загадување

Не е екологија, туку живот и смрт: алармантни податоци за аерозагадувањето во земјава од „О2 иницијатива“

Аерозагадувањето во Македонија одамна го надмина прагот на еколошки проблем и прерасна во сериозна и долготрајна здравствена криза, предупредуваат од О2 иницијативата. Според нив, загадувачите како ПМ честичките, издувните гасови од дизел возилата, бензенот, полицикличните ароматични јаглеводороди, одредени тешки метали од индустријата и соединенијата што настануваат при согорување на дрва, јаглен и нафта, се класифицирани како канцерогени од прва група. Тоа значи дека, според Меѓународната агенција за истражување на ракот, станува збор за супстанции за кои е докажано дека предизвикуваат рак кај луѓето.Оттука, според О2 иницијативата, прашањето за загадениот воздух не смее повеќе да се третира како споредна еколошка тема, туку како итна здравствена состојба што бара брзи, системски и решителни мерки. Наместо тоа, проблемот со години се одолговлекува, а неопходните решенија се предмет на политички калкулации.Македонија со години се наоѓа на самиот врв во Европа според бројот на починати поврзани со изложеност на ПМ2,5 честички. Само во 2023 година, оваа бројка изнесувала 222 лица на 100.000 жители во ризик, што ја става земјата меѓу најпогодените на континентот.Податоците за 2025 година, според О2 иницијативата, покажуваат дека состојбата не само што не се подобрува, туку останува хронично запоставена. И понатаму дел од мерните станици со години не функционираат, а резервните делови за нефункционалните инструменти не се набавуваат навреме. Во моментот, според нив, не работат 39 инструменти, што претставува околу 30 проценти од вкупниот број.Дополнително, предупредуваат дека и понатаму не се мерат тешките метали, бензенот, бензо(а)пиренот, хемискиот состав на ПМ2,5 и прекурсорските супстанции на озонот на доволен број мерни места, иако тоа е законска обврска. Како последица, јавноста и институциите немаат јасна слика на какви концентрации на опасни и канцерогени супстанции се изложени граѓаните. Од О2 иницијативата потенцираат дека на ова поле ништо суштински не е сменето ниту со актуелната власт, иако додека била во опозиција јавно барала буџетски средства за оваа намена.Тие укажуваат и дека максимално дозволените дневни и годишни концентрации на загадувачките супстанции, утврдени и кај нас и во Европската Унија, не се базирани на заштита на здравјето, туку се резултат на политичко-економски компромиси, поради што се значително повисоки од вредностите што реално би го штителе човечкото здравје.Особено загрижувачки, споре „О2“, е загадувањето со ПМ2,5 честичките, кои се сметаат за најопасни. Во последните пет години не е забележана суштинска промена, а сезонските варијации главно се должат на климатските услови. Во зима, концентрациите достигнуваат и до 18 пати повисоки вредности од здравствено прифатливите, додека надвор од грејната сезона тие се и до 3,5 пати повисоки. Поразителен е податокот дека ниту Лазарополе, кое се смета за референтно чисто подрачје, не ги исполнува здравствените граници за ПМ2,5.Слична е состојбата и со ПМ10 честичките, кај кои зимските концентрации достигнуваат и до 7,5 пати повисоки вредности, а летните до 2,5 пати. Единствено Лазарополе бележи вредности во рамки на границите за заштита на здравјето.Посебно се потенцира и загадувањето со азотен диоксид, кое најчесто се поврзува со сообраќајот и согорувањето фосилни горива, а за кое ретко се зборува во јавноста. Во зима, концентрациите се и до 4,5 пати повисоки, а во лето до четири пати. Скопје е на врвот, но високи вредности се регистрираат и во Тетово, Кавадарци, Кичево и Охрид, особено на мерни места во близина на фреквентни сообраќајници. И тука, според податоците, Лазарополе повторно изненадува со повисоки концентрации од неколку други градови.Од О2 иницијативата оценуваат дека ниту централната, ниту локалната власт не презеле системски мерки за намалување на загадувањето во текот на целата година. Нема сериозен пристап кон проблемот со греењето, сообраќајот, индустријата и градежништвото, туку само декларативни ветувања.Како особено симптоматично се посочува дозволувањето да чадат оџаци без филтри, иако тие можат релативно брзо и по прифатлива цена да се инсталираат, продолжената употреба на петрол-кокс во индустриски погони, користењето јаглен и мазут наместо гас, греењето на училишта и болници на нафта, како и сообраќајот со возила без катализатори и филтри. Дополнително, градилиштата и каменоломите често работат без обврска да мерат ПМ честички, иако тоа лесно може да се регулира со законски измени.Во однос на Скопје, О2 иницијативата оценува дека субвенциите се користат како алиби, а не како реална мерка. Во град со десетици илјади домаќинства што се греат на дрва, субвенционирањето на неколку стотици инвертери и филтри не може да донесе суштинска промена. Со сегашното темпо, проблемот би се решавал со децении. Дополнително, без забрани и строга контрола, мерките остануваат само на хартија.Податоците покажуваат дека од 2019 година наваму во Скопје се субвенционирани околу 10.000 инвертери, додека според пописот од 2021 година, меѓу 40.000 и 55.000 домаќинства во градот сè уште се греат на дрва. На државно ниво, во 2024 година биле регистрирани над 684.000 возила, од кои две третини се дизел, две третини се постари од 15 години, а околу една третина се во Скопје. И покрај најавите, не е воведена забрана за увоз на постари возила под ЕУРО 5 и ЕУРО 6 стандардите.Заклучокот на О2 иницијативата е јасен: дозволувањето на вакви практики значи свесно откажување од заштита на здравјето на граѓаните и прифаќање на аерозагадувањето како нормална, иако смртоносна состојба.

