство во Естонија против ‘нацистички режим’. И пред да сфатите – дел од земјата е анектиран“, предупреди Франкен.Франкен категорично ја отфрли идејата за заедничка европска војска, оценувајќи ја како „продажба на магла“. Според него, државите кои не успеваат да се договорат дури ни околу набавка на опрема, немаат реална можност да интегрираат сопствени вооружени сили.„Среќа што го имаме НАТО – тој повторно ја докажа својата ефикасност со воздушната одбрана во Полска и Естонија“, додаде тој.

Свет | пред 5 месеци

Притвор за директорот на „Комунална хигиена“ и неговиот соработник – осомничени за загрозување на животната средина

Судија на претходна постапка при Основниот кривичен суд – Скопје го прифати предлогот на Обвинителството и определи мерка притвор во траење од 30 дена за директорот на ЈП „Комунална хигиена“, Сабахадин Рустеми, и уште едно лице од раководството на претпријатието – А.С.Двајцата се осомничени за кривично дело „загрозување на животната средина и природата со отпад“, казниво по член 230 став 1 од Кривичниот законик, за што е предвидена и затворска казна.„Судија на претходна постапка постапувајќи по предлог на ОЈО Скопје за определување мерка притвор против две лица, по нивното произнесување во присуство на јавен обвинител и нивни бранители, донесе решенија со кои го прифати предлогот и на двете лица им определи мерка притвор во траење од 30 дена,“ соопштија од Кривичниот суд.Судот ја образложи одлуката со тоа што постојат основи за опасност осомничените да ја попречат истрагата, да влијаат врз сведоци или да го повторат делото, односно по член 165 став 1, точки 2 и 3 од Кривичниот законик.Постапката против нив започна по наредба на Основното јавно обвинителство – Скопје, кога полициски службеници спроведоа акции за обезбедување докази поврзани со управувањето со отпад и постапувањето на претпријатието во делот на заштита на животната средина.„Во однос на ова, лицата се задржани и постапката е во тек. Штом имаме повеќе детали, јавноста ќе биде известена,“ изјавија од Обвинителството за Скопје1.Против решението на судот странките имаат право на жалба пред Кривичниот совет на истиот суд.

Македонија | пред 5 месеци

Голем интерес за вакцинација против сезонски грип – над 70 илјади пријавени, 22 илјади веќе вакцинирани

Министерството за здравство информира дека интересот за вакцинација против сезонски грип континуирано расте. Досега се пријавени над 70 илјади граѓани, а вакцинирани се повеќе од 22 илјади лица низ државата.Вакцинацијата се спроведува на 35 вакцинални пункта, од кои пет се во Скопје. Сите заинтересирани граѓани можат да се пријават преку апликацијата vakcinacija.mk или преку својот матичен лекар.Со бесплатната вакцинација се опфатени ризичните категории население, меѓу кои: лица над 65 години, лица со хронични заболувања, здравствени работници, бремени жени, деца од 6 месеци до 5 години, лица сместени во установи за социјална заштита на стари лица и вработените во овие установи.Во организација на Министерството, превентивни тимови од здравствени установи низ државата продолжуваат со теренска вакцинација и во домашни услови за повозрасни и неподвижни лица, како и за лица со попреченост.

