УКРАИНА

Зеленски ја отфрли идејата за 40-километарска тампон-зона во Украина

Идејата за создавање 40-километарска тампон-зона меѓу руските и украинските линии на фронтот како дел од можен мировен договор за завршување на војната во Украина предизвика жестоки реакции, а украинскиот претседател Володимир Зеленски ја отфрли оценувајќи дека таков предлог не ја одразува реалноста на современото војување.„Само оние кои не го разбираат технолошкото ниво на денешната војна предлагаат тампон-зона,“ изјави Зеленски, нагласувајќи дека во пракса ваква зона веќе постои поради масовната употреба на дронови.Тој појасни дека тешкото вооружување на двете страни веќе се наоѓа на повеќе од 10 километри едно од друго токму поради ризикот од напади со дронови.„Овој тампон – јас го нарекувам ‘мртва зона‘, некои го викаат ‘сива зона‘ – веќе постои,“ рече украинскиот претседател.Зеленски категорично одби можност Украина да се откаже од делови од својата територија во рамки на таков договор: „Ако Русија сака поголема оддалеченост од нас, може да се повлече длабоко во привремено окупираните територии на Украина.“Тој додаде дека Москва не е подготвена за вистинска дипломатија и дека единствено бара начини за одолговлекување на крајот на војната.Во меѓувреме, европските лидери разгледуваат опции за обезбедување безбедносни гаранции за Украина во случај на договор со Русија. Високата претставничка на ЕУ, Каја Калас, порача дека министрите за одбрана на Унијата се согласиле дека поддршката за Киев мора да биде „робусна и веродостојна“. Зеленски најави продолжување на разговорите веќе следната недела за обврски „слични на НАТО“ кои би обезбедиле сигурност за Украина.Од Москва, портпаролката на руското Министерство за надворешни работи, Марија Захарова, ги оцени најновите западни предлози како „еднострани“ и насочени кон обуздување на Русија.

Свет | пред 7 месеци

Војната не се приближува кон крај „ако се погледне што прави Путин“, вели висока претставничка на ЕУ

Високата претставничка на Европската унија за надворешна политика и безбедност, Каја Калас, остро ги осуди масовните воздушни напади врз Киев, во кои загинаа повеќе од десет лица, меѓу кои и деца. Таа порача дека единствениот одговор на агресијата мора да биде поголем притисок врз Москва.„Овие напади покажуваат дека Путин се потсмева на секој вид мировен напор“, изјави Калас во Копенхаген, каде што започна дводневниот состанок на министрите за одбрана и надворешни работи на ЕУ. „Она што мора да го направиме е да го зголемиме притисокот врз Русија“, нагласи таа, додавајќи дека нови санкции кон енергетскиот сектор и финансиските услуги би ја погодиле Москва најсилно.Калас ги повика членките на Унијата да продолжат со воената поддршка за Киев, истакнувајќи: „На Украина сега ѝ е потребна сета можна воена помош.“Министрите во главниот град на Данска ќе разговараат и за безбедносните гаранции за Украина по завршувањето на борбите. Според Калас, можно е Европската унија да обезбеди поддршка преку продолжување на обуката на украинската војска, зајакнување на домашната одбранбена индустрија и обврски од страна на поединечни земји членки.Таа призна дека војната не се приближува кон крај „ако се погледне што прави Путин“.

Свет | пред 7 месеци

Politico: Европа разгледува воена тампон-зона во Украина

Европската унија разгледува поддршка за воспоставување тампон-зона широка 40 километри на украинска територија како дел од напорите за прекин на војната, објави Politico повикувајќи се на пет европски дипломати. Идејата се разгледува како можност за прекин на огнот или како дел од поствоен договор меѓу Украина и Русија, но во овие разговори засега не учествува Вашингтон.Разговорите доаѓаат во време кога американскиот претседател Доналд Трамп ги интензивира напорите за мировен договор. На 15 август тој се сретна со Владимир Путин на Алјаска, а неколку дена подоцна и со украинскиот претседател Володимир Зеленски и европски лидери во Белата куќа. „Сите се обидуваат што побрзо да обезбедат гаранции за безбедност, за да не се предомисли Трамп“, изјавил еден дипломат. Притоа, предложената тампон-зона најверојатно би значела територијални отстапки од страна на Украина, но засега е неизвесно дали Киев би прифатил ваков план.Дел од европските земји предупредуваат дека вакво решение може да донесе повеќе ризици отколку придобивки и да ги изложи украинските градови на нови руски напади. Источните членки на НАТО, предводени од Полска, се загрижени дека масовно присуство на војници во Украина би можело да ја ослаби одбраната на самиот источен фронт на Алијансата.Според првичните проценки, меѓу 4.000 и 60.000 војници би можеле да бидат распоредени како мировни сили, при што Франција и Велика Британија се разгледуваат како носечки држави во операцијата. Освен обезбедување на зоната, мисијата би вклучувала и обука на украинската армија. САД јасно соопштија дека нема да испратат свои трупи, но се подготвени да дадат техничка поддршка.И покрај дипломатските напори, Русија продолжува со напади. Кремљ го доведува во прашање легитимитетот на Зеленски, а министерот за надворешни работи Сергеј Лавров порача дека Москва нема да прифати негов потпис на правни документи. Само како потврда на таквиот став, во масовен ракетен напад врз Киев во ноќта на четвртокот беа убиени најмалку 23 лица, меѓу кои и четири деца, а повредени се 63 граѓани.