Македонија | пред 3 дена

Ѓорѓиевски: Засилени инспекции во Скопје – казни до 53 000 евра за загадувачи на воздухот

На вонредната седница на Советот на Град Скопје, градоначалникот Орце Ѓорѓиевски се осврна на проблемот со аерозагадувањето и најави конкретни мерки за негово намалување. Тој посочи дека во буџетот на Градот за 2026 година се предвидени 64 милиони денари за заштита на животната средина, што е за 40 милиони повеќе од лани, како и дополнителни 220 милиони денари за одржување на зелени површини и паркови.Ѓорѓиевски нагласи дека загадувањето не е проблем кој се решава преку ноќ, но дека е обврска на Градот да дејствува за почист и поздрав воздух. Во последниот период, како што рече, се извршени засилени инспекциски контроли на индустриски капацитети, градилишта и јавни површини, со изречени казни од 1.000 до 53.000 евра, вклучувајќи прекршочни платни налози, решенија за задолжување и опомени.Инспекторите вршеле надзори на поранешните фабрики ОХИС и Стаклара, како и во општина Сарај, при што десетици правни и физички лица биле казнети за неправилно одлагање отпад и палење. Контроли имало и на повеќе градилишта, при што се изречени казни за непочитување на времен режим на сообраќај и комунални прописи.Претседателот на Советот, Даме Димитровски, посочи дека индустријата треба да примени европски практики во мерењето на загадувањето и јавноста на податоците, а градот и општините да ги зголемат инспекциските надзори.Советниците истакнаа дека Градот мора да донесе спроведливи мерки кои навистина ќе дадат резултати, вклучувајќи дислокација на цементарницата „Усје“, забрана за стари дизел-возила под стандардот ЕУРО 4, субвенции за електрични возила и екофлоти за претпријатија.Градоначалникот потсети дека досегашните заложби вклучуваат редовни и вонредни инспекции, решавање на сообраќајот, изградба на зелени коридори и соодветен третман на депониите, со цел Скопје да стане почист и поздрав град за сите граѓани.