Македонија | пред 5 месеци

Како малиот бизнис „Сакаш“ преку Wolt го забрза својот развој

Пет години постои палачинкарата „Сакаш“, бизнис што започна скромно, во мал дрвен киоск од пет квадрати. Гордан Миленковски, тогаш само 19-годишен, ја имал идејата за сезонски бизнис во летните месеци, но наместо тоа „Сакаш“ многу брзо прерасна во постојан дел од скопската гастрономска сцена. „Никогаш не мислевме дека ова ќе стане целогодишна приказна. Почнавме од љубов кон палачинките и желбата да направиме нешто поразлично. Но луѓето реагираа веднаш – и така малата идеја стана голема обврска“, вели Гордан. Иако почетната замисла беше нешто мало и привремено, палачинките на „Сакаш“ станаа вистински хит, производ што не е „само обична палачинка“, туку must try, must eat, must have искуство за различни генерации потрошувачи. „Нашата цел отсекогаш била да направиме палачинка што ќе биде доживување. Не само вкусна, туку и искуство што се памети“, додава Гордан.Токму квалитетот и креативноста во понудата, комбинирани со искрена енергија и посветеност, овозможија „Сакаш“ да создаде лојална база на купувачи кои се враќаат повторно и повторно. Дополнително на тоа, беше фактот што „Сакаш“ од самиот почеток работи на дигитална промоција. Брендот почна да користи социјални мрежи како главна маркетинг алатка за да допре до младата публика и да изгради препознатлива заедница околу себе. Но, ни тоа не беше доволно да се излезе од микро-локалните рамки на првиот капацитет на „Сакаш“ во населба Илинден, иако многумина патуваат и до Илинден за да ги вкусат нивните палачинки.Иако побарувачката постоела од самиот почеток, „Сакаш“ долго време не се осмелувал да воведе достава, чекор што бара сериозна логистика и организација. Пресвртниот момент дојде со партнерството со Wolt, кој ја презеде таа улога и овозможи палачинките да стигнуваат до поширока публика. „Ние знаеме да направиме одлична палачинка, но достава не беше нешто што можевме да го изведеме сами. Кога се појави Wolt, сфативме дека тоа е можност за раст без ризик – ние се фокусираме на вкусот, тие на брзината и сигурноста“, раскажува Гордан.Резултатите не доцнеа - дневниот обем на продажба се зголеми за 20%, а бројот на испечени палачинки порасна. „Откако ќе ја примиме нарачката од Wolt, за девет минути таа е готова и уште за толку време е веќе кај потрошувачот. Верувам дека заедно создадовме најбрза достава во Скопје“, вели тој.Оваа динамика и сигурноста што му ја овозможи доставата, го охрабрија тимот да оди чекор понатаму. „Сакаш“ веќе се подготвува за отворање на нов локал во голем трговски центар, со што и бројот на вработени порасна над 40 млади луѓе, со планови за дополнително проширување на понудата. „За нас ‘Сакаш’ не е само бизнис, ние градиме енергија и култура. Тимот е млад, мотивиран и знае да работи, но и да се дружи. Сакаме луѓето да доаѓаат на работа со насмевка, затоа често организираме тим билдинзи. Веруваме дека кога тимот е среќен, и палачинките имаат поубав вкус“, вели Гордан со насмевка.Приказната на „Сакаш“ е пример како мал бизнис, со вистинска идеја, квалитет и соодветна поддршка, може да израсне во перспектива за поширок раст. Од мал киоск до бренд со препознатливо име, од сезонски план до целогодишен успех, „Сакаш“ докажа дека кога зад производот стои визија и љубов, палачинките можат да бидат многу повеќе од обичен десерт – тие стануваат дел од културно искуство што градот го прифаќа како свое.

Магазин | пред 5 месеци

(Видео) Земјотрес со јачина од 6,1 степени ја погоди Турција

Силен земјотрес со јачина од 6,1 степени според Рихтеровата скала, вечерва ја погоди западна Турција.Земјотресот е регистриран на 27 октомври во 19:48:29 часот UTC, односно 22:48:29 часот по локално време.Епицентарот бил на 62 километри југоисточно од Баликешир и 10 километри јужно од Синдирги.Земјотресот предизвикал продолжено тресење кое предизвикало паника и страв кај жителите на погодените подрачја. Долгото траење на земјотресот ја зголемило загриженоста бидејќи луѓето ги напуштале зградите и барале сигурност.Според официјалните податоци, едно лице загинало, додека најмалку 29 лица се повредени, претежно полесно. Локалните власти наведуваат дека повеќе од 15 згради се уништени или тешко оштетени во земјотресот, главно во Синдирги и околните области.

Свет | пред 5 месеци

9-годишно дете оставено само во Тетово – таткото го донел за питачење

Полицијата утврдила дека 9-годишното дете, пронајдено само пред угостителски објект во Тетово, е дел од организирана група која присилува малолетници да питачат.Според информациите од Министерството за внатрешни работи, на 24 октомври 2025 година во 01:30 часот, жител на Тетово пријавил дека пред локал на улицата „Маршал Тито“ пронашол дете кое било изгубено и не комуницирало.„Веднаш било постапено по пријавата и било утврдено дека станува збор за малолетник од населбата Шуто Оризари – Скопје. Неговиот татко, Е.М., заедно со други деца со комбе бил донесен во Тетово за питачење. Околу 22 часот, комбето со останатите деца се вратило во Скопје, а него го заборавиле“, информираа од МВР.На местото интервенирале претставници од Центарот за социјални работи – Тетово, кои по документирањето на случајот го предале детето на колегите од ЦСР – Скопје.Од полицијата велат дека се преземаат мерки за целосно расчистување и документирање на случајот, со фокус на идентификација на организаторите на мрежата која експлоатира деца за питачење.