Свет | пред 7 месеци

Турција: Русија го сменила условот за крај на војната во Украина

Турскиот министер за надворешни работи Хакан Фидан изјави дека Турција не учествувала на последните состаноци за војната во Украина, бидејќи не е страна во конфликтот и настапува како неутрален посредник. „Ние не сме страна во војната. Немавме потреба да бидеме ниту на Алјаска ниту во Вашингтон, бидејќи претседателот Трамп ги собира завојуваните страни“, рече Фидан во интервју за турската телевизија TGRT Haber.Тој изрази надеж дека постои простор за мир меѓу Русија и Украина, потсетувајќи дека дел од ставовите договорени во третиот круг преговори во Истанбул се појавиле и во разговорите на Алјаска. „Имаме доволно причини за надеж“, истакна Фидан.Министерот прецизираше дека Москва ја променила својата првична позиција. „Порано Русија бараше целосна контрола врз четири украински региони. Сега се откажале од тие барања и, освен една област, сè друго би останало на постојните линии на фронтот“, рече Фидан.Според него, Русија бара да ѝ се препушти 25 до 30 проценти од Донечката област кои сè уште не се под нејзина контрола. Оценува дека евентуалното губење на овој регион би ја усложнило одбраната на Украина во случај на нови борби.Да потсетиме, на 23 јули во Истанбул беше одржан третиот круг преговори меѓу делегациите на Украина и Русија, на кој беше постигнат договор за нови разменувања – не само на заробени војници, туку и на цивили. Украинската делегација ја предводеше министерот за одбрана Рустем Умеров, а руската Владимир Медински.

Свет | пред 7 месеци

Трамп дозволи продажба на далекуметни ракети за Украина во вредност од 825 милиони долари

Администрацијата на американскиот претседател Доналд Трамп даде зелено светло за продажба на нова класа далекуметни ракети на Украина во вредност од 825 милиони долари, што претставува прв ваков пакет од почетокот на војната. Станува збор за проектили Extended Range Attack Munition (ERAM), со дострел до 400 километри, кои на украинската армија ќе ѝ овозможат да погодува руски цели и инфраструктура стотици километри зад фронтот.Пакетот предвидува 3.350 ракети, соодветна опрема, софтвер за планирање мисии, резервни делови и техничка поддршка. Крајната одлука треба да ја донесе американскиот Конгрес, пренесува Kyiv Post.Финансирањето е предвидено преку меѓународната програма Jump Start, во која учествуваат Данска, Норвешка и Холандија, а дополнителни средства ќе бидат обезбедени преку американската програма Foreign Military Financing. ERAM се смета за ефикасно, но значително поевтино оружје во споредба со класичните крстосувачки ракети, овозможувајќи масовни и прецизни удари по пониска цена.Оваа одлука доаѓа веднаш по новата серија смртоносни руски воздушни напади врз Киев, во кои загинаа најмалку 23 лица, а шест градски квартови останаа во урнатини.

Свет | пред 7 месеци

ЕУ министри на дводневен состанок по најжестокиот руски напад врз Украина

Министрите за одбрана и надворешни работи на Европската унија денеска во Копенхаген започнуваат дводневни разговори за поддршката на Украина и за кризата во Појасот Газа. Состанокот се одржува само еден ден по најжестокиот руски воздушен напад од крајот на јули, во кој загинаа најмалку 21 лице, меѓу нив и деца, а најмалку 48 беа повредени.Првиот ден ќе биде посветен на засилување на воената поддршка за Киев и на унапредување на соработката на ЕУ со украинската одбранбена индустрија, особено поради ограничувањата на американската воена помош. Утрешните разговори на министрите за надворешни работи ќе се фокусираат на нови санкции против Русија, насочени кон притисок врз претседателот Владимир Путин да прифати прекин на огнот и да се вклучи во мировни преговори. ЕУ неодамна ги таргетираше т.н. „сенкови флоти“ за извоз на руска нафта, како и приходите на Москва од енергетскиот сектор.Очекувана тема е и идното обезбедување безбедносни гаранции за Украина, како и користењето на замрзнатите средства на руската централна банка во износ од околу 210 милијарди евра. На разговорите ќе им се приклучат и министрите за надворешни работи на Украина, Исланд, Норвешка и Обединетото Кралство.Вториот ден ќе биде посветен на состојбата во Газа, каде што Европа останува поделена околу односот кон Израел. Франција и Шпанија се залагаат за построг став и можно воведување мерки, додека Германија и уште неколку земји се противат на санкции, повикувајќи на внимателен пристап.

Свет | пред 7 месеци

Бројот на жртви во Киев порасна на 21, меѓу нив и четири деца

Бројот на загинати по руското ракетирање на Киев синоќа се искачи на најмалку 21 лице, соопшти Државната служба за итни ситуации на Украина, пренесе „Скај њуз“. Меѓу жртвите има и четири деца, вклучувајќи и двегодишно.Нападот предизвика значителна штета, меѓу другото и на просториите на Делегацијата на Европската унија и на Британскиот совет во Киев. Сепак, портпаролката на американскиот претседател Доналд Трамп, Каролин Левит, во воведното обраќање на брифингот во Белата куќа воопшто не го спомена нападот, фокусирајќи се наместо тоа на внатрешни теми од САД.На новинарско прашање дали Белата куќа го смета Владимир Путин за пречка за мирот, Левит изјави дека Трамп не е среќен поради нападот, но не е ни изненаден. „Тоа се две земји кои одамна се во војна. Русија го изврши овој напад врз Киев, а од друга страна, Украина неодамна нанесе удари врз руски нафтени рафинерии,“ рече таа.Портпаролката повтори дел од ставовите на претседателот, истакнувајќи дека Трамп сака крај на војната, но „и лидерите на двете земји мора да покажат волја за прекин на судирот“.