Скопје | пред 1 седмица

Димитровски: Како Совет имаме обврска да се бориме за почист воздух на скопјани

„Првата битка е итно да обезбедиме чист воздух во просториите во кои престојуваат ранливи групи во текот на зимата, а втората би рекол не е битка туку војна, е да поставиме добри основи за војна со загадениот воздух во нашиот град. За подобар квалитет на воздухот во просториите, потребно е да им обезбедиме на домаќинствата сигурен извор на топлина, како би можеле да ги заменат ќумбињата, печките на дрва со централно греење, да обезбедиме соодветна вентилација и филтрација на воздухот преку системите за греење, ладење, климатизација во градинките, училиштата и болниците, и не е за занемарување тоа што овој Совет изгласа да се купат прочистувачи за воздух за 400 училници во средните училишта во Скопје, тие се набавиме и ќе бидат дистрибуирани во текот на овој месец“, истакна Даме Димитровски претседател на Советот на град Скопје, на денешната вонредна седница на Советот.Димитровски посочи дека во борба со загадувањето, индустријата треба да примени европски практики во мерењата и јавноста на податоците, а градот и општините да ги зголемат инспекциските надзори.„Индустриските капацитети во Скопје, се наши соседи и мора да покажат чесност, преку јавно и транспарентно прикажување на континуирани мерења. Бараме од индустријата да примени европски практики во технологијата, во мерењата и јавноста на податоците. Малите и средни претпријатија имаат на располагање неколку понудени програми во кои може да искористат субвенции и од државата за намалување на потрошувачката на енергија, за подобрување на ефикасноста и намалување на загадувањето. Градот и општините треба уште посилно да притискаат и со едукација и со превенција, но и со инспекциски надзори секаде каде имаат надлежност и дополнително, при донесувањето на планската документација, чистиот воздух, и моделирањето на движењето на воздухот треба да станат обврска и за градот и за општините. Ние како Совет имаме обврска да се бориме за она што им е потребно на скопјани“, рече Димитровски и додаде:„Ќе мора да има мониторинг на сите големи загадувачи, вклучувајќи ги индустријата, домаќинствата, сообраќајот, дивите депонии, и хорека индустријата. Затоа уште на почетокот на 2026, бараме да се започне со подготовка на План за борба со аерозагадувањето. Во овој план бараме да се анализира влијанието на сите загадувачи, да се регистрираат сите оџаци во котлината, да се анализира влијанието на досега спроведените мерки во изминативе години, да се дефинираат мерки и акции кои можат да му помогнат на градот. Ние, Советот на град Скопје треба да бидеме строга контрола на планови кои ќе придонесат за поголемо загадување, но и ветер во грб за секоја акција која ќе го намали загадувањето“.

Скопје | пред 1 седмица

Казни и до 53.000 евра за загадувачите – Скопје засилува инспекциски надзор, но воздухот и понатаму останува проблем

Иако надлежните се пофалија со рекордни инспекциски контроли и изречени казни, загадениот воздух и понатаму останува секојдневие за скопјани. Ова беше главната тема на денешната вонредна седница на Советот на Град Скопје, на која градоначалникот Орце Ѓорѓиевски информираше за преземените мерки и финансиските алокации за заштита на животната средина.Тој соопшти дека во периодот од 6 ноември до 1 јануари инспекциските служби издале 90 прекршочни платни налози и глоби, 33 решенија за задолжување, 35 вонредни надзори и 290 опомени. Посебно бил засилен надзорот кај правни субјекти во кругот на поранешните индустриски капацитети, како ОХИС и Стаклара, како и на подрачјето на Сарај.Во прилог објавата на социјални мрежи од градоначалникот Орце Ѓорѓиевски:Нема компромис со загадувачите - изречени се казни до 53.000 евра!Денеска се одржа вонредна седница на советот на градот Скопје, посветена на загадувањето на амбиенталниот воздух и неговите причинители.Драго ми е што по долго време за овие прашања се дискутира искрено и без политиканство, со цел да се преземат конкретни активности, а не само да се ставаат проблемите под тепих. Се согласувам со сите излагања на советниците.Овој проблем бара посветеност, конкретни акции и заедничка одговорност.Загадувањето не е проблем кој се решава преку ноќ, ниту е создаден од сегашниот систем, но сега е наша обврска да делуваме и да го направиме Скопје почист и поздрав за сите.Во изминатиот период преземавме засилени инспекциски контроли на индустриските капацитети, воведовме редовни и вонредни надзори, работиме на решавање на сообраќајот, изградба на нови зелени површини и зелени коридори, како и соодветен третман на депониите.Само во периодот од 6 ноември до 1 јануари, издадени се 90 прекршочни платни налози и глоби, 33 решенија за задолжување, 35 вонредни надзори и 290 опомени.Инспекторите за животна средина извршија над 45 вонредни надзори на правни субјекти во кругот на поранешни фабрики ОХИС и Стаклара, како и на територијата на општина Сарај.Изречени се глоби во висина од 1.000 до 53.000 евра.Одговорни лица во правни субјекти се казнети со по 3.000 евра, додека десетици физички лица кои неправилно одлагаа отпад на јавни и приватни површини добија казни од 250 до 500 евра за палење и неправилно одлагање на отпадот.Инспекцијата за патен сообраќај и патишта изврши контроли на девет градилишта, од кои седум беа задолжени со решенија за времен режим на сообраќај, а две имаа позитивни записници.На едното градилиште е изречен прекршочен платен налог од 3.000 евра за правно лице и 900 евра за одговорното лице.Комуналната инспекција изврши 240 контроли на градилишта низ целото Скопје, опоменувајќи 25 објекти, а на 11 се изречени глоби од по 1.300 евра. Комуналните редари вршат постојана обиколка и контрола на територијата на градот, плоштадите и јавните површини, со што се изречени повеќе од 60 казни.За буџетот за 2026 година, предвидени се 64 милиони денари за делот за животна средина, во споредба со 24 милиони денари во 2025 година, што јасно покажува колку сериозно ја сфаќаме заштитата на здравјето на граѓаните. Дополнително, се обезбедени 220 милиони денари за подигање и одржување на јавно зеленило и паркови, како дел од нашите искрени заложби за чист воздух и здрав живот.Предвидени се субвенции за инвертер-клима уреди, чистење на оџаци, филтри за истите, субвенции за велосипеди итн.