Македонија | пред 5 месеци

Албанија го претстави првиот „вештачки интелигентен кабинет“: AI министерката Диела „очекува“ 83 дигитални наследници

Албанскиот премиер Еди Рама ја шокираше јавноста со објава дека нивната министерка за вештачка интелигенција, Диела, е „бремена“ и ќе „роди“ 83 дигитални потомци – виртуелни асистенти создадени за да им помагаат на пратениците од Социјалистичката партија.Според Рама, секој од овие AI асистенти ќе биде задолжен за водење парламентарни записи, изработка на предлози за политики и анализа на податоци при донесување одлуки.„Овие деца ќе ја познаваат својата мајка“, изјави Рама, објаснувајќи дека сите 83 системи ќе бидат поврзани со централната мрежа на Диела, овозможувајќи им да соработуваат и заеднички да учат.Премиерот ја опиша иницијативата како револуционерен чекор кон создавање самoodржлив дигитален екосистем, кој ќе ја зголеми транспарентноста и ефикасноста на парламентот.Името Диела, што на албански значи сонце, не припаѓа на вистинско лице, туку на напреден систем на вештачка интелигенција, создаден специјално за албанската влада. Таа стана првата виртуелна министерка во светот, именувана во мај 2025 година.Главната задача на Диела е борба против корупцијата во државните тендери – преку алгоритми кои вршат надзор, евалуација и одлуки ослободени од човечка пристрасност. Таа ги анализира сите јавни набавки според критериуми на транспарентност, ефикасност и законитост.Рама ја нарече оваа технологија „оружје против системската корупција“, додавајќи дека „со Диела, тендерите ќе бидат 100% дигитални и проверливи“.Раминиот опис на „бремена министерка“ е, секако, симболичен: 83-те „потомци“ се AI единици, програмирани да опслужуваат пратеници, да бележат податоци, да следат говори и да генерираат извештаи во реално време.Албанија на овој начин развива поврзан систем на интелигенции што може со тек на време да еволуира во целосно автоматизиран административен модел.Веста предизвика мешани реакции.Додека дел од експертите го пофалија потегот како визионерски чекор во борбата против корупцијата, други предупредија на етички ризици – прашувајќи се кој ќе биде одговорен ако „Диела“ или нејзините „потомци“ направат грешка во одлуките.„Интелигенцијата може да биде алгоритамска, но одговорноста мора да остане човечка,“ коментираше еден европски експерт за дигитална етика.

Свет | пред 5 месеци

Костадинов: Продолжувам натаму, од срце за Струмица

Досегашниот градоначалник на Струмица, Костадин Костадинов, кој не го криеше незадоволството бидејќи неговата партија не го кандидираше за втор мандат, денеска ја предаде функцијата на нивоизбраниот Петар Јанков, му честиташе и напиша на ФБ, но без збор за досегашните несогласувања со СДСМ:„Секој мандат има свој почеток и крај.Денес, функцијата Градоначалник на општина Струмица му ја предадов на новоизбраниот Градоначалник, Петар Јанков.Јавно му пожелувам, пред сѐ многу здравје и секако, успех во работењето, затоа што посветеноста на таткото на општината е секогаш успех за Струмица.Сакам да го охрабрам да ја согледа и препознае визијата за Струмица како модерен, европски и зелен град, визија ина цела генерација Струмичани која верува во подобра иднина тука, дома.Огромна чест и задоволство е да се води општина како Струмица и верувам дека со мојата јасна визија успеав да ги исполнам очекувањата на сите Струмичани. Заедно со мојот тим, во изминатите четири години ја создадовме најдобрата верзија на нашата Струмица. Проектите и резултатите се евидентни, а голем дел оставаат и траен белег во развојот на општината.Се надевам дека со довербата која ја добив од струмичанки и струмичани ги исполнив нивните очекувања, а тие го препознаа вложениот труд и ангажман и денес ги живеат резултатите од мојот градоначалнички мандат. Во оваа прилика благодарам на сите за поддршката, но и за критиките кои секогаш нè прават подобри.За сѐ има вистинско време и место. Да ги видиш и да ги согледаш е доблест, а да делуваш е моќ.Кон нови победи и успеси, продолжувам понатаму, од срце за Струмица“.

