СИЉАНОВСКА ДАВКОВА

Претседателката Сиљановска - Давкова именуваше претседател и членови на Комисијата за одликувања и признанија

Претседателката Гордана Сиљановска - Давкова донесе одлука за составот и за именување претседател и членови на Комисијата за одликувања и признанија.За претседател на Комисијата е именуван проф. д-р Валентин Мирчески, а за членови на комисијата се именувани проф. д-р Гзиме Старова, д-р Самуел Садикарио, д-р Андријана Јаневска, м-р Ана Дурловски, м-р Решат Амети, Дејан Георгиевски, Евгенија Теодосиевска, Жарко Башески, Оливера Наковска Бикова и Весна Петрушевска.Комисијата за одликувања и признанија ја сочинуваат поединци кои во текот на својата професионална кариера имаат остварено значајни постигнувања и стекнато висока репутација во македонското општество. Тие се признати експерти, кои со своите трудови и постигнувања се истакнале во различни области на општествениот живот како што се науката, културата, уметноста, образованието, здравството, спортот.

Македонија | пред 1 година

Мециновиќ: Давкова да престане да биде „министер за култура“ и да не го потпише указот за двојазични лиценци

Пратеникот и портпарол на Левица, Амар Мециновиќ, денес на прес - конференција го изнесе ставот на пратеничката група на Левица по однос на новогодишното обраќање на претседателката Гордана Сиљановска - Давкова.- Морам да напоменам дека обраќањето не беше инспиративно, беше ординерно и протоколарно и ни даде само флоскули, наместо тоа што, навистина, јавноста сакаше да го чуе после овој трансфер на власта и турбулентно политичко време. Пред сѐ, се чини дека Претседателката е потполно втурната во сенка на извршната власт и мора да се искоментира дека таа во својот професионален ангажман, во својата кариера има докажано дека е врвен професор, беше добар пратеник, но сега е сведена во функција на министерство за култура во сенката на Христијан Мицкоски - потенцираше Мециновиќ.Според него, коментарите кои ги даде Гордана Сиљановска - Давкова, Претседателката на Република Македонија, повикуваат на некој внатрешен дијалог, на некој консензус во склоп на внатрешната политика.- За на јавноста да ù биде појасно, Претседателката на Република Македонија повика на консензус помеѓу политичките елити, кои, да потсетиме, го амортизираа незадоволството на граѓаните кое се изрази во 2022 година со протестите за францускиот предлог. Од друга страна, во надворешната политика, тоа што можеме да го заклучиме е дека нема идејност како ќе постапиме понатаму. За тоа што го претставуваат како интерес на граѓаните на Република Македонија и тоа што повеќето граѓани на Република Македонија го сметаат за свој интерес, а тоа е влегувањето и членувањето во Европската унија, сметаме дека и оваа Влада, и овој Претседател на Републиката, нема да придонесе ништо позитивно и дека во наредните европски извештаи ќе ги гледаме истите оценки за пристапувањето на Македонија кон Европската унија - појасни портпаролот на Левица.Мециновиќ во име на Левица ја повика Претседателката да не го потпише срамниот указ за двојазични лиценци за градинки, кој вчера го донесе нематична комисија со кршење на Деловникот.- Ја повикуваме Претседателката на Република Македонија ова да биде прв тест за нејзината државна улога и државнички капацитет, затоа што, да потсетиме, дека таа како пратеник беше еден од најгласните пратеници против илегалната двојазичност! Сметам дека во говорот видовме многу несигурност за државните интереси на Република Македонија, видовме само колонизаторски менталитет – како Македонија е мала, немоќна, како треба да биде исправена пред задачите кои доаѓаат од надвор, без да се покаже кичма и вистинско бранење на интересите на граѓаните - додаде Мециновиќ од Левица.Тој уште еднаш поентираше дека Претседателката дека ќе остане во сенката на извршната власт.

Македонија | пред 1 година

Прв отчет на претседателката Сиљановска- Давкова пред пратениците

Претседателката Гордана Сиљановска Давкова, во 12 часот, во рамки на 25. Седница ќе има годишно обраќање во Собранието, прво во нејзиниот мандат.Се очекува претседателката да говори за актуелните теми и случувањата во изминатиот период, за очекувањата во 2025 година на полето на внатрешната и надворешната политика, како и за состојбата во економијата.

Македонија | пред 1 година

Сиљановска Давкова имаше работен ручек со амбасадорите на земјите – членки на ЕУ во земјава

Претседателката Гордана Сиљановска Давкова вчера имаше работен ручек со амбасадорите на земјите – членки на Европската Унија во земјава, организиран од унгарскиот амбасадор, Андраш Клајн.Во пријателска атмосфера се дискутираше за актуелни домашни, регионални, европски и светски настани и процеси.Акцентот беше ставен на македонските проблеми и препреки во евроинтеграцијата и на потребата од креативно решение за надминување на бугарско-македонскиот спор во духот на пријателството и добрососедските односи, со почитување на фундаменталните вредности и принципи на ЕУ.Претседателката ја реафирмираше својата длабока верба, посветеност и решеност за спроведување на реформската агенда во согласност со копенхагенските критериуми, со активно партнерство со ЕУ.Исто така, таа укажа дека билатерализацијата и преседаните се реална опасност за проширувањето.Според неа, во амбиент на воени конфликти, проширувањето на ЕУ со државите од Западен Балкан, кои природно и припаѓаат на Европа: географски, историски и културно и водат заедничка надворешна и безбедносна политика со ЕУ е од заеднички интерес и го јакнее нивниот имунитет кон заканите.