Скопје | пред 1 седмица

Домаќинствата и сообраќајот главни извори на загадување

Инспекциските контроли во Цементарницата „Титан – Усје“ во текот на 2025 година не утврдиле неправилности во однос на аерозагадувањето, соопшти директорката на Државниот инспекторат за животна средина, Ивана Гиновска. Извршени биле два редовни и четири вонредни надзори, вклучително и ненајавени контроли со инспектори од повеќе институции.Гиновска истакна дека фабриката редовно доставува извештаи за емисиите, а инспекциите продолжуваат на секои 15 дена. Таа нагласи дека иако индустријата загадува, според експертски анализи најголемо влијание врз квалитетот на воздухот во Скопје имаат домаќинствата, потоа сообраќајот, а индустријата е на трето место.Од Управата за животна средина информираа дека „Титан – Усје“ има важечка А-интегрирана еколошка дозвола до 2027 година и дека не постојат законски услови таа да биде одземена. Институциите најавија продолжување на засилените контроли за заштита на амбиентниот воздух.

Скопје | пред 1 седмица

Ѓорѓиевски: Нема толеранција за никого - изречени се казни на загадувачите во Скопје

Скопје изминативе денови се соочи со сериозно загадување на воздухот, при што, според податоците од државниот мониторинг, беше надминат дозволениот праг, состојба која наметна итна и решителна реакција, изјави градоначалникот на Скопје, Орце Ѓорѓиевски.„Како градоначалник, но и како граѓанин кој заедно со своето семејство го дише истиот воздух, немав право да молчам и да не постапам“, порача Ѓорѓиевски.Тој информира дека во изминатите два дена биле спроведени засилени и координирани инспекциски надзори на терен, при што Инспекторатот за животна средина изрекол казни за правни лица кои ја загадуваат животната средина.„Законот важи за сите. Оваа акција нема да застане тука – продолжуваме уште поинтензивно и уште поодлучно. Секој што го загрозува здравјето на граѓаните ќе биде санкциониран, без никаква толеранција“, нагласи градоначалникот.Паралелно со репресивните мерки, Градот Скопје објави и сет препораки и мерки за заштита од загадениот воздух, кои веќе се применуваат и се јавно достапни за граѓаните. Според Ѓорѓиевски, тие се важен дел од заедничката борба за почист воздух.Во својата изјава, тој ја поздрави и континуираната заложба на Владата на Република Македонија за подобрување на квалитетот на воздухот, наведувајќи ги Стратегијата за почист воздух 2024–2030, субвенциите за инвертер клими, поставувањето прочистувачи на воздух во градинките, пошумувањето, гасификацијата, изградбата на когенеративни централи и новите паркови со вградени прочистувачи.„Борбата за почист воздух е заедничка. Апелирам до сите скопјани да се придржуваат до препораките и мерките – секој поединечен придонес е важен“, истакна Ѓорѓиевски.Тој порача дека за надлежностите на Градот Скопје нема да има компромис.„Ред мора да има. Законот ќе се спроведува, а здравјето на скопјани ќе биде наш апсолутен приоритет“, рече градоначалникот.Граѓаните се повикуваат да пријавуваат потенцијални загадувачи на електронската адреса: prijavizagaduvachi@skopje.gov.mk.

