Нетанјаху ја открил локацијата на Хамнеи, па го известил Трамп - Како почна војната

Американскиот претседател Доналд Трамп издал конечна наредба за воздушен напад врз Техеран откако израелскиот премиер Бенјамин Нетанјаху го известил дека убиениот ирански врховен водач, ајатолахот Али Хамнеи, ќе се наоѓа на одредена локација, пишува Аксиос.

— реклама —

Според тие наводи, Нетанјаху на 23 февруари, за време на телефонски разговор, го информирал Трамп дека израелските разузнавачки служби располагаат со податок дека Хамнеи и неговиот најтесен круг ќе одржат состанок во Техеран во сабота наутро, што било оценето како единствена можност за напад.

Американската Централна разузнавачка агенција (ЦИА), по налог на Трамп, ги проверила информациите што ги прибрала израелската воена разузнавачка служба и ја потврдила нивната веродостојност.

— реклама —

Иако Трамп, според изворите, и претходно бил наклонет кон напад врз Иран, дилемата се однесувала на времето на неговото извршување. По дополнителните разузнавачки потврди и проценката дека дипломатските напори не даваат резултати, претседателот на Соединетите Американски Држави во петок попладне, по источноамериканско време, дал конечно одобрување за операцијата.

— реклама —

Аксиос наведува дека САД и Израел со месеци интензивно ги координирале активностите, вклучително и повеќе средби и телефонски разговори меѓу двајцата лидери, како и заедничко воено планирање, додека паралелно се воделе дипломатски контакти со Техеран.

Израелскиот амбасадор во Вашингтон, Јехиел Лајтер, ги отфрлил тврдењата дека Нетанјаху вршел притисок за забрзување на нападот, нагласувајќи дека САД и Израел тесно соработувале во однос на Иран и дека американскиот претседател носи самостојни одлуки.

Трамп ги негирал наводите дека Израел го „вовлекол“ во војна, наведувајќи дека проценил оти Иран би можел прв да нападне и дека одлуката била донесена во интерес на безбедноста на САД.