Македонија | пред 1 година

Средба на претседателката Сиљановска Давкова со премиерот на Црна Гора, Милојко Спајиќ

Претседателката Гордана Сиљановска Давкова, во рамките на официјалната посета на Црна Гора, денеска во Подгорица оствари средба со претседателот на Владата на Црна Гора, Милојко Спајиќ.На средбата беа разменети мислења за севкупните билатерални односи меѓу двете држави, европските аспирации и состојбите во регионот.Претседателката Сиљановска Давкова изрази задоволство од досегашниот развој на односите и соработката, кои ги карактеризира традиционално силно пријателство, идентични ставови по однос на развојот на меѓународната и регионалната соработка, со заеднички стратешки цели – мир и стабилност во регионот и членство во ЕУ.Претседателката Сиљановска Давкова го истакна очекувањето напредокот во македонска евроинтеграција да биде евалуиран праведно, врз основа на Копенхагенските критериуми и изрази очекување за споделување на експертизата и искуствата на црногорската администрација во преговорите со Унијата.Таа истакна дека меѓу нејзините главни приоритети е регионалната соработка, посочувајќи дека преку почитување и поттикнување заедништвото во регионот, можеме да ја забрзаме интеграцијата на Западен Балкан во ЕУ. Во таа насока, соговорниците предложија конкретни решенија: повторно воспоставување на директна авиолинија, формирање на културни центри во двете држави, како и што поскоро одржување на меѓувладина седница. Премиерот ја нагласи подготвеноста за споделување на досегашните црногорски евроинтеграциски искуства со македонските институции.Соговорниците заклучија дека е потребен брз и голем исчекор во економската соработка која ќе ги следи одличните политички односи.

Македонија | пред 1 година

Претседателката Сиљановска Давкова во официјална посета на Црна Гора

Претседателката Гордана Сиљановска Давкова денеска и утре, 28 и 29 ноември 2024 година, ќе престојува во официјална посета на Црна Гора.Денеска, во Цетиње, претседателката Сиљановска Давкова со највисоки државни и воени почести ќе биде пречекана од претседателот на Црна Гора, Јаков Милатовиќ, по што ќе се одржи тет-а-тет средба меѓу двајцата претседатели, како и пленарен состанок на делегациите на двете држави.Предвидено е претседателката Сиљановска Давкова во Подгорица да оствари средба со претседателот на Собранието на Црна Гора, Андрија Мандиќ.Утре, 29 ноември 2024 година, петок, претседателката Сиљановска Давкова во Подгорица ќе оствари средба со претседателот на Владата на Црна Гора, Милојко Спајиќ.Во рамки на официјалната посета, претседателката Сиљановска Давкова ќе одржи предавање на Правниот факултет при Универзитетот на Црна Гора, на тема „Западнобалканскиот демократски и евроинтеграциски маратон“.

Македонија | пред 1 година

Средба на претседателката Сиљановска Давкова со комесарот за културни врски на Јапонија, Шуничи Токура

Претседателката Гордана Сиљановска Давкова денеска прими делегација од јапонската Влада, предводена од комесарот за културни врски на Јапонија, Шуничи Токура, чија работна посета се реализира во годината кога се одбележува 30-годишнината од воспоставувањето на дипломатските односи меѓу двете земји.На средбата, на која присуствуваше и министерот за култура и туризам, Зоран Љутков, соговорниците разменија мислења за севкупните билатерални односи меѓу двете земји, како и за улогата на културната политика и дипломатија и важноста од унапредувањето на соработката во областа на културата.Претседателката Сиљановска Давкова ја поздрави посетата на Шуничи, како прва посета на висок претставник од јапонската влада во областа на културата и го поздрави потпишувањето на Меморандумот за соработка во областа на културата меѓу двете држави, изразувајќи уверување дека истиот ќе претставува силен поттик во развојот на културните врски меѓу двете земји.Оценувајќи дека Меморандумот отвора нови можности за продлабочување на културната соработка, претседателката ја изрази својата поддршка на сите активности и иницијативи насочени кон воспоставување на културна размена и дијалог, како и развојни проекти од областа на културниот туризам.Во таа насока, таа ги истакна нејзините заложби за меѓународна соработка, промовирање на културна размена како дел од дипломатските односи, за развој на македонските културни центри во странство и соодветна презентација на македонските културни вредности во светските музеи.Во разговорот со Шуничи, Претседателката изрази задоволство што повеќе реномирани македонски уметници наредната година, ќе ја претстават нашата држава на ЕКСПО ОСАКА 2025, токму со изложбена поставка која ги отсликува особеностите на значајниот проект за постземјотресната реконструкција на Скопје, на јапонскиот архитект Кензо Танге.На средбата, Претседателката истакна дека Јапонија многупати досега го има потврдено пријателството кон нашата земја и изрази благодарност за континуираната јапонска поддршка преку различни донации, грантови и проекти кои имаат за цел да го стимулираат нашиот економски и општествен развој.Во таа насока, беше оценето дека за нас е особено важна јапонската иницијатива за соработка со земјите од Западен Балкан, како и споделувањето на јапонското искуство и знаење во делот на развојот на човечките ресурси и подобрување на капацитетите.

