„Принципите траат пократко од интересите“, поранешен функционер на СДСМ за новиот конкурс за зграда за потребите на Општина Центар

Новиот конкурс за изградба на објект за потребите на Општина Центар предизвика реакција кај поранешниот функционер на СДСМ, Васко Кичевски, кој преку фејсбук-објава го поставува прашањето дали локалната власт денес ги следи истите урбанистички принципи за кои неговата партија претходно се залагала.

„Гледам и не ми се верува“, вели Кичевски, потсетувајќи дека во 2011 и 2012 година Општинската организација на СДСМ Центар протестирала против слични урбанистички решенија и ја блокирала работата на Советот.

Тој посочува дека тогаш пораката била дека Центар е презграден, дека јавниот простор мора да се заштитува и дека зеленилото не смее да биде занемарено.

— реклама —

„Денес, очигледно, принципите траат пократко од интересите“, наведува Кичевски.

Според него, потребата Општина Центар да добие функционален и современ објект не е спорна, но клучно е каков ќе биде објектот и колкав простор ќе заземе на сметка на околината.

— реклама —

Кичевски смета дека на локацијата би ѝ одговарала ниска и ненаметлива зграда, архитектонски усогласена со околината, со подземна гаража за решавање на проблемот со паркирањето.

Над подземната гаража, според неговиот предлог, треба да има голема зелена површина со дрвја, тревник и простор отворен за граѓаните, наместо дополнителна масивна градба.

„Архитектурата тука треба да му служи на просторот, а не да го проголта“, вели Кичевски, додавајќи дека Скопје веќе има премногу примери каде што секој слободен квадратен метар се гледа како можност за нова градба.

— реклама —

Тој смета дека токму општинската зграда треба да биде пример за тоа како јавниот интерес може да се стави пред квадратурата, со планирање повеќе зеленило, решавање на паркирањето под земја и оставање доволно простор за граѓаните.

„Ако веќе се прави нов објект, нека биде проект со кој Центар ќе покаже како треба да изгледа современо урбано планирање“, порачува Кичевски.

На крајот тој го сумира својот предлог во три точки: „Мала зграда. Голем парк. Подземна гаража.“