Свет | пред 7 месеци

Бројот на жртви во нападот врз Киев се искачи на 12 – меѓу нив и три деца

Бројот на загинати во масовниот руски ноќен напад врз Киев порасна на 12 лица, соопшти градската воена управа. Меѓу жртвите се и тројца малолетници – двајца тинејџери на возраст од 14 и 17 години и едно дете од само две години.Уште 48 лица се повредени, а бројката би можела да расте бидејќи спасувачките екипи и понатаму пребаруваат низ урнатините во потрага по преживеани.Според украинските власти, ова била една од најсилните офанзиви на Москва досега. Русија за една ноќ испалила вкупно 629 проектили и дронови врз 13 локации ширум земјата – 598 беспилотни летала и 31 ракета.Украинските воздушни сили тврдат дека собориле 563 дрона и 26 ракети, но остатоците од нив предизвикале сериозни оштетувања во Киев и уште неколку региони. На главниот град паднале фрагменти на 26 различни места, уништувајќи станбени објекти и предизвикувајќи бројни жртви.„Ова е уште еден брутален напад на Русија, уште едно уништување на цивилни животи – меѓу жртвите се и деца,“ соопштија воздушните сили, изразувајќи сочувство до семејствата на загинатите.Истовремено, украинската армија информира дека нејзини дронови погодиле две руски рафинерии – Афипската во регионот Краснодар и Кујбишевската во Самара. Локалните власти потврдија дека во Афипската рафинерија изби пожар, но засега нема податоци за обемот на штетата.Руското министерство за одбрана, пак, тврди дека во текот на ноќта пресретнало и уништило 102 украински дрона кои целеле најмалку седум региони во земјата.Последните настани уште еднаш ја покажуваат жестината на конфликтот кој трае речиси две години, со сè почести масовни напади врз цивилни цели и значително зголемување на бројот на жртви.

Свет | пред 7 месеци

(Фото) Погодено седиштето на ЕУ во Киев по руски напад: загинаа најмалку 10 лица, меѓи кои и дете

Европската унија денеска остро го осуди масовниот руски напад врз Киев, во кој според најновите податоци загинаа најмалку десет лица, а 38 беа повредени. Меѓу погодените објекти е и седиштето на Делегацијата на ЕУ во Украина.Руските сили ноќта изведоа комбиниран напад со дронови и ракети врз украинската престолнина, оштетувајќи станбени и други згради во седум окрузи. Според властите, меѓу загинатите има и едно дете.Украинскиот претседател Володимир Зеленски изјави дека нападот е јасна порака на Москва кон светот во момент кога американскиот претседател Доналд Трамп вложува дипломатски напори за прекин на војната.„Згрозен сум од уште еден ноќен, смртоносен ракетен напад врз Украина. Моите мисли се со жртвите и со персоналот на Делегацијата на ЕУ, чии простории беа оштетени во овој намерен напад,“ порача претседателот на Европскиот совет, Антонио Кошта.Тој нагласи дека Европската унија нема да се заплаши: „Руската агресија само ја зголемува нашата решителност да бидеме покрај Украина и нејзиниот народ.“И еврокомесарката за проширување, Марта Кос, остро ја осуди агресијата. „Силно ги осудуваме овие брутални напади – јасен знак дека Русија го одбива мирот и избира терор. Изразуваме целосна солидарност со персоналот на ЕУ, нивните семејства и со сите Украинци кои страдаат од оваа агресија,“ напиша таа на платформата Х.Нападот врз цивилна населба и европската делегација во Киев дополнително ја заостри меѓународната осуда кон Кремљ, кој и по речиси две години од почетокот на војната продолжува со масовни воздушни офанзиви врз Украина.

Свет | пред 7 месеци

Украинските бранители предупредуваат: „Зад Донбас е отворен терен, таму нема одбрана“

Украинските сили во источниот фронт се соочија со едно од најголемите руски пробивања оваа година – напредување од околу 10 километри во близина на Покровск. Малата група снајперисти од 93. механизирана бригада добила наредба итно да се врати на боиштето за да помогне во одбрана на градот, кој бил на чекор до опколување.„Погледнав на картата и не можев да поверувам,“ изјави Стојников, наредник познат под прекарот Шепард. Украинците сепак успеале да ја стабилизираат ситуацијата и да повратат неколку населени места северно од градот. „Можеше да заврши многу лошо,“ додаде тој.Рускиот напад повторно ја истакна важноста на утврдените градови во Донбас. Според воениот портпарол Дмитро Запорожец, северниот дел на Донецката област е заштитен со „појас на тврдини“ – 45 километри урбани центри и мали населби, кои ја прават последната голема линија на одбрана.„Зад тоа има само отворен терен, без индустриски комплекси и без услови за изградба на стабилна одбрана,“ вели Запорожец.Русија постепено се приближува кон Костјантивка, град со 65.000 жители пред војната, и веќе се наоѓа на помалку од 10 километри од него. Доколку падне, ќе биде отворен патот кон Краматорск и Словјанск – најголемите украински упоришта во регионот.Хуманитарците опишуваат драматични сцени. „Последниве недели е многу поопасно,“ изјави Евгениј Ткачев, кој организира евакуации од Костјантивка. Руски дронови и лизгачки бомби редовно ги гаѓаат улиците и возилата, што го прави секое движење ризик.Слична е состојбата и во Краматорск, каде што живеат околу 100.000 цивили. Таму украинските инженери ископуваат длабоки противтенковски ровови и ги подготвуваат урбаните квартови за отпор. „Секоја куќа, секоја зграда може да стане точка на одбрана,“ нагласуваат од армијата.Локалната жителка Тетјана Лухова, која избегала од Донецк уште во 2014 година, повторно ја преживеа трагедијата – нејзината зграда во Краматорск беше погодена, а таа остана повредена од експлозијата. „Што значи да се предаде Донецката област? Не разбирам. Веќе еднаш избегав од Донецк. Не се вратив 11 години,“ изјави таа.И покрај притисокот и растечките загуби, украинските војници и цивили остануваат решителни. За нив, предавањето на Донбас не е само воено прашање, туку прашање на опстанок, идентитет и право на сопствен дом.