Македонија | пред 5 месеци

По 20 години градиначалник од ВМРО-ДПМНЕ седна во престижната фотелја

Кандидатите за градоначалници кои победија во првиот круг вече седнаа во градоначалничките фотелји.Во Струмица досегашниот градоначалник, Костадин Костадинов му ја отстапи функцијата на новоизбраниот Петар Јанков.Јанков го доби уверението од ОИК и од денеска официјално е нов градоначалник на Струмица.ВМРО-ДПМНЕ по цели 20 години победи во овој град и тоа уште во првиот круг.Јанков го доби уверението за четиригодишниот мандат за градоначалник од претседателката на Општинската изборна комисија, Елисавета Пецева.Претходно и новоизбраните членови на Советот на општина Струмица ги примија уверенијата од Општинската изборна комисија, а деновиве се очекува и свикување на првата конститутивна седница на Советот на општина Струмица.

Македонија | пред 5 месеци

СНС се заканува: Ќе реагираме на насилство на 1 ноември, Академскиот пленум бара Вучиќ да се откаже од насилството

Се вжештува атмосферата во Србија пред 1 ноември, на годишнината од падот на настрешницата во Нови Сад кога погинаа 16 лица.Претседателот на Српската напредна партија, Милош Вучевиќ, изјави дека државата ќе реагира на „секоја форма на насилство“ доколку на 1 ноември во Нови Сад дојде до инциденти за време на собирот.Во истиот настап, зборувајќи за барањето на студентското движење за вонредни избори, порача дека се залага изборите да се одржат кон крајот на 2026.Академски пленум пак ја повика власта да се откаже од насилството кое според нив, го подготвува на 1 ноември за време на одбележувањето на годишнината од несреќата.Тие укажуваат на подготвеноста на оваа влада, во како што велат сопствената беспомошност, да испрати провокатори и маскирани фигури на комеморативна прошетка што ќе се обиде да предизвика немири.,,Затоа, ги повикуваме да се откажат од ваквите намери, студентите и сите присутни граѓани ќе сторат сè што можат за да се осигураат дека комеморативниот собир ќе помине мирно и достоинствено, а сите потенцијални провокатори ќе бидат изолирани и идентификувани.Доколку се случи какво било насилство, единствениот виновник и единствениот одговорен ќе биде – лично Александар Вучиќ“, порачаа од Академски пленум.

Свет | пред 5 месеци

За Мицкоски локацијата на болницата „8-ми Септември“ е идеална за нов Клинички центар

Повторно се актуелизира прашањето за нов клиничкк центар. Локацијата на ГОБ „8 Септември“ на премиерот Христијан Мицкоски му изгледа како одлична за нов клинички центар бидејќи има три булевари, гасна поврзаност, сепак последниот збор ги остава да го кажат експертите.Премиерот чека да завршат локалните избори за да распише повик за финансиски институции што ќе понудат кредити за болниците во Штип, Тетово и во Кичево, а веднаш потоа како следен чекор најави дека со партнерите од Обединетото Кралство ќе работат на нов клинички центар во Скопје.„Чекор по чекор. Сега првин да завршат локалните избори, па да се распише јавен повик за финансиски институции за болниците, кои се поврзани со договорот влада со влада со Обединетото Кралство. Да заживее тоа, па следно е големиот клинички центар. Инаку, навистина овде изгледа како одлична можност, одлична локација – три булевари, гасна поврзаност, сообраќајна поврзаност”, рече премиерот Мицкоски денес одговарајќи на новинарски прашања по посетата на болницата „8 Септември“, во која почна да функционира хибербарната комора за третман на хронични рани, дијабетично стапало, изгореници, како и поддршка за пациенти од пластична хирургија, пулмологија, а ќе функционира и како поддршка за спортисти.Премиерот Мицкоски ги повика експертите и Министерството за здравство да направат анализи за новиот клинички центар во Скопје за потоа Владата да излезе со конкретен став.

