Јаневска: Интензивно се спроведуваат реформите во образованието и науката

Министерство за образование и наука денеска информираше дека продолжува интензивната трансформација на образовниот и научно-истражувачкиот систем во насока на усогласување со европските стандарди, подобрување на квалитетот и јакнење на институционалната поставеност.

На 18. состанок на Секторската работна група за образование, вработување и социјална политика, министерката Весна Јаневска истакна дека приоритет се реформите кои произлегуваат од Реформската агенда 2024-2027, Планот за раст на Европска Унија за Западен Балкан и стратешките приоритети на Владата во областа на човечкиот капитал.

— реклама —

„Продолживме со инвестициите во модернизација на образованието, дигитализација и подобрување на инфраструктурата, како и со зголемување на инклузивноста и поддршката на наставниот кадар“, изјави Јаневска.

Според неа, новата законска рамка за високото образование и научно-истражувачката дејност треба да обезбеди повисоки стандарди, интернационализација и поголема видливост на македонските универзитети и научни институции.

— реклама —

Министерката посочи дека трите нови закони – за високото образование, за обезбедување и унапредување на квалитетот во високото образование и за научно-истражувачката дејност – се подготвени низ инклузивен процес и наскоро ќе се најдат пред пратениците.

Дополнително, Министерството работи и на отворање на првиот државен Научно-технолошки парк, како и на нов закон за Националната агенција за програмите Еразмус+.

— реклама —

Во тек е и подготовка на нов Закон за средно образование, со фокус на јакнење на стручното образование и дуалниот модел, во кој активно учествуваат повеќе од 800 компании. Наскоро се очекува одлука и за формирање на осмиот регионален центар за стручно образование и обука.

Од март годинава, платите на вработените во училиштата се зголемени за дополнителни 7,5 проценти, со што кумулативното зголемување во последните две години надминува 20 проценти.

Во делот на инфраструктурата, активни се околу 50 инвестиции вредни над 60 милиони евра, а 160 училишта се опремени со безбедна безжична мрежа и модерна ИТ-опрема.

На состанокот било оценето дека реформите во образованието и науката се дел од поширок процес на европска интеграција, институционална модернизација и создавање поквалитетен систем за идните генерации.