Свет | пред 7 месеци

(Видео) Експлодира главниот нафтовод што ја снабдува Москва

Главниот нафтовод што ја снабдува Москва со нафтени производи експлодираше во Рјазанскиот регион на Русија, дознава Укринформ од извор во Службата за одбранбено-разузнавање на Украина (ДИУ).Според нив, вчера се случила силна експлозија на нафтоводот Рјазан-Москва, еден од главните правци за снабдување на рускиот главен град со нафтени производи.„Силна експлозија на дел од нафтоводот“Пожарникари и амбулантни возила биле испратени во рок од неколку часа за да го изгаснат пожарот, објавува Укринформ.Жителите пријавиле дека полицијата и други екипи се во областа на селото Божатково во Рјазанскиот регион, работејќи на отстранување на последиците од експлозијата и пожарот.Според украинските медиуми, од 2018 година, овој нафтовод е пренаменет за снабдување со бензинско гориво на Транснефт, кој исто така обезбедува гориво за руската армија.Поради инцидентот, протокот на нафтени производи кон Москва е суспендиран на неодредено време.

Свет | пред 7 месеци

Украинскиот блогер Сергеј Стерненко: „Ако Зеленски предаде територија, ќе стане политички – а потоа и буквален – мртовец“

Украинскиот воен блогер, активист и снабдувач со дронови Сергеј Стерненко преживеал четири обиди за атентат во последните седум години. Последниот напад, на 1 мај оваа година во Киев, го извршила 45-годишната Људмила Чимерска, која испукала најмалку три куршуми кон него. Еден куршум му го пробил бедрото, но тој успеал да преживее благодарение на телохранителите и брзата интервенција.Стерненко, кој има повеќе од два милиони следбеници на YouTube и над 850 илјади на Телеграм, е едно од најпознатите имиња меѓу младите Украинци. Тој е националист, поранешен лидер на улични протести, адвокат и клучен недржавен снабдувач на украинската армија со дронови. Од почетокот на руската инвазија, преку донации собрал над 100 милиони евра за набавка на беспилотни летала.„Знаев дека Русите ќе се обидат да ги убијат познатите Украинци. Да сум на нивно место, би направил исто,“ изјави тој за Times.Стерненко остро ја отфрла можноста Украина да отстапи територија како дел од мировен договор со Москва.„Ако Зеленски даде земја што не е окупирана, тој ќе биде леш – најпрво политички, а потоа и вистински. Тоа би била бомба под нашиот суверенитет,“ тврди блогерот.Според него, компромис со Русија е невозможен: „Ќе има само еден победник – Русија или Украина. Ако руската империја опстане во сегашна форма, таа секогаш ќе сака да се шири. Борбата ќе трае сè додека Русија не ја напушти украинската земја.“Иако е меѓу најпопуларните гласови во Украина, Стерненко често е во судир и со украинскиот политички естаблишмент, критикувајќи ја корупцијата во институциите. Неговите противници го обвинуваат дека избегнува фронтова служба, што тој решително го негира.Руски служби, пак, го гледаат како приоритетна цел, пред сè поради дроновите што ги обезбедува за армијата.Стерненко се вклучил во протестите на Мајдан уште како 18-годишник. Бил сведок на убиствата и насилството во Киев во 2013–2014 година, по што се приклучил на уличните судири во Одеса. Како лидер на локалната подружница на „Десен сектор“, бил сведок на крвавите настани на 2 мај 2014 година, кога во пожар во Домот на синдикатите загинаа 42 луѓе.„Главната цел тогаш беше да ја ослободиме Одеса од корупцијата и од прорускиот криминален уплив,“ вели Стерненко.Во мај 2018 година бил нападнат пред својот стан во Одеса. За време на тепачката, со нож убил еден од напаѓачите. Судиите пет години ја испитуваа неговата верзија за самоодбрана, а тој тврдеше дека е жртва на политички прогон од проруското судство. Во декември 2023 случајот беше затворен, а судот дури му го врати и ножот.„Свесен сум дека мојот животен век е ограничен. Затоа морам да направам нешто корисно за својот народ и за Украина,“ порачува Стерненко, човекот што во Украина важи за симбол на отпорот, но и за мета – и дома, и во Москва.

Свет | пред 7 месеци

Русија навлегла во четвртиот по ред најголем град – Украина официјално потврди борби

Украинските власти за прв пат официјално потврдија дека руските сили влегле во Днипропетровска област, административен регион во централна Украина кој досега беше поштеден од интензивни копнени борби.„Да, влегоа и борбите се во тек“, изјави Виктор Трегубов, портпарол на украинските сили во Днипро, четвртиот по големина град во земјата.Според независниот воен монитор DeepState, селата Запоришке и Новогеоргијивка паднале под руска контрола, а Москва таму „консолидира позиции и собира пешадија за понатамошен напад“. Нивната карта покажува дека и селото Дачне, за кое досега се водеа жестоки борби, сега е во таканаречената „сива зона“ без јасна контрола.Днипропетровска област се граничи со регионот Донецк, кој уште од 2014 година е под удар на руската агресија, а од 2022 година и полната инвазија на Украина претставува една од најкрвавите боиштa. Иако не е меѓу областите што Москва формално ги прогласи за анектирани, регионот со месеци е подложен на напади.