Македонија | пред 5 месеци

(Видео) Двајца полицајци уапсени за филмскиот грабеж на златарница во Гостивар

Двајца полициски службеници од ОВР Кичево се уапсени поради сомнение дека учествувале во оружано разбојништво во златарница во Гостивар, при што беа одземени околу 18 килограми злато, соопшти Министерството за внатрешни работи.„Министерството за внатрешни работи до Основното јавно обвинителство Гостивар поднесе кривична пријава против две лица поради сомнение дека како соизвршители учествувале во извршување на кривично дело ‘разбојништво’ по член 237 став 4 во врска со став 1 од Кривичниот законик. Осомничените се лишени од слобода во текот на вчерашниот ден“, велат од МВР.Според истрагата, разбојништвото се случило на 10 октомври 2025 година, кога двајцата осомничени полицајци, заедно со засега непознати лица, влегле во златарница во центарот на Гостивар и со закана со огнено оружје ја ограбиле.Осомничените, кои биле активни полициски службеници, претходно планирале и координирале дел од нападот. Тие извршиле извидување на локацијата два дена пред грабежот, следејќи го движењето и навиките на вработените во златарницата. На денот на нападот, со службено возило на МВР, го обезбедувале патот за движење на возилата користени при грабежот.Едно од возилата потоа било пронајдено запалено на магистралниот пат Гостивар–Дебар, а другото напуштено во Кичево, во близина на сточниот пазар.„МВР, во координација со Основното јавно обвинителство Гостивар, презема мерки и активности за целосно расчистување на случајот“, соопштија од Министерството.Според изворите, се трага по уште најмалку две лица кои се поврзуваат со грабежот, а истрагата треба да утврди дали биле вмешани и други припадници на полицијата.

Македонија | пред 5 месеци

Доаѓа период на суво и стабилно време со студени утра, но повисоки дневни температури

Под влијание на стабилна воздушна маса, во наредните денови не очекува суво и стабилно време.Како што прогнозира Управата за хидрометеоролошки работи, од утре утринската температура ќе се спушти под нулата, а во одредени котлини ќе има појава на магла.Врнежите што ја зафатија земјава, денеска попладне насекаде ќе престанат, а облачноста ќе се намали. Во западните делови од државава до крајот на денов ќе дува слаб до умерен ветер од западен и југозападен правец, а во источните слаб ветер од променлив правец.Тепмературите ќе бидат во пораст.Планинските котлини и источниот регион наутро ќе бидат свежи (понекаде до 0 °C), но попладнињата ќе се искачуваат до 18–21 °C, а за викендот најтопло ќе биде во Пелагонија, Скопската Котлина и југоистокот до 21 °C.

Македонија | пред 5 месеци

Јаневска: Секоја успешна образовна приказна започнува со наставник кој верува во ученикот

На денешната панел-дискусија во Прилеп, дел од кампањата „Магијата е во знаењето“, од различни перспективи се зборуваше за суштината на наставничката професија и за тоа што навистина значи да се биде добар учител.Наставник што верува во секое дете, што станува глас на охрабрување, водич низ секојдневието и сојузник во учењето, токму такви примери беа во фокусот на денешната панел - дискусија што се одржа во Прилеп, во рамки на националната кампања „Магијата е во знаењето“, која ја спроведува Министерството за образование и наука.Панел-дискусијата со наслов „Добриот наставник прво е пријател, па потоа учител – Магијата на ‘Добро утро, деца’“ собра наставници, стручни лица, родители и претставници на академската заедница, кои од различни перспективи зборуваа за суштината на наставничката професија и за тоа што навистина значи да се биде добар учител.Во своето обраќање, министерката за образование и наука проф. д-р Весна Јаневска, ја нагласи исклучителната улога на наставниците не само како пренесувачи на знаење, туку и како личности што со својата посветеност, емпатија и личен пример оставаат неизбришлива трага во животите на младите.„Секоја успешна образовна приказна започнува со наставник кој верува во ученикот. Кога едно дете ќе почувствува дека некој со внимание го гледа, го слуша и верува во неговиот потенцијал, тогаш се случува вистинска промена. Нашата мисија е да го зајакнеме системот кој ги препознава и цени наставниците, а преку оваа кампања, сакаме не само да ја потврдиме нивната важност, туку и да го вратиме достоинството на професијата што ја гради иднината“, истакна Јаневска.Министерката потенцираше дека со потпишувањето на спогодбата со СОНК, Владата обезбеди гаранција за континуиран годишен раст на платите на наставниците, кој ќе биде реален и ќе зависи од степенот на инфлација. Додаде и дека овозможен е кариерен развој на наставниците и стручните соработници преку повиците за напредување во звања ментор и советник не само во основните, туку за прв пат годинава и во средните училишта.Проф. д-р Данче Сивакова Нешковски, декан на Педагошкиот факултет во Битола, рече дека добриот наставник е оној кој пред сѐ умее да слуша, да разбере и да создаде врска со секое дете, а дури потоа да предава.Наставниците и стручните лица од основните и средните училишта во Прилеп говореа за секојдневните предизвици во работата, но и за моментите кои им се показател дека нивниот труд прави разлика. Родителите истакнаа дека вистинскиот наставник е оној што детето го гледа како сојузник, а училиштето како средина што го поддржува и инспирира детето.Денешната панел-дискусија е дел од националната кампања „Магијата е во знаењето“, во чии рамки се реализираат низа активности, од јавни настани и тематски собири, до едукативни видеа, интерактивни работилници и вклучување на широк круг чинители од образовниот и општествениот живот.Преку овие активности, се настојува да се создаде поширока општествена поддршка и разбирање за значењето на наставничката улога. Фокусот е ставен на тоа наставниците да добијат поголема видливост, почит и поддршка, како луѓе кои секојдневно вложуваат знаење, труд и посветеност во воспитувањето и образованието на новите генерации и кои претставуваат двигатели на напредокот на секое општество.(ПР)