Скопје | пред 3 седмици

Нема предвремено распуштање поради загадувањето: Наставата продолжува до крајот на месецот, порача Јаневска

Наставата во основните и средните училишта ќе се одвива до крајот на месецов, по што учениците ќе заминат на редовен зимски распуст. Министерството за образование и наука не размислува за предвремено завршување на првото полугодие поради загадениот воздух, изјави денеска министерката Весна Јаневска.Одговарајќи на новинарско прашање дали поради актуелното аерозагадување се разгледува можноста за порано распуштање во учебната 2025/2026 година, Јаневска рече дека до почетокот на распустот остануваат уште неколку наставни денови и дека во моментов нема информации дека здравјето на учениците е загрозено.Таа нагласи дека, доколку од здравствени причини учениците отсуствуваат ден или два од настава, тоа не претставува проблем, но оцени дека треба да се прекине практиката од минатото кога, како што рече, од различни причини се скратувале учебните денови.„Жал ми е што морам да направам една груба споредба, но во некои европски земји децата и кога имаат грип, и во градинките и во училиштата, одат на настава сè додека нивното здравје не е загрозено. Ова го велам поради коментарите дека нашите деца многу учат и се преоптоварени. Не, не се. Доколку здравјето им е во прашање, секако дека лекарите и родителите ќе одлучат за тоа, но ако не станува збор за ништо сериозно, не е проблем да отсуствуваат ден-два“, изјави Јаневска.Таа додаде дека вистински проблем би било повторно воведување на практиките од минатото, кога, како што рече, учебните денови се скратувале за учениците да одат на поевтини одмори, да се подготвуваат за писмени работи или од други причини што немаат врска со здравјето.„Овие негативни појави полека треба да почнеме да ги отстрануваме. Но секогаш ќе одлучуваме во корист на здравјето на учениците. Во овој момент немаме информации дека нивното здравје е загрозено“, нагласи министерката.

Магазин | пред 3 седмици

Јовановска: Левица бара вонреден инспекциски надзор во Цементарница УСЈЕ

„Скопје повторно се гуши во ПМ честички. Секоја година, особено во зимскиот период Скопје руши рекорди во загаденост, но освен паушални изјави и празни ветувања, властите не превземаат никакви конкретни мерки за решавање на овој проблем“, истакна Катерина Јовановска, координаторка на советничката група на Левица во Советот на Град Скопје, на прес конференција на која соопшти и дека поднеле Барање за вонреден инспекциски надзор во Цементарница УСЈЕ.Според неа иако проблемот со загадувањето во Скопје е повеќедецениски, ниту една од партиите кои се менуваа на власт, не направиле речиси ништо за намалување на загадувањето, ниту пак понудиле трајно решение. „Јавниот градски превоз е колабиран, нови еколошки автобуси нема, а Јавното обвинителство веќе три години не постапува по кривичната пријава поднесена од градот Скопје против загадувачот Цементарница УСЈЕ“.Од Левица јавно прашуваат „до кога профитот ќе биде пред здравјето на граѓаните и додаваат дека здравјето на граѓаните нема цена. Како што посочи Јовановска, советничката група на Левица освен барањето за вонреден инспекциски надзор во УСЈЕ доставиле и низа амандмани на Буџетот на Град Скопје за следната година, со конкретни мерки за намалување на загадувањето.„Поднесовме амандмани за набавка на еколошки дрва со цел намалување на загадувањето на воздухот, субвенции за прочистувачи на воздухот за жителите на Скопје, субвениции за граѓани и фирми за набавка на филтри за оџаците... Дел од овие амандмани ги поднесе и минатата година, но ниту еден од нив не доби подршка од советниците на ДПМНЕ и СДС“, истакна Јовановска.Левица ќе даде и поддршка на најавениот протест во четврток, против Цементарница УСЈЕ, и се надеваат на масовно присуство на скопјани на овој протест затоа што, како што рече Јовановска „сепак за здравјето се работи“.