Свет | пред 7 месеци

Москва бара предавање на целиот Донбас, Киев одбива компромис, Вашингтон притиска за мировен договор

На денот кога Украина ја одбележа 34-годишнината од независноста, од Источна Европа стигнаа две спротивставени пораки. Додека Киев славеше опстанок и волја за отпор, Москва испрати јасен сигнал дека Украина може да постои само ако се откаже од Донбас и остане неутрална.Рускиот министер за надворешни работи, Сергеј Лавров, во интервју за NBC изјави дека Русија нема да застане додека не ги оствари своите цели – елиминација на безбедносните закани од Украина, заштита на етничките Руси и рускојазичното население и гаранција дека Киев ќе остане надвор од воени сојузи. Според него, Москва формално го признава Зеленски само како „лидер на режим“, но не и како легитимен претседател за потпишување договори.Украинскиот претседател Володимир Зеленски, пак, порача дека привремената окупација не може да ја промени вистината и дека Украинците повторно ќе бидат заедно. „Украина никогаш повеќе нема да биде принудена на срамота што Русите ја нарекуваат компромис. Потребен ни е праведен мир. Каква ќе биде иднината зависи само од нас, а светот тоа го знае и го почитува“, изјави Зеленски.Вашингтон во меѓувреме бара начин да го прекине војувањето. Американскиот претседател Доналд Трамп, по средбата со Владимир Путин на Алјаска, изјави дека „размена на територии“ е неизбежна цена за мир. Во разговор со Зеленски, Трамп користел мапа со обележани окупирани региони, нагласувајќи дека петина од земјата е изгубена и дека Киев мора да преговара за да го спаси остатокот. За Зеленски, Донбас не е само стратегиска или економска област, туку симбол на идентитетот и историската жртва на Украина.Путин бара предавање на целиот Донбас, вклучувајќи територии под украинска контрола со повеќе од 200.000 жители. Тоа би ги исполнело територијалните цели на Кремљ, но и сериозно би го ослабело Зеленски. Украинскиот устав забранува предавање на територии, а мнозинството граѓани остро се противат на тоа.Според аналитичарите, единствениот начин украинската јавност да прифати ваков исход би бил доколку добие силни западни безбедносни гаранции, со американско и европско воено присуство – што Москва категорично го одбива. Бившиот директор на ЦИА, Дејвид Петреус, вели дека токму Путин е најголемата пречка за мир: „Нема многу причини да веруваме дека би седнал со Зеленски или би прифатил компромис“.На теренот, борбите во Донбас продолжуваат со жесток интензитет. Москва тврди дека зазела две села во регионот, што би можело да отвори пат кон Костјантиновка, клучно логистичко средиште на украинската армија. Киев, пак, известува дека во контранапад повторно презел село во истата област.

Свет | пред 7 месеци

Амбасадорот на Украина одбил разговор со американскиот потпретседател Ванс по инцидентот во Белата куќа

Валериј Залужни, амбасадор на Украина во Обединетото Кралство и поранешен командант на вооружените сили, одбил телефонски разговор со американскиот потпретседател Џеј Ди Ванс, објави Guardian.Според пишувањата, Ванс се обидел да стапи во контакт со Залужни три дена по жестоката расправија што ја имал со претседателот Володимир Зеленски во Овалната сала кон крајот на февруари. Целта на обидот била да се испита теренот околу можни алтернативи за Зеленски на лидерската позиција во Украина.Залужни, кој ужива голема доверба и во армијата и меѓу граѓаните поради неговата улога во одбраната од руската агресија, по консултации со шефот на кабинетот на претседателот Андриј Јермак, одлучил да не го прифати повикот.Анкетите на агенцијата Rating покажуваат дека доколку се кандидира, Залужни би бил втор во претседателската трка со 25 проценти поддршка, веднаш зад Зеленски, додека неговата потенцијална политичка партија би освоила прво место на парламентарни избори со 22 проценти.Во меѓувреме, поранешната новинарка на Би-Би-Си, Оксана Тороп, ги демантираше шпекулациите дека Залужни во Лондон формира тим за претседателска кампања. Таа истакна дека генералниот став на Залужни останува ист: додека трае војната, приоритет мора да биде опстанокот на државата, а не изборите.Слични контакти, како што пишува Guardian, имале и лица блиски до поранешниот американски претседател Доналд Трамп, кои во периодот по конфликтот во Белата куќа разговарале со поранешниот украински претседател Петро Порошенко и со поранешната премиерка Јулија Тимошенко – двајцата најистакнати опозициски лидери во Украина.

Свет | пред 7 месеци

Украинската армија ја презеде контролата врз Новомихајливка

Украинските вооружени сили соопштија дека успешно ја спровеле операцијата за протерување на руските трупи и воспоставување целосна контрола врз селото Новомихајливка. Акцијата ја реализирале Одделението за активни операции на Одделот за украинска одбрана, специјалната единица „Артан“ и 2. јуришен баталјон од 3. јуришна бригада.Според извештајот, операцијата била изненадувачка за руската армија, а пресретнатите комуникации покажуваат дека непријателот изгубил една чета војници и бил принуден да префрли резерви од други делови на фронтот.Украинските сили велат дека со координираната работа на разузнавачките служби, јуришните единици, тешката техника и беспилотните летала го подобриле својот тактички положај и ја зајакнале одбранбената линија во регионот.„Нашите знамиња се враќаат на своето вистинско место“, порачаа од украинската армија.Со оваа победа, Новомихајливка за првпат по подолго време е под целосна контрола на украинските сили.