Македонија | пред 5 месеци

Ќе има шут-карта од раководството: СДСМ подготвува кадровски промени

Претседателот на СДСМ, Венко Филипче, изјави дека партијата покажала видливи резултати од процесот на внатрешна консолидација, особено во општините каде што освоила градоначалнички мандати и во оние каде што влегла во вториот изборен круг.„Јас лани ја затекнав партијата во тешка и лоша состојба. Во изминатата година и пол работев со илјадници членови преку директни средби и контакти. Овие избори се показател за ефектите од таа работа – таму каде што имаме градоначалници и каде што одиме во втор круг, бројот на гласови е зголемен за 50 проценти во споредба со минатите избори“, изјави Филипче.Тој посочи дека консолидацијата е видлива, но дека постои потреба од дополнителна работа во дел од скопските општини, каде резултатите не биле на посакуваното ниво.„По еден таков тежок пораз лани, сега овие избори се показател како треба да се поставиме и да функционираме во следниот период. Таму каде што немавме резултати, ќе продолжиме со интензивна работа“, рече тој.Филипче најави и квалитативни кадровски промени во раководството на СДСМ, кои, како што најави, ќе бидат објавени по завршувањето на изборниот процес.„Ќе има политички и кадровски промени во раководството, за што јавноста ќе биде навремено известена“, истакна Филипче, додавајќи дека во многу општини партијата работела во тешки услови и под притисоци.„Имаше сериозни притисоци во сите општини каде се одвиваа избори – непосредно пред гласањето, каде што имавме градоначалници имаше финансиски контроли и нудење пари за гласови. Работевме во исклучително тешки околности“, нагласи тој.Лидерот на СДСМ додаде дека, иако е на чело на партијата само година и пол, резултатите покажуваат напредок и нова енергија во базата.„Не може преку ноќ да има промени, но во некои општини видовме дека тоа е можно. Тоа ми даде ентузијазам да продолжам да работам и понатаму“, рече Филипче.

Македонија | пред 5 месеци

Кого ќе поддржи СДСМ во втор круг во Скопје, Кичево, Брвеница? Нема да биде клучно дали се Македонци, Албанци, Бошњаци...