Македонија | пред 1 година

Претседателот на СДСМ, Филипче ќе се сретне со претседателката Сиљановска-Давкова

Денеска ќе се одржи работна средба помеѓу претседателот на СДСМ, Венко Филипче и Претседателката на државата, Гордана Сиљановска – Давкова, извести СДСМ.Средбата ќе биде во Кабинетот на Претседателката на Република Северна Македонија (Вила Водно) со почеток во 15.00 часот.По средбата, како што е најавено изјава за медиуми ќе даде претседателот на СДСМ, Венко Филипче.

Македонија | пред 1 година

„Можен е исчекор во процесите“, претседателката ентузијаст дека ќе се најде решение со Бугарите за да се продолжи кон ЕУ

Претседателката Гордана Сиљановска-Давкова на брифинг со новинарите посочи дека гледа оптимизам во процесите за пристапување кон преговори со ЕУ во реакциите кои добива при средбите во странство. Таа посочи дека на неа и велат: „Вие сторивте се, дури и невозможното, на ред сме ние“. Според неа, мешањето на меѓународната заедница во измените на македонскиот Устав е преседан, кој ќе прерасне во пракса. Посочи дека дури и белгискиот премиер и го посочил тоа.„Не е пријатно кога ќе ви кажат дека првпат слушаат некои работи, а мислеле дека се е компромис“, искоментира претседателката за средбите кои ги има на меѓународно ниво, посочувајќи дека светските политичари не биле судрени со македонските аргументи за уставните измени и компромисите на Македонија.Според неа, Македонија доживеала момент кој ќе се учи во учебници по уставно право, а тоа е изјавата на портпаролката на европската комисија, која рекла: „Да смените Устав“. Претседателката е децидна тоа е мешање во внатрешните работи на републиката.Сиљановска-Давкова на брифингот посочи дека на прашањето „Кога ќе го смените Уставот“, им одговара: „Само апсолутен монарх може тоа да го вети“, па искоментира: „Ако некој мисли дека ќе се повтори преспанската приказна со пресија, тоа е суспензија на парламентарната демократија“.Таа беше зачудена од изјавата на бугарскиот претседател Румен Радев кој ја демантираше неа, со тврдење дека на нивната средба во Баку го искоментирал предлогот Бугарите да влезат во Устав, со одложено дејство.„Со Радев разговаравме еден час, јас мирно и тивко објаснив дека во Договорот нема ниту еден збор за Уставни измени. Позицијата ни е јасна, ја кажуваме на сите. Немаше реакција“, беше децидна Сиљановска-Давкова.Претседателката го прераскажа и разговорот со Радев, кој според неа, и рекол дека е покритикуван од неа.„Ако не може да констатираме стабилност на Владите, тогаш, може да констатираме дека тој е најстабилен. Тој вели дека е покритикуван од мене. Вели дека е спремен кога сакаме да имаме средби, по наше или нивно барање“, додаде таа.Сиљановска-Давкова посочува дека е можен исчекор во делот со Европска Унија.„Можен е исчекор од тоа што го слушнав. Не можам да тврдам дека ќе се случи, додека не видам конкретни чекори“, додаде претседателката.

Македонија | пред 1 година

Честитка од претседателката Сиљановска Давкова по повод 22 Ноември – Денот на aлбанската азбука

Претседателката Гордана Сиљановска Давкова упати честитка по повод 22 Ноември – Денот на aлбанската азбука.„22 ноември е историски важен датум за Албанците, но и за македонската држава. Пред 116 години во Битола е унифицирана албанската азбука, чин којшто ја зацврстил јазичната самосвест на албанскиот народ и создал темел за понатамошен културен и цивилизациски прогрес.Унифицирањето на албанската азбука не е само акт на јазична реформа, туку и симбол на стремежот за еманципација и просветување.Јазикот создава простор за разбирање, за соработка и за обединување околу идентитетските вредности. Преку него, различностите стануваат богатство, а иднината – можност за индивидуален и колективен раст.Албанскиот јазик и култура се вградени во нашето социјално ткиво и отвораат простор за меѓусебно разбирање и соживот. Почитувањето на јазичните разлики нѐ прави демократско мултикултурно општество.Бевме и остануваме пример на посветеност кон зачувување и унапредување на етничката, јазичната, културната и верската разноликост, овозможувајќи образование на мајчиниот јазик во сите степени, како и слободно и достоинствено изразување на колективната меморија и духовност.Честит 22 Ноември, Денот на албанската азбука!“, се вели во честитката на претседателката Гордана Сиљановска Давкова.

Македонија | пред 1 година

Средба на претседателката Сиљановска Давкова со Џастин Коулсон, претставнничка на УНФПА

Претседателката Гордана Сиљановска Давкова денеска ја прими Џастин Коулсон, претставничка на Фондот за население на Обединетите нации (УНФПА) за Босна и Херцеговина, директорка за Албанија, Србија, Северна Македонија и Косовo.На средбата беа разменети мислења и информации за севкупните активности на агенцијата и соработката со нашата држава.Претседателката Сиљановска Давкова, изразувајќи благодарност за долгогодишното партнерство, оцени дека напорите на УНФПА за унапредување на репродуктивното здравје, родовата еднаквост и младинскиот ангажман во македонското општество оставија опипливи придовивки за разниливите групи и ги поздрави досега спроведените проекти и иницијативи во соработка со македонската влада.Претседателката Сиљановска Давкова ја истакна својата посветеност за поддршка на значајната работа на УНФПА и изрази очекување за засилување на партнерството во годините пред нас.