Свет | пред 7 месеци

Украински дронови предизвикаа принудно слетување на авион со руски туристи во Естонија

Патнички авион со руски туристи кој летал од египетското летувалиште Шарм ел Шеик кон Санкт Петербург бил принуден да слета во Талин, Естонија, поради украински напади со дронови врз руска инфраструктура.Според информациите од аеродромот во Талин, летот бил пренасочен бидејќи аеродромот Пулково во Санкт Петербург бил привремено затворен. „Заради затворањето, авионот беше пренасочен во Талин“, изјави Маргот Холц, раководителка за комуникации и маркетинг.Авионот, со кој управувала египетската авиокомпанија AlMasria Universal Airlines, слетал во Талин во 5:33 часот наутро по локално време. Патувањето кон Санкт Петербург било продолжено речиси шест часа подоцна. За време на престојот, патниците и екипажот не смееле да го напуштат авионот.Нападите се случиле во ноќта меѓу сабота и недела, кога украински дронови погодиле терминал за течен природен гас во Ленинградската област и нафтена рафинерија во Самарската област. Извор од украинската служба за безбедност (СБУ) потврдил дека зад нападот на гасниот терминал стојат украинските разузнавачки структури.Овие удари се дел од пошироката стратегија на Украина за нарушување на руската логистика далеку зад линијата на фронтот. Според украинските и западни извори, само во првите месеци од 2025 година ваквите напади довеле до тоа Русија да прекине со работа на своите аеродроми повеќе од 200 пати.Настанот дополнително ја покажува ранливоста на руската инфраструктура на долг дострел и влијанието на конфликтот врз цивилниот воздушен сообраќај во регионот.

Свет | пред 7 месеци

Украина нема да биде принудена на срам кој Русите го нарекуваат компромис, вели Зеленски

Украинскиот претседател Володимир Зеленски, во обраќање од плоштадот Независност во Киев, по повод одбележувањето на Денот на независноста, порача дека секој симбол на тоа место зборува за независноста на државата.„На овој плоштад, под нашите знамиња, нашите деца и внуци го слават Денот на независноста. Во мир и со почит, со вера во иднината и благодарност кон сите што ја бранеа Украина во оваа војна за независност“, истакна Зеленски, пренесе „Укринформ“.Тој нагласи дека Украина никогаш повеќе нема да биде принудена на „срам што Русите ја нарекуваат компромис“. Според него, нацијата заслужува праведен мир и иднина која зависи исклучиво од самата Украина.„Светот ја почитува и ја гледа Украина како рамноправен партнер. Украина стекна независност, таа не е жртва, туку борец. Украина не бара, туку нуди – сојузништво и партнерство, најдобрата армија во Европа со напредни одбранбени технологии и искуство во отпорност“, рече тој.Зеленски потенцираше дека на Украина ѝ е потребна Европската унија, но и дека на Унијата ѝ е подеднакво потребна Украина – не како „сиромашен роднина“, туку како силен сојузник.Тој додаде дека земјата ќе добие траен мир со силни безбедносни гаранции: „Тие гаранции ќе бидат толку силни што никој во светот нема ни да помисли да ја нападне Украина. Тоа е нашата цел и нешто што мора да им го пренесеме на нашите деца и внуци – силна и рамноправна Украина, европска и независна.“Украина денес ја одбележува 34-годишнината од прогласувањето на независноста, кога на 24 август 1991 година, Врховната Рада го усвои Актот за независност од Советскиот Сојуз.

Свет | пред 7 месеци

Зеленски: Подготвен сум за секаков формат на средба со Путин, но Москва одложува

Украинскиот претседател Володимир Зеленски денес изјави дека е подготвен за секаков формат на средба со рускиот лидер Владимир Путин, но дека, како што оцени, „Москва повторно се обидува да одложи сè“.Во телефонски разговор со јужноафриканскиот претседател Сирил Рамафоса, Зеленски ги повика земјите од Глобалниот Југ да апелираат до Русија да започне мировни преговори.„Важно е глобалниот Југ да испрати соодветни сигнали и да ја охрабри Русија на мир“, напиша Зеленски на платформата X, по телефонскиот разговор.

Свет | пред 7 месеци

Од ова Украина може да има проблем, САД воведоа нова контрола врз користењето на ракетите со долг дострел

