Министерството за култура тврди дека чека на Општина Кочани да ја спроведе постапката за подигање на спомен-обележје за 63 жртви од „Пулс“, за да обезбеди дел од средствата за изградба. Ова доаѓа откако Кире Димитриев, татко на загинатиот Диме во трагедијата во дискотеката „Пулс“ во Кочани, во „Претрес со Ландов“ посочи дека средствата за споменикот биле пренаменети, информација која им ја кажале на состанок во Министерството.
„Со почит се однесуваме кон секое поставено прашање и кон секоја потреба оваа трагедија достоинствено да биде обележана“, наведуваат од Министерството.
Оттаму појаснуваат дека на неодамнешна средба во кабинетот на министерот, на која присуствувале претставници на Општина Кочани и дел од семејствата на настраданите, била објаснета законската процедура за подигање спомен-обележје. Според Министерството, согласно Законот за меморијални споменици и спомен-обележја, надлежноста за започнување и водење на постапката е кај општината.
„Министерството не ја иницира постапката, не распишува конкурс, не избира идејно решение и не носи одлука за изгледот и поставувањето на обележјето“, велат од институцијата.
Според нив, Советот на општината треба да донесе програма за одбележување на настанот, одлука за подигање на спомен-обележјето и да формира Одбор кој ќе ја води понатамошната постапка. Токму тој Одбор има обврска да распише јавен и анонимен конкурс за избор на идејно решение, да ги разгледа понудените проекти и да го избере решението што ќе биде реализирано.
Од Министерството додаваат дека дури по завршување на оваа процедура и доставување на целокупната документација, можат да бидат обезбедени и префрлени финансиските средства.
„Средствата кои претходно биле предвидени во буџетот на Министерството не биле реализирани затоа што законската постапка не била завршена и не била доставена потребната документација. Тоа не значи откажување од поддршката, туку незавршена постапка од страна на надлежниот орган“, се наведува во одговорот.
Министерството посочува дека претставниците на семејствата на средбата изразиле благодарност за приемот и за појаснувањето на чекорите што треба да следат, со договор по завршување на законската процедура повторно да се воспостави комуникација за обезбедување на потребните средства.
Со обезбедените 2 милиони денари, кои делумно би ги покриле трошоците за споменикот, се фалеше и Миле Лефков.
Во емисијата „Претрес со Ландов“, Кире Димитриев говореше за болката по загубата на синот Диме, кој загина во пожарот во „Пулс“ на 16 март минатата година, како и за борбата за вистина и правда што семејствата ја водат повеќе од една година. Тој посочи дека државата не може да ја носи нивната болка, но дека мора да го исполни она што било ветено кон семејствата на жртвите.
(Видео) Кире Димитриев го загуби синот во „Пулс“, а утредента му се роди внук од Диме: Државата ги пренамени средствата за споменикот за други цели
Вечерва во „Претрес со Ландов“, Кире Димитриев и Наталија Ѓорѓиеска говорат за болката која не минува за загинатите син и сопруг, за судењата што ја отвораат раната одново, за Андреј од ДНК и за Диме кои загинаа на 16 март минатата година во „Пулс“ во Кочани.Борбата по вистината и за правда трае повеќе од една година, а Кире Димитриев оди на судските рочишта.Само еден ден по трагедијата, тој добил внуче од загинатиот син.„Тенка е линијата меѓу животот и смртта. Бог ти дава, Бог ти зема. Не мислев дека тоа можам да го издржам. Нашите деца се убиени, бараме правда бидејќи нивните животи се насилно прекинати. Надеж во тие моменти ни беше внукот од загинатиот син. Животот нè скрши. Тоа не е нормален живот“, велиДимитриев.Животот продолжува, но не е ист за нас, низ солзи говори таткото на загинатиот Диме.„Кога го видов син ми во креветот без знаци на живот, не можев да верувам. Снаата, која беше во поодмината бременост, ме освести со силен крик и ме освести дека морам да продолжам да живеам. Ме прогонува што не можев ништо да направам за синот“, вели Димитриев.Знае дека државата не може да ја носи нивната болка, но мора да го исполни ветеното.„За погребите и спомениците ни беше ветено дека државата ќе го надомести ова, но дознавме дека средствата се од донации. Им забележувам на пратениците што набргу по трагедијата заминале на одмор“, вели Димитриев и открива дека средствата за споменикот за загинатите се пренаменети за други цели.
Македонија | пред 2 дена