Македонија | пред 1 година

Претседателката Сиљановска Давкова ги прими акредитивните писма на новоименуваниот амбасадор на Перу

Претседателката Гордана Сиљановска Давкова денеска ги прими акредитивните писма на новоименуваниот амбасадор на Република Перу, со седиште во Букурешт, Феликс Рикардо Денегри Боса.На церемонијата на предавање на акредитивните писма, претседателката Сиљановска Давкова изрази уверување дека идниот развој на односите и соработката меѓу двете земји ќе претставуваат позитивен пример и предизвик за нивно постојано надградување со нови содржини во конкретни области.Посочувајќи дека светот денес се соочува со бројни предизвици, претседателката порача дека меѓусебната соработка е од суштинско значење не само за просперитетот на двете земји, туку и за градење на посилна меѓународна заедница.„Нашите држави и покрај географската оддалеченост, споделуваат значајни вредности и стремежи за мир, стабилност и развој, поврзани преку заемната посветеност на демократските принципи и правата на човекот, како и преку интересот за зајакнување на културните, економските и образовните врски“, истакна во поздравното обраќање претседателката Сиљановска Давкова.Во своето обраќање амбасадорот на Перу, истакна дека двете држави споделуваат заедничките демократски вредности, промовирање на мирот, економскиот напредок и човековите права, со што придонесуваат не само за јакнење на сопствените држави туку и за глобалната стабилност.Перуанскиот амбасадор ја истакна мултилатералната соработка и се заблагодари за македонската поддршка на кандидатурите на Перу во меѓународните организации.Посочувајќи го безвизниот режим меѓу двете земји, тој изрази очекување за развој на туризмот во иднина. Амбасадорот ја потенцираше и улогата на малубројната перуанска заедница во земјава во јакнење на меѓусебните врски и зближување на народите.На свечената церемонија, претседателката му посака на амбасадорот успешно вршење на мисијата и изрази уверување дека со неговото дипломатско искуство ќе придонесе во продлабочување на меѓусебното пријателство.

Македонија | пред 1 година

Сиљановска Давкова ги прими акредитивните писма на новоименуваната канадска амбасадорка Мишел Камерон

Претседателката Гордана Сиљановска Давкова денеска ги прими акредитивните писма на новоименуваната амбасадорка на Канада со седиште во Белград, Мишел Камерон.Посакувајќи ѝ добредојде на амбасадорката Камерон, претседателката Сиљановска Давкова на церемонијата на предавање на акредитивните писма изрази надеж дека за време за мандатот на амбасадорката ќе се отворат нови можности за проширување на соработката и за продлабочување на пријателството меѓу двата народа и изрази очекување за зајакнување на врските помеѓу двете држави.„Во оваа пригода би сакала да изразам благодарност за поддршката којашто Канада ѝ ја дава на мојата земја во процесот на реформите и на нашата интеграција во ЕУ, како и за нашето партнерство и соработка во рамките на НАТО. Тоа партнерство е особено значајно за нас и длабоко го цениме. Во време кога светот се соочува со многубројни предизвици, нашата соработка и солидарност се поважни од кога било“, рече претседателката Сиљановска Давкова, посочувајќи на можностите за зголемување на економската соработка, трговските врски и инвестиции, како и на соработката во областа на образованието.„Младите генерации ученици, студенти, како и нашата администрација и институции, имаат потреба од стекнување нови знаења, усвојување напредни методи и решенија од канадскиот систем, што можат да бидат применливи и кај нас, а со цел поефикасно управување и поголем напредок на земјата на секое поле“, рече претседателката Сиљановска Давкова.Амбасадорката Камерон ја истакна поддршката што Канада ја дава на нашата држава, истакнувајќи го партнерството во рамки на НАТО.„Како партнери во НАТО, нашите земји работат заедно за да го надминат генерацискиот предизвик за безбедноста на Европа - и на светот“, рече амбасадорката Камерон, упатувајќи честитки за лидерската улога во НАТО, со именувањето на Македонка за заменик генерален секретар.„Тука сум за да ги направиме нашите економии посилни преку иницијатива, претприемништво, трговија и инвестиции. Постои основа на која треба да се надградиме. Тоа го сметам за личен предизвик, можеби со помош на над сто илјади Македонци кои сега и Канада ја нарекуваат дома“, рече амбасадорката Камерон, истакнувајќи ги своите заложби за продлабочување и зајакнување на сите врски што ги обединуваат двете држави, а во функција на надградување на стратешкото партнерство, напредок на нашата држава кон Европската Унија и проширување на заедничката посветеност на безбедноста, демократијата и просперитетот.Претседателката Сиљановска Давкова на амбасадорката Камерон ѝ посака успех во извршувањето на одговорната дипломатска мисија.