Американското Министерство за одбрана во тишина спроведе ревизија со која министерот за одбрана Пит Хегсет добива овластување да забрани употреба на американски ракети со долг дострел против цели во Русија. Според „Wall Street Journal“, оваа практика е на сила од доцна пролет и фактички го оневозможила користењето на системите ATACMS за напади врз руска територија.Новиот механизам на надзор е развиен од заменикот за политики во Пентагон, Елбриџ Колби, и се темели врз американските разузнавачки податоци. Покрај ракетите ATACMS, под контрола влегуваат и британските ракети со долг дострел „Storm Shadow“. Ниту канцеларијата на украинскиот претседател, ниту Министерството за одбрана на Украина, како и Белата куќа и Пентагон, не ги коментираа наводите.Американскиот претседател Доналд Трамп на 21 август изјави дека Украина „нема шанси за победа“ ако не ѝ се дозволи да возврати врз Русија, а ја критикуваше и политиката на неговиот претходник Џо Бајден. Сепак, Трамп порано кажа дека не се согласува целосно со одлуката за дозволување напади врз Русија со американско оружје.Фрустрациите околу тригодишниот војна го натерале Трамп да разгледува нови чекори – од воведување економски санкции кон Москва, па сè до можност за откажување од мировниот процес. „Ќе донесам одлука што ќе направиме и тоа ќе биде многу важна одлука, можеби санкции, можеби царини, а можеби ништо – и ќе кажеме: тоа е ваша борба,“ изјави Трамп.Руските власти, пак, предупредија дека Украина не може да користи високопрецизно оружје без директно учество на офицери од НАТО. „Тоа значи директна вклученост на Западот во војната,“ изјави претседателот Владимир Путин, пренесува „NBC“.Шефот на руската дипломатија Сергеј Лавров изјави дека состанок Путин – Зеленски не е извесен, бидејќи сè уште нема договорена агенда за евентуален самит.

Македонија | пред 7 месеци

(Видео) Украински дронови погодија нуклеарна електрана во Курск и нафтен терминал во Уст Луга

Украина во текот на ноќта извела масовни напади со дронови врз неколку руски енергетски објекти, меѓу кои и нуклеарната електрана во Курск и нафтениот терминал во пристаништето Уст Луга во Ленинградската област, потврдија руските власти.Во нападот врз нуклеарката во Курск, сместена недалеку од границата со Украина, бил оштетен помошен трансформатор, поради што оперативниот капацитет бил намален за 50 проценти. Според официјалните информации, нема повредени, пожарот бил брзо изгаснат, а нивото на радијација во електраната и околината е во дозволени граници. Во исто време, на терминалот на компанијата „Новатек“ во Уст Луга изби голем пожар како последица од удар на украински дронови. Гувернерот на Ленинградската област, Александар Дрозденко, соопшти дека околу десет дронови биле соборени над пристаништето и дека пожарникарските екипи работат на локализација на пожарот. Според него, резервоарите со гориво не биле зафатени.Министерството за одбрана на Русија објави дека во текот на ноќта уништиле вкупно 95 украински дронови во 13 региони, вклучувајќи ја Ленинградската област, Самара и Курск.Нападите предизвикаа прекин на летови во повеќе аеродроми, меѓу кои и Пулково во Санкт Петербург, соопшти руската агенција за цивилна авијација. Украина, пак, потврди дека цел на нејзините напади биле и индустриски комплекси во јужна Русија, вклучувајќи ја и рафинеријата во градот Сизран во Самарската област.

Свет | пред 7 месеци

Неуспешен руски пробив во Донецк: украинските сили вратија шест села под своја контрола

Руските сили на 11 август успеале да ги пробијат украинските одбранбени линии во источниот регион Донецк и да навлезат повеќе од десет километри во украинска територија. Меѓутоа, украинската армија го открила планот уште пред почетокот на операцијата, што довело до брз и решителен одговор.Картите од бојното поле покажувале руски продор низ неколку села, што предизвикало загриженост дека целта се стратешките градови Костјантинівка и Покровск. Но, само неколку дена подоцна, единиците на полкот „Азов“ ги опколиле руските сили и ја стабилизирале ситуацијата.До 14 август украинската армија објави дека Русите биле протерани од шесте села кои накратко ги држеле под контрола. Според „Азов“, во борбите биле елиминирани 385 руски војници, а уништени 37 возила, меѓу кои и едно оклопно возило и еден тенк.Експерти истакнуваат дека Русија во нападот користела тактика со мали групи војници на мотори и електрични скутери – акција која многумина ја опишуваат како „самоубиствена мисија“. Војниците се криеле во подруми и урнатини, чекајќи засилување, но поради масовната употреба на украински дронови надзорот бил речиси непробоен. Главната цел на Москва, според воените аналитичари, била да се обезбеди контрола врз автопатот Добропоља–Краматорск, една од клучните линии за снабдување на украинската армија. Иако нападот не успеа, украинските војници предупредуваат дека состојбата на фронтот останува променлива, а во последните денови имало извештаи дека Русите повторно се обиделе да повратат дел од изгубените позиции.

Свет | пред 7 месеци

Руски ракети погодија американска фабрика во Украина – пораката на Путин до Трамп е јасна