Скопје | пред 3 седмици

Католичката црква во Скопје: „Графитот на Мајка Тереза е навредлив и недостоен“

Скопската бискупија и Струмичко-скопската епархија реагираа на акцијата на екоактивисти кои, во деновите на силно загадување, на муралот на Мајка Тереза на „Школка“ во Градскиот парк ѝ доцртаа марама преку носот.Од Католичката црква во Македонија изразуваат жалење и го оценуваат потегот како недостоин и навредлив, посочувајќи дека со ваквата интервенција се повредуваат верските чувства на верниците и на почитувачите на делото на светицата.Во реакцијата се потсетува дека света Мајка Тереза е светица на Католичката црква, родена во Скопје, почесна граѓанка на градот и личност со глобално признание. Со живот посветен на сиромашните и болните, со едноставност, понизност и љубов, таа ја направила Македонија и Скопје препознатливи во светот како пример за почит кон другиот.Црквата нагласува дека слободата на уметничко изразување и јавната дебата се важни општествени вредности, но мора да се остваруваат со почит кон достоинството на другите и кон она што е свето за една заедница. Затоа, сметаат дека е недозволиво светите ликови, како света Мајка Тереза, да се инструментализираат или злоупотребуваат за какви било цели.Акцијата со муралот беше изведена во период кога Скопје се соочува со загаден воздух, чад од депониите „Вардариште“ и „Дрисла“ и со подметнати пожари, велат од црковните власти.

Скопје | пред 3 месеци

Мицкоски најави филтри на оџаците како мерка против загадувањето: Очекувам невладини да се борат за воздуј по седум години молк

Премиерот Христијан Мицкоски изјави дека Владата веќе размислува за конкретни мерки за намалување на загадувањето во претстојната зимска сезона.„За еден месец започнува грејната сезона. Денеска на владина седница ќе отворам значајна точка. Гасификацијата ќе трае подолго, затоа треба да разгледаме можност, како што субвенционираме клими и топлотни пумпи, да обезбедиме филтри на оџаците за 5 до 10 илјади домаќинства. Лично работев на оваа проблематика и видов дека во голем дел од градовите на тој начин е намалено загадувањето“, изјави Мицкоски.Тој додаде дека Владата веќе мапирала околу 500 државни објекти кои користат фосилни горива, најчесто дрва, и дека постои можност и таму да се инсталираат филтри.„Очекувам повторно од ноември невладини организации да се активираат и да се борат за почист воздух, иако во изминативе седум години ги немаше. Оваа мерка би била вонредна, но мора да видиме како законски да ја реализираме, бидејќи сме во изборен период“, додаде премиерот.

Скопје | пред 3 месеци

ИЈЗ: Нема зголемена радијација во воздухот, сите мерења се во рамки на нормалниот фон

Институтот за јавно здравје на Република Македонија соопшти дека во периодот од 7 до 14 септември 2025 година автоматскиот систем за мерење на радијација во воздухот работел непрекинато и ги следел податоците од сите 14 мерни станици во земјата.Според резултатите, во Скопје (станица MKMP-1) просечната вредност изнесувала 51 нано сиверт на час, со најниски и највисоки регистрирани вредности од 51 до 69 нано сиверти на час.Денес, на 14 септември во 11:30 часот, регистрирани биле 50 нано сиверти на час – што, како што нагласуваат од ИЈЗ, е во рамки на природниот радијациски фон и не претставува никаква опасност за здравјето на граѓаните.„Нема никакви вредности кои би укажале на зголемена радиоактивност или на ризик за здравјето на населението. Во моментот нема одстапувања од нормалните референтни вредности“, велат од Институтот.Екипи на ИЈЗ по насока на Министерството за здравство и инспекторатот за животна средина земаат примероци од почва и вода во непосредна близина на засегнатите подрачја за физичко-хемиска анализа и за дополнителна проверка на евентуално присуство на јонизирачко зрачење.Институтот најавува дека по обработката на податоците резултатите ќе бидат објавени за јавноста и додава дека состојбата внимателно се следи во координација со сите надлежни институции. Препораката до граѓаните е и понатаму да ги следат официјалните насоки и информации од ИЈЗ.

Скопје | пред 4 месеци

Слабее чадењето во Трубарево, и натаму се затрупува просторот со специјална пена и песок

Од опожарениот простор во Трубарево останува слабо чадење на само неколку точки, кои веќе се затрупани, информира директорот на Дирекцијата за заштита и спасување, Стојанче Ангелов.„Се фрла специјална пена врз песочната покривка за целосно сопирање на чадењето“, изјави Ангелов, додавајќи дека со ваквата интервенција се очекува проблемот во целост да се надмине.