Претседателот на СДСМ, Венко Филипче, изјави дека партијата ќе ја донесе конечната одлука до средината на следната недела за тоа кого ќе поддржи во општините Кичево и Брвеница, каде што нема сопствени кандидати за градоначалници, но и за Скопје Карпош и Куманово.Филипче нагласи дека, иако дел од политичките партии повикуваат гласањето да се води според етничката припадност, СДСМ нема да ја базира својата одлука на етнички критериуми.„Мислам дека мултиетничкиот карактер на нашата земја и добрите односи треба да останат приоритет. Факт е дека граѓаните често гласаат по етничка линија, но тоа нема да биде критериум за нас. Во следните неколку денови ќе донесеме одлука со кого ќе коалицираме. Најдоцна до среда“, изјави Филипче.Тој додаде дека одлуката ќе зависи од повеќе фактори, пред сè од состојбата на општинските организации и расположението на членовите на партијата на локално ниво.„Како ќе коалицираме и кого ќе поддржиме таму каде што немаме кандидати, ќе зависи од тоа каква е нашата организација и ставот на луѓето кои се таму членови. Ако нешто не биде критериум, тоа е етничката припадност“, нагласи тој.Филипче истакна дека одлуката нема да се однесува само на Кичево и Брвеница, туку и на други општини, меѓу кои Скопје, Карпош и Куманово.„Не е само во Кичево и Брвеница. Ќе видиме како ќе се поставиме и во другите општини. Дозволете до среда да го кажеме нашиот став“, рече тој.Во однос на разговорите со други партии, лидерот на СДСМ додаде дека тие се одвиваат во две насоки – каде на СДСМ ѝ е потребна поддршка и каде партијата би можела да даде поддршка.„Разговорите се во тек и ќе бидат завршени утре или најдоцна во вторник“, истакна Филипче.

Македонија | пред 5 месеци

Пожар во камп приколка, грабеж и исчезнато лице – полициски билтен за Скопје

Во полицискиот билтен на Министерството за внатрешни работи се евидентирани неколку инциденти на подрачјето на Скопје – пожар, физички напади, нарушување на јавниот ред и мир и пријавено исчезнато лице.Вчера, околу 17:20 часот, во камп приколка поставена на нива во атарот на селото Долно Лисиче, во која престојувал В.Н. (68), избувнал пожар. Нема повредени лица, а пожарот бил изгаснат од екипа на Бригадата за противпожарна заштита – Скопје. Увид на местото извршила екипа од СВР Скопје.Ноќеска околу 00:37 часот, 40-годишниот Н.И. од Скопје пријавил дека два дена претходно, на 24 октомври околу 21 часот, на подрачјето на Бит Пазар, бил нападнат од неколку машки лица кои со употреба на физичка сила му одзеле чанта со документи, мобилен телефон и пари. Полицијата презема мерки за целосно расчистување на случајот.Вчера во 08:05 часот, 32-годишна жена од Скопје пријавила дека околу 06:30 часот, во нејзиниот дом во Кисела Вода, била физички нападната од нејзиниот поранешен партнер, 31-годишниот М.Т. од Скопје.По документирање на случајот, ќе следи соодветен поднесок до надлежните органи.На 25 октомври во 22 часот, 28-годишна жена од Скопје пријавила дека околу 17 часот, на подрачјето на Чаир, нејзината малолетна ќерка била физички нападната од две малолетнички, кои таа ги познавала, додека трето лице го снимало нападот со мобилен телефон. Полицијата работи на утврдување на идентитетот на лицата и расчистување на случајот.На 25 октомври околу 18:30 часот, по претходна сообраќајна несреќа во селото Средно Коњари (општина Петровец), бил нарушен јавниот ред и мир со физичка пресметка меѓу шест лица. Во инцидентот учествувале Ш.М. (47) од една страна и А.Ќ. (38), Е.Ќ. (62), А.Ќ. (71), И.Ќ. (54) и А.Ќ. (26) од другата. При пресметката бил употребен и тврд предмет. По целосно документирање на случајот ќе следуваат кривични пријави.На 25 октомври во 12 часот, во Полициската станица Карпош, 69-годишниот И.Т. од Скопје пријавил дека од семејниот дом се оддалечила неговата сопруга А.Т. (54), која имала здравствени проблеми и и претходно се оддалечувала, по што била пронајдена и вратена.Полицијата презема мерки за нејзино пронаоѓање.