Политичките пораки ретко се појасни од руските проектили што во ноќта меѓу среда и четврток удрија врз американска фабрика во западна Украина, далеку од фронтот на војната што нема крај.Овој напад е дел од една од најжестоките руски офанзиви со дронови и ракети во последниот месец и јасно покажува што рускиот претседател Владимир Путин мисли за мировните напори на американскиот претседател Доналд Трамп, пренесува CNN.Минатата недела Трамп на Алјаска го пречека Путин со црвен тепих, а Белата куќа говореше за „историски помак“ во мировниот процес. Но, руските бомбардирања продолжуваат, цивили умираат, а Путин не покажува намера да го заврши војувањето. Најавуваниот самит меѓу украинските и руските лидери сè уште е само празно ветување.Според аналитичарите, Москва води стратегија на одложување, надевајќи се дека војската ќе оствари нови добивки на фронтот. Главниот тактичар е министерот за надворешни работи Сергеј Лавров, познат по советските опструкции, кој повторно се обиде да внесе раздор меѓу САД и Европа.Претседателот Володимир Зеленски останува на ставот дека нема да се откаже од Донбас, бидејќи тоа би ја оставило Украина ранлива за идни напади кон Киев. Иако настојува да му угоди на Трамп и да покаже подготвеност за разговори, тој не може да прифати капитулација под маска на компромис.Трамп останува единствениот светски лидер кој може да зборува со двете страни, но неговите пораки често се контрадикторни. На социјалните мрежи најави дека е невозможно да се победи во војна без удари врз земјата-агресор, но само неколку дена претходно избегна да зборува за вклучување на американски сили. Снимен е и како на францускиот претседател Емануел Макрон му вели дека Путин „сака договор за него лично“.Додека Белата куќа зборува за „светло на крајот од тунелот“ и го величи Трамп како „претседател на мирот“, реалноста е дека Русија во новите напади уби девет цивили и рани 19 лица, меѓу кои и во напад на американската фабрика Flex Ltd. „Руските сили точно знаеја каде удираат“, рече Зеленски, истакнувајќи дека целта била американска инвестиција во Украина.Една недела по самитот на Алјаска, ситуацијата е јасна: Путин сака продолжување на борбите, Зеленски не може да попушти, а Европа е немоќна без Америка. Сè зависи од Трамп – дали навистина ќе го отвори патот за мир или ќе остане заробен во сопствените контрадикции.

Свет | пред 7 месеци

(Видео) Украинците повторно нападнаа клучен руски нафтовод, Унгарија бесна: „Немаме нафта“

Украина изведат нов напад врз најголемата руска пумпна станица за нафта – дел од системот на нафтоводот „Дружба“, лоцирана во градот Унеча, Брјанска област. Информацијата ја потврди Роберт Бровди, познат како „Маѓар“, командант на украинските Сили за беспилотни системи, објави „Кијив Пост“.Според него, нападот бил изведен со дронови од 14. полк на украинските беспилотни сили. „UNECHA NPS – заврши во пепел“, напиша Бровди на „Телеграм“, објавувајќи и видео со пожарот по експлозиите. Постројката Унеча, сместена четириесетина километри од украинската граница е систем долг 9.000 километри снабдува со нафта руски воено-индустриски капацитети и претставува клучна извозна рута за Москва.На нападот веднаш реагираше унгарскиот министер за надворешни работи Петер Сијарто, кој соопшти дека „снабдувањето на Унгарија со сурова нафта повторно е запрено“. Тој го нарече ударот „нов напад врз енергетската безбедност на Унгарија“ и предупреди на „уште еден обид земјата да се вовлече во војната“.Ова не е прв случај на напад врз истата станица. На 13 август украински дронови исто така погодија дел од постројката, по што беа пријавени повеќекратни експлозии и голем пожар.Според податоците на Генералштабот на Украина, нападите врз руските компании и инфраструктура во 2025 година предизвикале штети од 74,11 милијарди долари, што е околу 4% од рускиот БДП. Речиси 80% од метите биле нафтени и гасни капацитети – рафинерии, складишта и логистички центри како што е Унеча.

Свет | пред 7 месеци

Ова се воените опции на Западот за Украина: „Европа ќе го даде лавовскиот дел од силите“

Војните команданти на САД и повеќе европски земји изминатите денови им претставија опции на своите советници за национална безбедност за тоа како да ѝ се обезбедат безбедносни гаранции на Украина, потврдија американски и европски функционери за „Ројтерс“.Средбата следеше откако американскиот претседател Доналд Трамп вети дека ќе помогне во заштитата на Украина како дел од секој можен договор за завршување на руската војна, која трае веќе три и пол години.На состанокот што се одржа од вторник до четврток во Вашингтон учествуваа началниците на генералштабовите на САД, Финска, Франција, Германија, Италија, Обединетото Кралство и Украина.Американскиот државен секретар Марко Рубио, кој воедно е и советник на Трамп за национална безбедност, одржал видео-конференција со своите европски колеги – меѓу нив британскиот советник за безбедност Џонатан Пауел, шефот на кабинетот на претседателката на Европската комисија Бјорн Сајберт и претставници од НАТО, Франција, Германија, Италија и Финска.Конечните детали допрва треба да се доработат, но според изворите, европските земји би дале „лавовски дел“ од силите во рамките на безбедносните гаранции за Украина. Тоа го потврди и американскиот потпретседател Џеј Ди Венс.Трамп изјави дека нема да распоредува американски копнени сили во Украина, но остави отворена можност за други форми на воен ангажман – како воздушна поддршка или дополнителни системи за противвоздушна одбрана.Меѓу разгледуваните опции е и испраќање европски сили во Украина под американско командување. Американската воздушна поддршка би можела да вклучува воведување зона на забрането летање, која би ја спроведувале американски борбени авиони.Францускиот претседател Емануел Макрон и британскиот премиер Кеир Стармер изразија подготвеност за учество во ваква „коалиција на подготвените“, а и германскиот канцелар Фридрих Мерц сигнализираше отвореност. Во Германија, претставници на воениот синдикат предупредија дека за долгорочни мировни сили во Украина ќе бидат потребни „десетици илјади војници“.Во меѓувреме, извори од Кремљ тврдат дека рускиот претседател Владимир Путин бара Украина да се откаже од амбициите за НАТО и да се повлече од целокупниот Донбас. Москва, според наводите, би прифатила замрзнување на фронтовите во Запорожје и Херсон, а дури и предавање на мали делови од регионите Харков, Суми и Дњепропетровск кои ги контролира.Путин останува цврст во барањето западните сили да не бидат распоредени во Украина – дури ни како мировни сили.

Свет | пред 7 месеци