Скопје | пред 4 месеци

Чадењето на Дрисла намалено, останува да се затрупа уште третина од опожарената површина

Чадењето од депонијата Дрисла е значително намалено, соопшти директорот на Дирекцијата за заштита и спасување, Стојанче Ангелов.Според него, изработен е дополнителен земјен пат со кој е отсечен ѕидот на депонијата од заезерената површина со отпадни води полни со запаливи гасови, што овозможило да се намали чадењето, иако тоа сè уште е присутно.„Сеуште чади, но во неспоредливо помал обем во однос на првиот ден. Затрупувањето продолжува и утре, а преостаната е помалку од третина од почетно опожарената површина“, изјави Ангелов.Интервенцијата продолжува со механизација и затрупување на критичните точки со цел целосно гаснење на пожарот.

Скопје | пред 4 месеци

ОЈО Скопје по пожарот во Трубарево: Нема радијација, контаминацијата е хемиска

Основното јавно обвинителство Скопје соопшти дека во врска со големиот пожар во складиште со отпад во Трубарево, засега не е детектирана радијација, туку станува збор за хемиска контаминација.„Радијација не е детектирана, контаминацијата е хемиска. Обвинителството бара поддршка, не издава наредби на АРМ. На барањето беше веднаш одговорено и беше првично детектиран опасен периметар со ниво на загаденост по сектори и согласно тоа надлежни служби пристапија на евакуација. Резултатите од мерењата на инспекторатот за животна средина се уште не се доставени до обвинителството“, соопштија од ОЈО.Пожарот, кој избувна во саботата, предизвика густ токсичен чад што се прошири над повеќе скопски населби. Жителите алармираа за печење на очите и проблеми со дишењето, а дел од нив беа евакуирани. Институциите и натаму вршат мерења и проценки за последиците врз здравјето на населението и животната средина.

Скопје | пред 4 месеци

Четири лица побарале здравствена помош поради пожарот во Трубарево, сите надвор од животна опасност

Министерот за здравство, Азир Алиу, заедно со директорката на Институтот за јавно здравје, д-р Марија Андоновска на заедничката прес конференција при посетатата на Клиниката за токсикологија потенцираа дека од прв момент се следи состојбата со пожарот во скопското село Трубарево и се во постојана координација со сите надлежни институции.- Како што знаете од вчера, Министерството за здравство креираше кризен штаб за состојбата во Трубарево и ја следевме и следиме во реално време целата ситуација што се случува од здравствена гледна точка. Денес сме тука пред токсикологија, имаше 4 хоспитализирани од кои тројца беа амбулантски прегледани и пуштени на домашно лекување, четвртиот пациент е хоспитализиран. Надвор од животна опасност се сите 4 пациенти. Со Институтот за јавно здравје и со директорот на Клиниката за токсикологија направени се протоколи во овој период, доколку има потреба да се интервенира во некој дел. Како што знаете, ИЈЗ вчера излезе со препораки за граѓаните, истите препораки важат и денес, кажа министерот Алиу.Директорката на Институтот за јавно здравје, Марија Андоновска посочи дека ова е една ситуација со која граѓаните и државата за првпат се соочуваат и многу е важно да не се политизира и да не се прави паника.- Најважно е што сите институции според моите информации се веќе вклучени во целиот процес и заедно се координираме.Институтот издаде одредени препораки, тие препораки се општи, но се во согласност со највисоките светски стандарди. Иако овие препораки изгледаат едноставни, сепак доколу се почитуваат од граѓаните од ранливите групи - овие препораки можат да придонесат да немаме онакви здравствени проблеми какви што би можеле да имаме. Институтот располага со најсовремена опрема и со професионалци кои во реално време ни покажуваат дали има отстапување од параметрите на радиоактивност во воздухот. Во моментов нема никакво, ниту минимално отстапување од нормалните параметри кои се однесуваат за радиоактивност во воздухот. Наши екипи ќе пристапат на терен токму во погодените места и ќе ги проверат почвата и водата во овие делови и граѓаните навремено ќе бидат информирани, заклучи Андоновска.

Скопје | пред 4 месеци