Одложено судењето за Онкологија – одбраната на Васев бара предметот да го преземе обвинителот Коцевски

Судењето за случајот со Клиниката за онкологија, во кој првообвинет е поранешниот директо Нино Васев, е одложено за 8 октомври. Причината е барањето на неговата одбрана државниот јавен обвинител Љупчо Коцевски да го преземе предметот или да го делегира на друго обвинителство.

Судијката Снежана Марковска информираше дека поради поднесениот предлог за преземање на кривичното гонење, за кој треба да одлучи јавниот обвинител на РСМ, не се исполнети услови за водење на постапката, па главната расправа е одложена.

— реклама —

Адвокатот Боби Спиркоски, кој сега е нов бранител на Васев заедно со адвокатот Дељо Кадиев, достави до судот официјално барање за делегирање на надлежноста од ОЈО Скопје кон државниот јавен обвинител. Претходно, адвокатите Мартин Митровски и Никола Ставрев го повлекоа полномошното.

— реклама —

Јавната обвинителка Ана Гоговска Јакимовска побара одложување на рочиштето, истакнувајќи дека не може да се произнесе по барањето на одбраната и дека тоа мора да се проследи на надлежна адреса.

Денешното рочиште требаше да продолжи со сослушување на сведоци предложени од обвинителството, кои беа повикани во Основниот кривичен суд во Скопје.

— реклама —

Обвинетите се поранешниот директор на Онкологија Никола Васев и онколозите Симонида Црвенкова и Драган Јакимовски. Тие се товарат за „несовесно лекување“ и продолжени „тешки дела против здравјето на луѓето“, бидејќи кај 29 пациенти биле администрирани неподобни терапии со неправилни дози и без соодветна здравствена проценка.

Во постапката учествуваше и онкологот Мери Пешевска, која призна вина и доби две години условна казна затвор.

Покрај ова обвинение, против Васев и поранешниот економски директор на Клиниката се води уште една постапка за злоупотреба на службената положба и проневера, со која, според обвинението, на државниот буџет му е нанесена штета од над 2,2 милијарди денари.