Стотици илјади на улиците во Франција, протестите се проширија и во други европски земји

Незадоволството поради растот на животните трошоци и влошувањето на јавните услуги предизвика масовни протести во Франција, кои во саботата ескалираа во насилни судири. Во немирите еден демонстрант починал од срцев удар во Париз, повеќе од 500 полицајци биле повредени, а околу 1.800 лица биле приведени низ земјата.

Протестите се одржаа во повеќе градови, каде што стотици илјади граѓани излегоа на улиците. Според францускиот министер за внатрешни работи, Лоран Нуњез, на маршевите учествувале околу 550.000 луѓе, додека синдикатот ЦЖТ проценил дека бројот достигнал 800.000.

Иако голем дел од демонстрантите протестирале мирно, одделни групи предизвикале сериозни инциденти. Во Лимож била запалена зградата на градското собрание, во Марсеј демонстранти упаднале во градската управа и оставиле анархистички графити, а во Лион бил запален туристичкиот центар.

— реклама —

Насилството ја зафатило и француската престолнина. Во Париз биле блокирани улици, оштетени излози на банки и продавници, а ограбени биле бутици и продавница на мобилниот оператор СФР. Во повеќе делови од градот биле запалени автомобили, а полицијата употребила солзавец за да ги растера групите што се судирале со безбедносните сили. Во Париз биле приведени 855 лица.

Францускиот премиер Себастијан Лекорну изјави дека владата нема да дозволи насилството да ја заплаши државата. За немирите ги обвини ултралевичарските групи и криминалците, нагласувајќи дека никој нема да може да ги наметнува своите политички ставови преку насилство.

Претседателот Емануел Макрон, исто така, најави дека одговорните за нападите ќе бидат кривично гонети и казнети. Тој порача дека државата ќе се спротивстави на оние што се обидуваат да предизвикаат хаос, да ги поткопаат институциите и да ги попречат граѓаните што мирно ги изразуваат своите барања.

— реклама —

Незадоволството во Франција почнало да се шири минатиот месец, кога ученици од средните училишта во северните предградија на Париз протестирале поради недостигот од наставници и несоодветните услови во образовните установи. Со текот на времето, движењето прераснало во поширока граѓанска реакција против социјалната нееднаквост, јавните расходи, поскапувањата и падот на животниот стандард.

Демонстрантите тврдат дека најголемиот дел од учесниците се однесувале мирно, а за насилството ги обвинуваат групите кои намерно предизвикувале судири и уништувале имот.

Во меѓувреме, француската полиција се соочува со критики поради повредувањето на демонстранти. Меѓу повредените има и тинејџер кој останал без дланка откако подигнал шок-бомба. Телото задолжено за надзор на полициското постапување истражува најмалку дваесетина случаи во кои се изнесени наводи за полициско насилство.

Од друга страна, полицискиот синдикат УНСА објави снимки за кои тврди дека прикажуваат групи луѓе како напаѓаат полициски возила со палки и тули. Синдикатот предупреди дека полициските сили се на работ на издржливоста.

— реклама —

Бран незадоволство поради високите животни трошоци се почувствува и во други европски држави. Во Брисел неколку стотици луѓе, главно млади, протестираа против зголемените трошоци за образование и реформите за кои стравуваат дека ќе го ограничат пристапот до високото образование.

Во Лисабон десетици илјади граѓани побараа мерки за справување со високите цени на становите и животните трошоци. Цените на недвижностите во Португалија се удвоиле од 2017 година, што дополнително ја продлабочило кризата со домувањето.

Во Италија, протестите во Милано и Болоња преминале во насилни инциденти. Во Милано полицијата употребила солзавец за да ги растера демонстрантите од централниот плоштад пред катедралата, а интервенирала и во трговскиот премин „Галерија Виторио Емануеле Втори“. Во Болоња биле употребени водени топови, а седум лица биле уапсени.

— реклама —

Протести се одржаа и во Албанија, каде што граѓаните повторно излегоа на улиците поради обвинувањата за корупција во владата, недостигот од работни места и лошите услови во образованието.

Италијанската премиерка Џорџа Мелони го осуди насилството, истакнувајќи дека правото на протест не подразбира уништување на градовите и претворање на улиците во боишта.

Франција се наоѓа во период на зголемена политичка нестабилност и економски притисоци, додека незадоволството поради поскапувањата и состојбата на јавните услуги продолжува да расте во завршната фаза од претседателскиот мандат на Емануел Макрон.