Македонија | пред 1 година

Сиљановска Давкова на свеченото одбележување на Меѓународниот ден на студентите: Вие го движите општеството, оти ве красат интелектуалната љубопитност и страст, без кои нема реформи

Претседателката Гордана Сиљановска Давкова вчеравечер се обрати на свеченото одбележување на Меѓународниот ден на студентите, што во организација на Младинскиот образовен форум во соработка со Канцеларијата за регионална младинска соработка (РИКО) и Универзитетското студентско собрание – УКИМ, се одржа во Културно-едукативниот центар „Лабораториум“.Во своето обраќање, претседателката Сиљановска Давкова истакна дека студентите се промотори на критичката и слободна мисла, дека тие се Хермес на промените.„Вие имате привилегија, но и одговорност, да бидете мост меѓу сегашноста и иднината. Без вашиот омилен збор „зошто“ нема напредок. Без вашето сомневање нема вистина. Вие го движите општеството, оти ве красат интелектуалната љубопитност и страст, без кои нема реформи“, рече Претседателката. Таа истакна дека амфитеатрите и библиотеките се интелектуални арени за жестоки и за плодни дебати, низ кои се манифестира и обликува критичкото мислење, нивните прашања се подеднакво важни како и нивните одговори, а нивната храброст да размислуваат поинаку го турка светот напред.„Студентскиот живот ви овозможува да учите, но и да ги предизвикате учителите на интелектуален двобој!“, нагласи Претседателката додавајќи дека студирањето не е само академска потрага, туку и битка за вредности, соочување со реалноста и формирање на карактерот.Претседателката им порача на студентите да не се откажуваат од младешките предизвици.„Не плашете се од неуспехот зашто тој е само неминовен чекор кон успехот. Спорете со конечните вистини. Зачувајте ја младешката смелост и бунтовниот дух, тие се најголемите сојузници на прогресот“, порача претседателката Сиљановска Давкова.На настанот поздравно обраќање имаше Александар Николовски, претседавач на Националното студентско тело, а се обратија министерката за образование и наука, Весна Јаневска и претседателот на Владата, Христијан Мицкоски.Во рамки на одбележувањето на Меѓународниот ден на студентите под наслов „Регионална станица студентска: Меѓународен ден на студентите“ што се одржа од 17 до 19 ноември, на Правниот факултет „Јустинијан Први“ – Скопје се одржа саем на студентски и младински организации, а во Ректоратот на УКИМ се одржа институционален дијалог. Свечениот настан вчеравечер содржеше целовечерна културна програма со цел вмрежување и забава, а беше лансирана и платформата за студентска работа „Линкер“.Меѓународниот ден на студентите се одбележува како симбол на борбата за демократско образование и сеќавање на 17 ноември 1939 година, кога нацистите убиле 20 чехословачки студенти што протестирале против окупацијата.

Македонија | пред 1 година

Средба на претседателката Сиљановска Давкова со претседателот на Азербејџан, Илхам Алиев

Претседателката Гордана Сиљановска Давкова, во рамки на учеството на Самитот за климатски промени (КОП29) во Баку, оствари средба со претседателот на Република Азербејџан, Илхам Алиев. На средбата присуствуваше и министерката за енергетика, рударство и минерални суровини, Сања Божиновска.На средбата беа разменети мислења за севкупните билатерални односи меѓу двете држави, при што беше оценето дека тие се пријателски и во таа насока беше изразена посветеност за интензивирање и продлабочување на односите во културата, туризмот, образованието и други области од заемен интерес.Претседателката Сиљановска Давкова го истакна интересот од македонска страна за интензивирање на економската соработка меѓу двете земји, особено во областа на енергетиката, имајќи го предвид нашиот интерес за диверзификација на изворите на снабдување со енергија.Соговорниците се согласија дека треба да се продлабочат економските односи со конкретни билатерални договори, при што изразија задоволство од Меморандумот за разбирање меѓу македонски и азербејџански енергетски компании којшто се потпиша во Скопје со цел зајакнување на македонската енергетска стабилност.На средбата Претседателката ги претстави и инвестициските можности што ги нуди нашата држава. Од страна на претседателот Алијев беше изразена подготвеност за можни инфраструктурни проекти поврзани со гасификацијата на нашата држава.На средбата претседателката Сиљановска Давкова упати честитки за одличната организација на самитот и благодарност за гостопримството.

Македонија | пред 1 година

Интерес за економска соработка со Казахстан - средба на Сиљановска Давкова со казахстанскиот претседател Токајев во Баку

Претседателката Гордана Сиљановска Давкова, во рамки на учеството на Самитот за климатски промени (КОП29) во Баку оствари средба со претседателот на Република Казахстан, Касим-Џомарт Токајев.На средбата беа потврдени пријателските односи меѓу двете држави и беа разменети мислења за актуелните геополитички состојби, како и за регионалната улога на двете држави.Како мост помеѓу Азија и Европа, претседателката го поздрави придонесот на Казахстан и нивното значително влијание во глобални рамки, при што изрази подготвеност за продолжување на кооперативноста и конструктивноста во рамки на меѓународните организации, особено во Обединетите Нации и ОБСЕ.На средбата меѓу двајцата претседатели стана збор и за можностите за соработка во сферата на културата, науката и образованието, за што претседателката Сиљановска Давкова нагласи дека е потребно унапредување на правната рамка, интензивирање на политичкиот дијалог, почести средби, размена на посети и лични контакти.Во таа насока, претседателката изрази интерес за максимизирање на економската соработка, трговската размена, инвестициите, како и за конкретизирање на соработката во градежниот, енергетскиот сектор, ИТ секторот и во туризмот.Во разговорите беше поздравено отворањето на Амбасадата на Казахстан во Скопје, како значен чекор во продлабочување на севкупните билатерални односи.