Скопје | пред 5 месеци

Левица обвинува: Рамадани од ВРЕДИ глорифицирал Илирида, се шири етничка омраза

Од партијата Левица реагираа со остро соопштение во кое обвинија дека кандидатите на ВРЕДИ шират шовинистички пораки и создаваат етнички тензии, особено кандидатот за градоначалник на Брвеница, Хаќим Рамадани.„Скандалозните изјави на кандидатот за градоначалник на Брвеница од ВРЕДИ – Хаќим Рамадани, предизвикуваат етнички тензии и шират национал-шовинизам, во очигледно отсуство на проекти и визија за развој на сопствената општина. Рамадани, во јавно обраќање од дијаспората, наместо да зборува за проекти, со шовинистичка реторика го глорифицираше сепаратизмот на Илирида, со што директно промовира национална и етничка омраза против македонскиот народ“, стои во реакцијата на Левица.Од партијата додаваат дека Рамадани потврдил обединување со ДУИ во вториот круг против кандидатот на ВМРО-ДПМНЕ, што, според Левица, ја покажува „сервилноста на Мицкоски кон помалиот коалиционен партнер“.„Иако Мицкоски предводи влада со апсолутно мнозинство, иако целиот политички наратив со кој ја доби поддршката на народот беше дека неговата влада нема да ‘коленичи’, ДПМНЕ ги остави Тетово, Гостивар и Струга без свои кандидати за градоначалници“, порачуваат од Левица.Според нив, ваквите „штетни наративи од политичари заглавени во минатото“ создаваат само поделби и нетрпеливост, додека граѓаните масовно ја напуштаат земјата поради сиромаштија и корупција.„И на сите овие анти-македонски изјави, кои го понижуваат достоинството на македонскиот народ, Мицкоски одбира да молчи за да го сочува мирот во сопствената влада.Левица јавно прашува: дали Мицкоски ќе биде само нем набљудувач пред изјавите на неговите коалициони партнери, кои директно шират омраза против македонскиот народ и глорифицираат сепаратизам против унитарниот карактер на Републиката?“, се вели во реакцијата на Левиц

Македонија | пред 5 месеци

(Видео) Косовски пратеник на плоштад во Приштина истепа случаен минувач оти го нарече лажго

Инцидент меѓу пратеникот на Демократскиот сојуз на Косово, Арменд Земај, и еден граѓанин од дијаспората денеска го привлече вниманието на косовската јавност.Настанот се случил додека Земај давал интервју на плоштадот, кога минувачот се доближил и го нарекол „лажго“.Пратеникот реагирал бурно и физички го нападнал човекот.На видеото објавено од „Газета Блиц“ се гледа моментот кога Земај зборува пред камерите, додека граѓанинот во позадина довикува: „сите сте лажговци“ и „лажете“. Земај му возвратил со прашањето „кого лажеш“, по што, кога минувачот се приближил, го удрил.По инцидентот, Земај се огласи на својот Фејсбук-профил, изразувајќи жалење и извинување за случката.Косовската полиција потврди дека инцидентот навистина се случил, а реакциите во јавноста не изостанаа.

Свет | пред 5 месеци

(Видео) „ТикТок“ снимка откри колкав хаос може да настане со еден клик – секој може да гаси семафори во Скопје?

Видео објавено на „ТикТок“ од булеварот „Партизански одреди“ предизвика бурни реакции, откако во него се гледа како објавувачот, стоејќи покрај отворено сандаче со прекинувач за струја, експериментира со вклучување и исклучување – за да види што ќе се случи со семафорите.Во описот на видеото стои прашањето: „За што служи прекидачов?“, а коментарите под објавата се движат од саркастични до остро предупредувачки.„Ме чуди еден нема од коментарите дека за ова може кривично да одговараш, а најмногу тие што го оставиле отворено! Ќе се помеша тајмерот на семафорите и ќе направиш хаос!“, напиша еден од корисниците.Објавувачот, кој на „ТикТок“ се потпишува како „Катеблане“, се обиде да се оправда, но доби дополнителни предупредувања дека манипулацијата со таков прекинувач претставува кривично дело и може да има сериозни последици.Еден корисник додаде: „Често ги гледам дечиштана од ГУЦ, ќе поминат и еден паметен да се направи фраер, го штрака прекидачот и ги гаси семафорите. Несвесен дека може да предизвика сообраќајна несреќа“.На крајот, објавувачот реагираше со циничен тон: „Не кликам повеќе и ако е толку страшно, залепете ги со супер лепак.“Проблемот со незаштитените сандачиња за семафори не е нов. Пред три години, по трагичната смрт на Викторија Николова кај „Сити мол“, телевизија „Код“ откри дека семафорите биле исклучени преку вакво сандаче, но ниту една институција не презеде одговорност. Тогаш беше утврдено дека овие прекинувачи често се користат од лица што мијат стакла, но и од деца и тинејџери, без никаква контрола.И покрај бројните јавни реакции и апели, отворените електрични сандачиња сè уште стојат на повеќе фреквентни локации низ Скопје, оставајќи ја безбедноста на сообраќајот – во буквална смисла – во рацете на случајни минувачи.

Скопје | пред 5 месеци