Извршниот директор на Рајанер, Мајкл О’Лири, предупреди дека европските авиокомпании би можеле да банкротираат доколку високите цени на авионското гориво продолжат и во текот на летото.
„Ако цените останат високи подолго време, сметаме дека многу авиокомпании во Европа ќе се соочат со сериозни финансиски проблеми. Мислам дека ќе има банкроти“, изјави О’Лири.
Според него, цената на млазното гориво драстично пораснала по блокадата на Ормутскиот Теснец, од околу 80 долари за барел во март, на околу 150 долари во моментов. Податоците на Меѓународната асоцијација за воздушен транспорт покажуваат дека просечната цена достигнала и 179 долари по барел.
О’Лири истакна дека неговата компанија е релативно заштитена бидејќи однапред обезбедила околу 80 проценти од потребното гориво, што ѝ овозможува да избегне поскапување на билетите.
„Можеме да гарантираме дека нема да има зголемување на цените на билетите или дополнителни такси за гориво“, рече тој.
Во меѓувреме, дел од конкуренцијата веќе презема мерки. Луфтханза откажа околу 20.000 летови, САС намали 1.000 летови, а КЛМ го редуцира капацитетот поради зголемените трошоци.
ИзиЏет исто така пријави значителни загуби и најави кратење на трошоците и можни поскапувања на билетите.
Од Меѓународната агенција за енергија предупредуваат дека Европа би можела да се соочи со недостиг на млазно гориво во рок од неколку недели, особено ако не се надомести увозот од Блискиот Исток.
О’Лири порача дека клучно е повторно отворање на Ормутскиот теснец, нагласувајќи дека токму геополитичките тензии се главниот двигател на кризата.
Сценариото со банкроти, доколку се реализира, би значело сериозно преструктурирање на европскиот авио-сектор, со помал број играчи и потенцијално повисоки цени за патниците на подолг рок.