Македонија | пред 1 година

Седум македонски амбасадори ќе се вратат во земјата, одлучи претседателката Сиљановска Давкова, во тек се консултации за нови

Седум македонски амбасадори ќе се вратат во земјата, по одлуката на претседателката Гордана Сиљановска Давкова за нивно отповикување. Станува збор за повлекување на македонскиот амбасадор во НАТО, Дане Талески, Данчо Марковски од Албанија, Фатон Бејта од Данска, Сали Лимани од Казахстан и амбасадорот Шабан Јашари од Катар. Отповикани се и амбасадорката Теута Агаи Демјаха од функцијата шеф на Постојната мисија на Северна Македонија во ОН во Женева и амбасадорката при Светата Столица во Ватикан, Марија Ефремова. Во тек се консултации за именување на нови амбасадори, објави Дојче Веле.Од кабинетот на претседателката посочуваат дека објавените укази во Службен весник за отповикување на амбасадорите се дел од стандардната законска процедура со која се констатира завршувањето на мандатот по навршени 4 години од упатувањето согласно член 44 од Законот за надворешни работи.По објавувањето на указите, Министерството за надворешни работи и надворешна трговија треба да ги извести амбасадорите за објавениот указ и се започнува постапка за нивно враќање во земјата.Согласно указите, мандатот на Талески во Брисел престанува на 14 јануари 2025 година, а на останатите амбасадори заклучно со 30 ноември годинава.Шефот на дипломатијата Тимчо Муцунски е дециден дека станува збор за редовна процедура, а не вонредно враќање на амбасадорите. Тој на прес-конференција во вторникот (12.11) најави дека во тек се консултации на државниот врв, по што наскоро се очекува да почне со процес на именување на нови амбасадори.Во однос на амбасадорите Љубомир Фрчкоски во ОН, Андреј Жерновски во Букурешт и Весел Мемеди во Рим, Муцунски вели дека амбасадорот Фрчкоски поднесе оставка, но тоа не значи дека тука се завршени процесите околу внатрешна ревизија за финаниското работење.„Во врска со амбасадорот Жерновски, и амбасадорот Мемеди се водат внатрешни процедури во рамките на Министерството за надворешни работи, во согласно со Законот за надворешни работи и соодветно ќе бидете информирани кога ќе завршат тие процедури. Формално правно амбасадорот Мемеди е се уште амбасадор. Формално правно, амбасадорот Жерновски никогаш не ни станал амбасадор во Букурешт, бидејќи нема предадено акредитивни писма, додека Фрчкоски е амбасадор во оставка“, вели Муцунски во изјава којашто ја пренесе агенцијата МИА.Амбасадорот Андреј Жерновски во објава на социјалните мрежи најавува тужби. Вели дека клеветењето и нанесување штета на нечиј личен углед и интегритет е крајно сериозна работа.„Како доказ за трагикомичните лаги, денеска ја објавувам фотографијата од предавањето на моите акредитиви во романското МНР. Дополнително, онаму каде ќе биде потребно, ќе ја доставам и мојата лична карта во Романија, која се издава на дипломати, на која пишува дека сум амбасадор на Република Северна Македонија во Букурешт. Истата е издадена од Министерството за надворешни работи на Романија“, вели Жерновски.Указите за отповикување на амбасадорите беа објавени во вторникот во Службен весник.

Македонија | пред 1 година

„ЕУ мора да биде јасна за проширувањето“: средба на претседателката Сиљановска Давкова со чешкиот премиер Петр Фиала

Претседателката Гордана Сиљановска Давкова, во рамки на учеството на Самитот за климатски промени (КОП29) во Баку, оствари средба со премиерот на Чешката Република, Петр Фиала.На средбата беа разменети мислења за севкупните билатерални односи меѓу двете држави, а во фокусот на разговорите беше евроинтегративниот процес.Претседателката Сиљановска Давкова ја изрази решеноста од македонска страна за натамошен развој и зајакнување на силното партнерство со Чешката Република, како на билатерално и мултилатерално политичко ниво, така и во доменот на економската соработка.Претседателката Сиљановска Давкова се заблагодари за принципиелната и доследна чешка поддршка за македонската евроинтеграција оценувајќи ја Чешка како важен партнер и силен поддржувач на процесот на проширувањето на ЕУ.На средбата, претседателката Сиљановска Давкова посочи на потребата ЕУ да биде јасна и непоколеблива во својата стратегија за проширување кон Западен Балкан, не оставајќи простор за нејаснотии.

Македонија | пред 1 година

Сиљановска Давкова - Радев: Билатералните спорови да се решаваат во рамки на принципите и вредностите на ЕУ

Претседателката Гордана Сиљановска Давкова оствари средба со бугарскиот претседател Румен Радев на маргините на Конференцијата за климатски промени – COP 29 во Баку, Азербејџан.Во разговорот кој траеше еден час и се одвиваше во конструктивна атмосфера се разговараше за потребата од унапредување на македонско-бугарските односи, за надминување на отворените прашања меѓу двете држави, како и за можностите за продлабочување и динамизирање на билатералната соработка во повеќе области од взаемен интерес.Двајцата соговорници ги изложија своите позиции во поглед на можните решенија за предизвиците на македонските евроинтеграции.Претседателката ја подвлече важноста од продолжување на билатералниот политички дијалог на сите нивоа и притоа посочи дека треба да се почитуваат позициите и интересите на обете страни и дека решавањето на билатералните спорови треба да е во рамките на основните вредности и принципи на Европската Унија.Таа нагласи дека односите треба да се развиваат врз основа на заемно почитување, поддршка и активна соработка што ќе придонесе за јакнење на довербата и пријателството меѓу двата народа.Бугарскиот претседател Радев укажа на потребата од брзо решавање на отворените прашања, како и на потребата од воспоставување на добри односи во сите области од заемен интерес за полесно меѓусебно разбирање.Во разговорот двајцата соговорници се согласија за организирање на официјални посети на кои ќе се конкретизираат заложбите за подобра севкупна соработка меѓу двете држави.

