По совет на Фон дер Лајен, Македонија побарала средба со Бугарија, но сè уште нема одговор, тврди Мицкоски

Премиерот Христијан Мицкоски вели дека сè уште нема одговор од бугарската страна за средбата што беше побарана по разговорите со претседателката на Европската комисија, Урсула фон дер Лајен.

Мицкоски посочи дека по добиениот совет од Фон дер Лајен, го замолил министерот за надворешни работи и надворешна трговија да побара средба со бугарската страна. Барањето е испратено, но одговор сè уште нема.

— реклама —

„Го замолив министерот за надворешни работи и надворешна трговија да побара средба. Тоа тој го направи; сè уште немаме одговор. Откако ќе добиеме одговор, тогаш повеќе ќе можеме да коментираме“, рече Мицкоски.

— реклама —

Во однос на прашањето за различните ставови кон цар Самуил, премиерот рече дека не знае на што точно се однесуваат тие разлики.

Тој се осврна на Бледскиот договор, посочувајќи дека како резултат на договор од минатото, посмртните останки на Гоце Делчев се наоѓаат во црквата „Свети Спас“ во Скопје.

— реклама —

„Ние, како да имаме селективна меморија, ова делува како на ручек да се послужиме: она што сакаме, а она што не сакаме, го оставаме на страна. Така што, и тие договори треба малку да ја освежат меморијата, регионално“, рече Мицкоски.

— реклама —

Премиерот се осврна и на информациите за антиквитети и реликвии од црквата „Богородица Перивлепта“ во Охрид, за кои, како што рече, постојат наводи дека за време на Првата и Втората светска војна биле одземени и однесени во главниот град на источниот сосед.

Мицкоски посочи дека тие предмети сега се дел од размената, но додаде дека не би навлегувал во дополнителни коментари за ова прашање.