Македонија | пред 1 година

Македонскиот пат кон ЕУ е заложник на билатерализацијата на проширувањето – средба на Сиљановска Давкова со словачкиот претседател Петер Пелегрини

Претседателката Гордана Сиљановска Давкова, во рамки на учеството на Самитот за климатски промени (КОП29) во Баку, оствари средба со претседателот на Република Словачка, Петер Пелегрини.На средбата беа разменети мислења за севкупните билатерални односи, македонските евроинтеграции, како и за потребата од заеднички регионален пристап во надминување на глобалните предизвици.Словачкиот претседател на средбата оцени дека македонската евроинтеграција е заложник на билатерализацијата на проширувањето на ЕУ, при што нагласи дека Словачка е силен поддржувач на проширувањето на Европската Унија и Братислава ја критикувала блокадата на македонската евроинтеграција на многу состаноци на Советот на ЕУ.Претседателката Сиљановска Давкова истакна дека високо ја цениме досегашната поддршка од Словачка за македонскиот евроинтегративен пат и изрази убедување дека меѓусебната помош ќе продолжи и во натамошниот дел од процесот на нашето пристапување во Европската Унија.Претседателката изрази задоволство од континуираниот развој на македонско-словачките односи и уверување за уште поуспешна и плодна соработка во периодот што следи. Како сојузнички во НАТО, претседателката Сиљановска Давкова изрази уверување за продолжување на добрата соработка во одбраната и во безбедноста.

Македонија | пред 1 година

Средба Сиљановска Давкова-Де Кро: Белгија со силна поддршка за македонските евроинтеграции

Претседателката Гордана Сиљановска Давкова, во рамки на учеството на Самитот за климатски промени (КОП29) во Баку оствари средба со премиерот на Кралството Белгија, Александер Де Кро.На средбата беа разменети мислења за севкупните билатерални односи меѓу двете држави, а во фокусот на разговорите беа македонските аспирации за членство во Европската Унија.Белгискиот премиер Де Кро истакна дека нашата држава може да смета на силна белгиска поддршка, затоа што според официјален Брисел, земјата направила огромен напредок и сега на ред е Европската Унија да стори нешто.Претседателката Сиљановска Давкова, истакнувајќи ги добрите и пријателски односи меѓу двете држави, ја изрази потребата од интензивирање на комуникацијата на високо и на највисоко ниво.Во контекст на пристапниот процес кон Европската Унија, претседателката Сиљановска Давкова посочи на потребата од отворање на преговорите за членство, со цел мобилизација на институциите и фокус на реформите и стандардите, особено на владеењето на правото и борбата против корупцијата.Претседателката Сиљановска Давкова го нагласи очекувањето од македонска страна за фер процес на пристапување во ЕУ кој ќе ја почитува националната гордост на нашите граѓани и ќе се води на начин што длабоко не го вознемирува нивното чувство за национален идентитет.

Македонија | пред 1 година

Сиљановска Давкова на КОП29: Од суштинско значење е обезбедувањето финансии за имплементација на климатските цели

Претседателката Сиљановска Давкова денеска во Баку, Република Азербејџан присуствуваше на официјалното отворање на 29. Конференција на страните на Конвенцијата на Обединетите нации за климатски промени.На официјалното отворање на самитот, што се одржува под мотото „Со солидарност за зелен свет“, се обратија Мухтар Бабаев, министерот за екологија и природни ресурси на Азербејџан, како претседател на КОП29, Сајмон Стил, извршниот секретар на Рамковната конвенција на Обединетите Нации за климатски промени, како и претседателoт на КОП28, министерот за индустрии и високи технологии на ОАЕ, Султан Ахмед Ал Џабер.Во фокусот на разговорите меѓу претставниците на земјите учеснички на Конференцијата ќе биде обезбедувањето финансии неопходни да им се помогне на земјите во развој со цел да се прилагодат на климатските промени и да ги спроведат мерките потребни за постигнување на климатските цели.Утре, претседателката Сиљановска Давкова ќе има обраќање на првата пленарна сесија на сегментот на високо ниво за шефови на држави и влади.

Македонија | пред 1 година

Учество на претседателката Сиљановска Давкова на Самитот за климатски промени (КОП29) во Азербејџан

Претседателката Гордана Сиљановска Давкова престојува во Баку, Република Азербејџан, по повод учеството на Светскиот лидерски самит за акција во рамки на 29. Конференција на страните на Конвенцијата на Обединетите Нации за климатски промени – КОП29.Во рамки на учеството на самитот, претседателката Сиљановска Давкова ќе се обрати на првата пленарна сесија и предвидено е да оствари повеќе билатерални средби со шефови на држави и влади, како и средби со претставници на меѓународни организации.Во состав на македонската државна делегација што ја предводи претседателката Сиљановска Давкова, се заменик претседателот на Владата и министер за животна средина и просторно планирање, Изет Меџити и министерката за енергетика, рударство и минерални суровини, Сања Божиновска.

Македонија | пред 1 година

Сиљановска Давкова - Прескер: Македонските евроинтеграции да се базираат на критериумите кои важат за другите кандидати

Претседателката Гордана Сиљановска Давкова денеска го прими амбасадорот на Република Словенија, Грегор Прескер.На средбата беа разменети мислења во однос на пристапниот процес на земјава за членство во Европската Унија, при што претседателката порача дека македонските евроинтеграции е неопходно да се базираат на критериумите кои важат за другите кандидати.Во таа насока, претседателката го реафирмираше ставот дека евроинтеграцискиот процес на земјава треба да се одвива согласно принципот на заслуги и со доследно спроведување на копенхагенските критериуми.На средбата соговорниците изразија подготвеност за натамошно интензивирање на билатералната соработката и заедничко регионално дејствување со цел економски просперитет и справување со глобалните предизвици.Во таа насока беше констатирано дека Словенија е еден од најзначајните трговски партнери и инвеститори во земјава, но дека потенцијалите за економската соработка не се до крај искористени, со што нејзиното интензивирање треба да биде еден од главните приоритети на двете земји во иднина.Двајцата соговорници ја потврдија посветеноста за натамошна соработка и во рамки на меѓународните организации и промовирање на заедничките вредности на демократијата, мирот и одржливиот развој на глобалната сцена.

Македонија | пред 1 година

Сиљановска Давкова ги додели стипендиите „Борис Трајковски“ за академската 2024/2025 година

Претседателката Гордана Сиљановска Давкова денеска ги додели стипендиите „Борис Трајковски“ за академската 2024/2025 година на 20 најдобри студенти кои своето образование ќе го продолжат на Eвропскиот кампус на Универзитетот Јорк, СИТИ КОЛЕЏ во Солун, Грција.Во своето обраќање на настанот, претседателката Сиљановска Давкова рече дека студирањето на Европскиот кампус на Универзитетот Јорк, СИТИ КОЛЕЏ во Солун, е вистински интелектуален и животен предизвик за секој млад човек решен да го продлабочи знаењето, да ги прошири видиците надвор од татковината, витешки да се натпреварува и да другарува со младите од различни држави и култури, да учи од еминентни професори, да се усовршува и облагородува.„Продолжете ја мисијата на претседателот Трајковски во градењето на разбирање, пријателство, добрососедство и соработка, во случајов преку образовна, научна и културна дипломатија меѓу двете држави. Докажете дека образованието и знаењето зближуваат, а не делат“, истакна Претседателката.На добитниците на стипендии, Претседателката им порача дека двојната диплома како круна на успешното студирање ќе ги направи посигурни во себе, ќе ја зголеми нивната самопочит и ќе им отвори многу врати за професионален ангажман и ќе ја поттикне образовната мобилност.„Сигурна сум дека вашиот избор за стипендисти не е случаен, туку заслужен. Верувам и посакувам да бидете пример за идните студенти како што претседателот Трајковски беше и остана инспиративен пример на политички лидер со дигнитет, интегритет и духовна длабочина!“, рече претседателката Сиљановска Давкова.Поздравувајќи ги стипендистите, министерката за образование и наука, Весна Јаневска истакна дека стипендијата „Борис Трајковски“ е добра можност студентите да добијат двојна диплома: од Универзитетот Јорк и од Универзитетот во Стразбур, а за време на студиските престои во Велика Британија, Франција и Грција да бидат дел од нови, динамични средини, да учат, но и да се дружат со млади кои доаѓаат од различни култури создавајќи трајни пријателства.„Како држава ја поддржуваме образовната мобилност и политиките на Европската Унија за справување со одливот на мозоци, а Владата, преку мултиресорски пристап, креира мерки и активности за да се намали заминувањето на кадрите кои нам ни требаат“, нагласи министерката Јаневска.Посакувајќи им добредојде на стипендистите на Европскиот кампус на Универзитетот Јорк, СИТИ КОЛЕЏ, директорот Јоанис Верверидис истакна дека извршната МБА е меѓународна програма, испорачана од меѓународни професори од висок калибар, чија цел е подобрување и развој на нивните лидерски и менаџерски вештини.„Наша цел е да ви понудиме уникатно меѓународно образовно искуство што ќе ви овозможи да се остварите и да напредувате во глобалното опкружување и да направите разлика во општеството и економијата на вашата земја и на целиот регион, придонесувајќи за јавното добро“, нагласи директорот Верверидис.Стипендиите „Борис Трајковски“ за студии од втор циклус на извршната МБА програма се доделуваат од 2003 година и досега се доделени 297 стипендии. Доделувањето на овие стипендии е резултат на успешната соработка меѓу Претседателот, Министерството за образование и наука, Меѓународната фондација „Борис Трајковски“ и СИТИ КОЛЕЏОТ во Солун. Годинешните стипендисти ќе се стекнат со две дипломи за мастер студии по деловна администрација и тоа од Универзитетот Јорк, Обединетото Кралство и од Универзитетот во Стразбур, Франција.

Македонија | пред 1 година